Read Car_Nicobarese 2 KINṘÖTNGÖ 23 Bible Online

2 KINṘÖTNGÖ 23 - Car_Nicobarese bible

2 KINṘÖTNGÖ 23

¹Im sinat samyeūheu pöri ang Yēhōyata nö hangë-eṅl alahare, ngaich hamūlöre tö yik töchöngu i töṙôngu, Asarīya ök kikōnyö kūön Yērōham, Ismaël kikōnyö kūön Yēhīohanan, Asariya ök kikōnyö kūön Opĕt, Ma-asĕya ök kikōnyö kūön Atayā, Elisafāt ök kikōnyö kūön Sikrī.

²Ngaich cha-a nö kiröönköre nö lök i Yūtā hamūl yik Lēvi ngaich nö ṙeū-eung nuk elpanam Yūtā, yip yöng kūö patī Israĕl inrē, yih cha-a ngaich nö i Yērusalem.

³Ngaich ṙòkhöre yik tömūl nö vī kinlēḵngô nö ik rācha el patī ngam Tēv. Ngaich Yēhōyata nö ngö ṙô tö cha, Yĕh meuk, ngam kikōnyö kūön ök rācha. Hökngen ò nö hayöng sā ṙô ngam Mā Tēv tö inlahen yip kikōnyö kūön Tāvit.

⁴Ngih ön la-en yīö min: yī-ö kūönṙô Lēvī inrē yamih öi i la-enre hē el anôilö, hĕng ip linūöyö in yīö mahayōm kūö inkūp,

⁵Hĕng inrē ip linūöyö min el patī ngam rācha, hĕng inrē i linūöyö im Inkūp Rööntömachöḵlö, ngaich ṙòkhöre yip tarik min nö el milūkö ngam patī ngam Mā Tēv.

⁶Un hĕng tak kumhēthötre nö el patī ngam Mā Tēv höng yip kūönṙô tö yip Lēvi mameukṙen; cha-a kumhēthötre, tön töhet, haköp chöngö ngam Mā Tēv.

⁷Ngaich yip Lēvi min nö havīlö ngam rācha, kö aṅhāṅv eltī tö aṅtīre; fëliyö min öp kumhēthötre nö el ngam patī. Hol ngam rācha yē ò nö kuhēthötre, yē ò inrē nö kunyī-inyre.

⁸Ngaich ngatī yik Lēvi yik aṅ Yūtā inrē nö ṙòkhöre sā nuk chöngö Yēhōyata ök kūönṙô. Kö kumtö yik tarikre cha-a, yik tö hòṅ chuh im haneūheu im anôilö, nö hol cha yip yamih nö i la-enre im anôilö; pò Yēhōyata ök kūönṙô nö öt tīnngörit yik tömichöḵlöngö.

⁹Ngaich ang Yēhōyata ök kūönṙô nö kētö vöi tö nuk tö kiröng tö kūöṅnö inrē lanaklö nup chehen Tāvit, nö in yik yöng kūö, yik më-el patī ngam Tēv;

¹⁰Ngaich anga-aṅ nö ṙātö yik tarik nö ṙòkhöre nö aṅten ök rācha, kö aṅhāṅv eltī tarik tö aṅtīre, löktökūö lā lòhngö kaha ngam patī söl lā kapā kaha ngam patī, havīlö ngam tahāklö tö ngam patī inrē.

¹¹Kēnyö ngam kūön ök rācha ngaich anga-aṅ, sumpīövlen ò ngaich tök sapīöv, ngaich kē-ĕkūö ò tö ngam kinlēḵngô; ahangken ò ngaich cha-a nö rācha, ngaich Yēhōyata tö yik kikōnyö kūön ò inrē nö hachāman; ngö ṙô cha-a ngaich, Marô-òten an yēḵ ngam rācha nö aṅ.

¹²Ngaich hē Ataliyā nö hang ṙënṙô yik tarik nö fal ha-öiny ngam rācha inrē, kuhēthötre anga-aṅ ngaich nö el ngam patī ngam Mā Tēv nö in yik tarik;

¹³Ngaich hē ò nö ngëicha, sökhaka ök rācha nö umuh ik machöḵlö ò nö ik lökhöt, tö yik yöng kūö yik famöö römpĕt inrē, nö hol ök rācha, ṙòkhöre inrē yik tarik aṅ ngam panam nö ṙāmölōn föö römpĕt inrē, yik tumkökṙôre inrē nö hol tö nuk ranöngre nö urĕh im vinīlö ngam rācha, tikachngö inyūtre ngaich Ataliya, ngaich ngö ṙô nö hū-a, Inhôngen! Inhôngen!

¹⁴Ngaich Yēhōyata ök kūönṙô nö kēnyö yik yöng kūö tö ṙātu nö i kui yik kumyung, ngö ṙô ngaich tö cha. Kēnyen ò nö ihôl më töṙak; öp töng mu-unôichrit ò min famëlngen ò nö aṅtī tö sanët. Pò ngam kūönṙô nö ngö ṙô, Un fëliyö an nö el patī ngam Mā Tēv.

¹⁵Lökten cha nö kētö tīre nö in ò; ngaich anga-aṅ nö kuhēthötre nö ik lökhöt kōra inkūp patī ök rācha, in e cha-a ngaich nö fëlngen ò.

¹⁶Vī kinlēḵngô ngaich Yēhōyata nö in re in yik tarik inrē ik rācha inrē nö hōten cha nö tarik ngam Mā Tēv.

¹⁷Ṙòkhöre ngaich yik tarik nö chuh ik patī Pē-al, chiṙustö e ngaich; tö nuk tahāklö e insā inrē pinyënyi tö cha lireūkö, fëlngen Mātan cha-a ök kūönṙô Pē-al nö i kūö nuk tahāklö.

¹⁸Ṙātö tarik ngaich Yēhōyata nö amahtö ngam patī ngam Mā Tēv nö el katòh chöngö yik Lēvī kūönṙô tö yik Lēvī inrē halēnlen Tāvit nö yōm ngam patī ngam Mā Tēv, kamëtö tö töföngö tökētu nö im Mā Tēv, sā kinūichngö e nö im chöngö Môsös, holtö ṙanāmölōn tinkökṙôre inrē sā chöngö Tāvit.

¹⁹Ṙātö yōmkūö inkūp ngam patī ngam Mā Tēv anga-aṅ pòn sōtu nö hĕng tak töthet kumhēthötre nö in e.

²⁰Kē yik yöngkūö anga-aṅ, tö yik mā, tö yik mahayöng yik tarik, ṙòkhöre inrē yik tarik ngam panam; ngaich cha-a nö kēnyö ök rācha nö ṙā-ang el patī ngam Mā Tēv, kiröön nö lök ik lātulöng inkūp patī rācha. Ha-ūichlö ök rācha ngaich cha-a nö el kantēra rācha.

²¹Lökten yik tarik ngam panam nö ṙāmölōn; ṙēm ngaich ngam elpanam, unôichrit finëlngö Atāliya.