Read Car_Nicobarese 2 KINṘÖTNGÖ 24 Bible Online

2 KINṘÖTNGÖ 24 - Car_Nicobarese bible

2 KINṘÖTNGÖ 24

¹Sat samyeūheu ṙēti Yô-as hē ranulten ò nö hayöng, fën anāi samyeūheu anga-aṅ nö hayöng nö i Yērusalem: Sipīya minënyi ök yöng ò kikānö aṅ Pīrsīpā.

²Chīpö la-en ang Yô-as nö i kūö ngam Mā Tēv irô-òtö sakāmö Yēhōyata ök kūönṙô

³Nët tak kahë Yēhōyata tö pīhö ò kūönu ngaich anga-aṅ tö kikōnyö kikānö inrē.

⁴Unôichrit ngih ngaich Yô-as nö hòṅ vītit ngam patī ngam Mā Tēv.

⁵Hamūl yik kūönṙô ngaich anga-aṅ tö yik Lēvi inrē, ngaich ngö ṙô tö cha, Kuṙòh kiröönngöre yin i nup elpanam Yūtā, ngaich hamūl rupīö in yip aṅ Israĕl vinītit ngam patī ngam Tēv yīö nö kaheuk samyeūheu, meūkö e inrē nö tökurāten. Hö-ö pöri yik Lēvi nö kumratken e.

⁶Lökten ök rācha nö havëten Yēhōyata ök yöng kūö, ngaich ngö ṙô tö ò, Kūö yòh öm öt hōtö yip Lēvī nö kētö nup masūl nö ṙeū-eung Yūtā Yērusalem inrē nuk hachöngten Môsös ök tarik ngam Mā Tēv, nö in yip tömaṙôngö Israĕl nö kūö öp rūkui minkahngö?

⁷Pò yik kikōnyö kūön Ataliya, ök tötlöök kikānö nö tiṙōlngö ngam patī ngam Mā Tēv nö i la-en Pē-al.

⁸Lökten ök rācha nö tölṙô, ngaich cha-a nö vī kasòng, ṙātö e ngaich nö ik lā-uk inkūp ngam patī ngam Mā Tēv.

⁹Ngaich ök inhānga nö keuheūtngöre chūök i Yūtā, Yērusalem inrē, hinôtö nup masūl nö kētu nö im Mā Tēv nuk hachöngten ök tarik ngam Tēv ang Môsös töṙātu nö ngaich nö i kui Israĕl nö el tönyalnyi.

¹⁰Ngaich ṙòkhöre yik kūön rācha tö yik tarik inrē nö ṙāmölōn nö kētö nuk tīre masūl ngaich chaphöt u nö el kasòng hanöng saha cha nö keuheūthötre tī.

¹¹Ik töng hē ök kasòng nö kētu nö in yik mākūö aṅ ik rācha tö yik Lēvī, hē cha nö meuk nuk rupīö nö pōyen el e, ngaich ök aṅ ik rācha yōm tötngāṅlnyi tök mākūö aṅ in ök mākūö kūönṙô nö yih nö chapngö aṅ ök kasòng kē-ĕ e ngaich, ngaich havantö e nö i chūök e. Ngati tī pōyen hamūl tö rupīö.

¹²Ngaich ök rācha tö Yēhōyata inrē nö kētö e nö in cha yik yōm la-en ngam patī ngam Mā Tēv, ngaich cha-a nö haṙāi töhuveū-en nö i la-en ihong mistirī inrē nö vītit ngam patī ngam Mā Tēv, töhuveū-en inrē nö i vët mās inrē nö vītit ngam patī ngam Mā Tēv.

¹³Ngaich cha-a yik töngöönka nö rultöre nö la-evṙen, karööniröön ngaich ngam vinītit e nö eltī cha, havan tö inlahen ngam patī ngam Tēv cha-a ngaich nö sāre hangëṅken e inrē.

¹⁴A Hē cha ngaich nö keuheūten, kētö nuk chööḵṙen nuk rupīö cha-a nö in ök rācha in Yēhōyata inrē, aṅtī ten u ngaich nö vī cheheti im patī ngam Mā Tēv, hĕnghöre i la-en e töföngö inrē tökētu, töchilū chūök lōpan chūökṙen humlum rupīö inrē. b Ngaich cha-a nö kētö töföngö tökētu nö el patī ngam Mā Tēv nö örheūheu irô-òtö nuk sakāmö Yēhōyata.

¹⁵Köṅnyu pöri ngaich Yēhōyata sööḵngö inrē tö sakāmöre, kapah ngaich hēngòng lūöi anāi samyeūheu ṙēti anga-aṅ tö kinpahare.

¹⁶Lāpngen ò cha-a ngaich nö elpanam Tāvit in yik rācha, pò ò nö löökö la-en nö in Israĕl, lā im Tēv inrē tö ngam patī ò.

¹⁷Unôichrit kinpaha Yēhōyata yih yik kūön rācha aṅ Yūtā ngaich salām ök rācha, hang ṙô cha ngaich ök rācha.

¹⁸Ṙāngö ngam patī ngam Mā Tēv cha-a ngaich, ngam Tēv yik yöng cha, ngaich lök la-en Asērim insā tēv inrē. Ngaich yih ngam lanīnö nö i kui Yūtā, Yērusalem inrē tö kūö ngih fālen cha.

¹⁹Sön pöri anga-aṅ nö tīntö pròfĕt nö in cha nö havanten cha nö im Mā Tēv; ngaich acha-a vē nö hameuktö ngam töchōich nö in cha, hö-ö pöri cha-a nö hòṅ hang.

²⁰Ngaich ngam Töhet Fanöinylö ngam Tēv nö kē-ĕ Sakarīyā ök kikōnyö kūön Yēhōyata ök kūönṙô; söklöre anga-aṅ nö lātulöng tö yik tarik, ngaich ngö ṙô tö cha, Ngö ṙô an ngam Tēv, Kūöyòh öyih chōichen i minë chöngö ngam Mā Tēv, töp lökten yīö ötkô öi kôlò? Pò yīö ṙāngö ngam Mā Tēv, ngaich ṙāngen yīö anga-aṅ.

²¹Haṙong lōnre pöri cha-a nö lā-al ò, ngaich i chöngö ngam rācha cha-a nö kulehan tö ihong nö el milūkö ök patī ngam Mā Tēv.

²²Ngatī inlahen Yô-as ök rācha nö öt köpölōn tö miṙēlōn Yēhōyata, ök kikōnyö yöng Sakarīya, ök töhameuktu nö in ò, fëlngö ök kūön ò pöri kikōnyö. Ngaich hē ò nö hòṅ kapah, ngö ṙô anga-aṅ, Meuk an yēḵ ngam Mā Tēv havāhal inrē.

²³I kinheūtö ngam samyeūheu yik kumyung aṅ Siriā nö yih nö lā-al Yô-as. Yih cha-a nö i Yūtā, Yērusalem inrē, ngaich cha-a nö fëlngö yik kūön rācha yik tarik, yik mī-in yik tarik, ngaich söömngö nuk chehen nuk tahōm cha nö ik rācha aṅ Tamaskös.

²⁴Pòrô yik kumyung aṅ Siriā nö yih nöng öt ṙōl tak hol tö tarik, kētu cha-a tö ngam Mā Tēv nö eltī cha yik tömaṙôngö kumyung, pò cha nö ṙāngö ngam Mā Tēv, ngam Tēv yik yöng cha. Ngatī tī cha-a nö kēkö alaha inkaha fālen nö in Yôas.

²⁵Hē cha nö kiröönngöre nö ngaich nö ṙā-ang in ò, ṙāngen ò nö pōihangṙen nö hanyahka, ngaich yik tarik ò tökūö ök mahām ök kikōnyö kūön Yēhōyata ök kūönṙô, fëlngen ò ngaich cha-a nöng el chamamre. Kapah ngaich anga-aṅ; lāpngen ò cha-a ngaich nö ël ök elpanam Tāvit, hö-ö pöri cha-a nö lāpngen ò nö i kui kumpah rācha.

²⁶Acha-a yik mahamūl ellōnre nö lā-al ò hēḵ Sapāt ök kikōnyö kūön Simē-at ök aṅ Amön nö kikānö, Yēhōsafāt inrē ök kikōnyö kūön Simrit aṅ Mô-ap nö kikānö.

²⁷Ineūkö inlahen yik kikōnyö kūön, nup töṙōlkangen chöngö inrē lamā-al ò, ök vinītit ngam patī ngam Tēv inrē nö kūichiyö nö i mat öp vinë-eny manah i mat ök Līpöre yik Rācha, Ṙënngen ò ngaich nö hayöng ök kikōnyö kūön ò Amasiyā.