Read Car_Nicobarese 2 KINṘÖTNGÖ 26 Bible Online

2 KINṘÖTNGÖ 26 - Car_Nicobarese bible

2 KINṘÖTNGÖ 26

¹Ngaich ṙòkhöre yik tarik aṅ Yūtā nö kē-ĕ Usīya, ök tö tafūöl sīön samyeūheu ṙēti, vīlen ò ngaich nö rācha nö ṙënngen ök kikōnyö yöng ò Amasīya.

²Vīlen Alòt anga-aṅ ngaich havantö e nö in Yūtā, unôichrit kinpaha ök rācha yöng ò.

³Tafūöl sīön samyeūheu ṙēti ang Usiyā hē ranulten ò nö hayöng, taneui anāi nët samyeūheu anga-aṅ nö hayöng nö i Yērusalem. Yēkôliyā minënyi ök yöng ò kikānö aṅ Yērusalem.

⁴La-evṙen anga-aṅ tö töchip nö i kūö ngam Mā Tēv, sā nuk la-en ök yöng ò Amasiyā nö ṙòkhöre.

⁵Kētöre anga-aṅ nö chöh ngam Tēv hē nuk sakāmö Sakariyā, ök mahaköpten ò nö pa-ekūö tö ngam Tēv; ngaich irô-òten ò nö chöh ngam Mā Tēv, kôlò anga-aṅ ngaich tö tī ngam Tēv.

⁶Kiröönngöre anga-aṅ ngaich nö kiyung nö lā-al yik aṅ Filistain ngaich tiṙōlngö ök kinlōngö Astòt inrē; vīlö elpanam anga-aṅ inrē nö i ṙôktö panam Astòt tahëngö chūök inrē i Filistain.

⁷Holṙen ò ngam Tēv nö lā-al yik aṅ Filistain, lā-al yip Arap, mi-iyöng Kurpa-al La-al, yik Meūn inrē.

⁸Kētö masūl yik aṅ Amön nö in Usīyā, ngaich ök ineūnyö nö uroh nö parāti nö söl kūöngö panam Aikup, pò ò nö kalēḵ takô.

⁹Hēk inrē Usīyā nö vīlö chūök chamônga nö i Yērusalem ik Sinkeukngö Inkūp ane inrē ik Achāṙö Inkūp ik Linkölngö, vī-il u inrē nö chūök kumyung.

¹⁰Vīlö chūök chamônga anga-aṅ inrē nö el tönyalnyi, pōiyen ahul tö chūök mak pò ò nö pōyen chehen tö töṙeūla, hēnghöre i Sefëlah im töṙā-akūö panam inrē, īnu anga-aṅ inrē tö vamī panô-òṅ yōm vāin inrē i kui nup rung i nup panam inrē tökôlò aṅ kūö, pò ò nö hāngenlōn tö tumlat.

¹¹Hēk inrē Usiyā nö pōyen kumyung, tökô nö i kinyūngö nö ṙōlö minchööḵlö sā tūmö yik töhamūllöng tö Yē-i-el ök yōm tötngāṅlnyi tö Mā-asiyā inrē ök mākūö, el katòh chöngö Hananī, töhĕng tak aṅ in yik töchöngu ik rācha.

¹²Ṙòkhöre tumtak yik mā kūö nuk patī yik yöng tökalēḵ tarik tö-eūnyu inrē nö nët köṅny tafūölòng.

¹³El katòh chöngö cha yik kumyung lūöyòng sat köṅny taneūyòng, yik tökô nö kiyung nö lā-al tö kalēḵ, nö holṙen ök rācha nö ik lā-al ò.

¹⁴Halēn aṅtī yik kumyung ang Usiyā tö lanaklö, vöi, sapīöv, vët inyut, linreny, ihong inrē aṅ chinvil.

¹⁵I Yērusalem anga-aṅ nö vī inchin, harunten yik tarik töhuveū-en, nö i kui nuk chūök chamônga sinkeukngö inrē, nö linrenyngö chòk tökiröng ihong inrē. Parānyi ngaich nö marôvat ök ineūnyö ò, pò ò nö pōyen hinòlṙen, hanöng saha ò nö kalēḵ.

¹⁶Hē ò pöri nö kalēḵ sīöplöre inkeūlen ngaich anga-aṅ, nö lökngen ò nö payāyi. Pò ò nö ötkô-en nö im Mā Tēv ngam Tēv ò, kuhēthötre inrē nö el ök tempöl ngam Mā Tēv nö föng tötahūsa nö el ök tahāklö tötahūsa.

¹⁷Kuhēthötre pöri Asariyā ök kūönṙô ngam Mā Tēv hol ò yik tarik tö eūnyu kumlēḵ;

¹⁸Ngaich cha-a nö sōten ök rācha Usiyā nö ngö ṙô tö ò, Öt la-en meh an Usiyā öm föng tötahūsa im Mā Tēv, tön la-en yip kūönṙô pöri kikōnyö kūön Āròn, yip tö ahetlöngö nö föng tötahūsa. Kunyī-inyre man ṙā-ang im töhet chūök; tön vaich mana, hö-ö an min inrē nö kumtö ineū-eu meh nö ṙā-ang im Mā Tēv.

¹⁹Tainy ngaich ang Usīyā. Aṅhav eltī ang-aṅ tök chūök finöngö tötahūsa, ngaich hē ò nö tainy nö in yik kūönṙô ngaich tafunköṅny kūö nuk yeūnyö nö i māl ò, nö i kūö yip kūönṙô nö el patī ngam Mā Tēv, ranghö öp tahāklö tötahūsa.

²⁰Ngaich ök mākūö kūönṙô ang Asariyā, ṙòkhöre yik kūönṙô inrē, nö hatīönken ò, ngaich yĕh meuk, yeūnyu māl anga-aṅ! Kuringnyen ò ngaich cha-a nö ka-eūyen, ngaich anga-aṅ inrē nö kurāten nö kunyī-inyre, pò ngam Mā Tēv nö māichkö alaha ò.

²¹Yeūnyu ök rācha Usīyā nö söl ik kinpaha ò, ngaich kūö ò nö tö yeūnyu ngaich iyöng el tököhngen patī, pò ò nö ngaich nö ha-uknyu tö el ngam patī ngam Mā Tēv. Ngaich ök kikōnyö kūön ò Yôtam nö hayōm yik aṅ patī ök rācha, hayöng yik tarik aṅ ngam panam.

²²Nuk tö ōtngöre inlahen Usiyā, löktö kūö raneh söl manā-aṅ, kūichi nuk tök pròfĕt Isāyā ök kikōnyö kūön Amôs.

²³Haṙòh ngaich Usiyā nö in yik yöngre, ngaich lāpngen ò cha-a nö in yik yöng ò nö el ök taṙeū yik rācha, pò cha nö ngö ṙô, Töyeūnyu an. Ṙënngen ò ngaich ök kikōnyö kūön ò Yôtam nö hayöng.