Read Car_Nicobarese 2 KINṘÖTNGÖ 28 Bible Online

2 KINṘÖTNGÖ 28 - Car_Nicobarese bible

2 KINṘÖTNGÖ 28

¹Nët anāi samyeūheu ṙēti ang Ahas hē ranulten ò nö hayöng, tafūöl sīön samyeūheu anga-aṅ nö hayöng nö i Yērusalem. Ngaich anga-aṅ nö ötla-evṙen tö töchip nö i kūö ngam Mā Tēv, nö sā ök yöng ò Tāvit,

²Lök el nuk talöökö yik rācha pöri aṅ Israĕl. Urōsen anga-aṅ nö vī tömiyëṙi insā Pē-al;

³Föng tötahūsa inrē anga-aṅ nö el achāṙö ök kikōnyö kūön Hinnôm föng yik kūönre inrē kikōnyö nö tökētu, nö sā nup sinò-kkūö harunken yik pumnāmö tarik yik tö-ahōṙi tö ngam Mā Tēv nö i kūö yik tarik Israĕl.

⁴Kētö tökētu inrē anga-aṅ, föng tahūsa inrē nö i nuk lātulöng chūökö, i kui nuk rung, elkatòh chūökö, elkatòh tö ayālö rōi chōn inrē.

⁵Lökten ngam Mā Tēv ngam Tēv ò nö kēten ò nö eltī ök rācha aṅ Siriā, ök tö öt kô-òti tö ò ngaich pōiyen kahë tö aṅ in yik tarik ò kēten cha ngaich nö i Tamaskös. Kētuvö anga-aṅ inrē nö eltī ök rācha aṅ Israĕl, ök tö ötkô-òti tö ò nö pōi höiny tötöfëli.

⁶Pò Pekā ök kikōnyö kūön Ramaliyā nö hēngòng nët anāi köṅny fahëlngö i töhĕng sakāmö nö i Yūtā, ṙòkhöre cha-a nö tarik tö-eūnyu kumlēḵ, pò cha nö ṙāngö ngam Mā Tēv, ngam Tēv yik yöng cha.

⁷Ngaich Sikrī, ök tö kalēḵ tarik aṅ Ifrēm, nö fëlngen Ma-asīya ök kikōnyö kūön ök rācha Asrīkam inrē ök töchöngu nö el patī rācha Elkanā inrē ök ṙanët ök rācha nö i chöngö.

⁸Ngaich yik tarik aṅ Israĕl nö nëtòng köṅny kahë tö yik mak alaha re, kikānö inrē; pōyen kahë cha-a inrē tö nuk tökuhūömö (tötōmö) chehen nö in cha ngaich kētö nuk tökuhūömö chehen nö i Samariā.

⁹Hĕng tak pöri ök pròfĕt ngam Mā Tēv nö umuh, ök tö minënyuvö tö Otet; kunyī-inyre anga-aṅ nö höng kūö yik kumyung yik yamih nö i Samariā, ngaich ngö ṙô tö cha, Yĕh meuk, kūö ngam Mā Tēv, ngam Tēv yik yöng yīö nö līn nö in Yūtā, ngaich kēten cha nö eltī yīö, ngaich pöri yī-ö fëlngen cha i tanānyöre ngam tö söllö nö el halīöngö.

¹⁰Ngaich yin yih hòṅ haköv yip tarik aṅ Yūtā, Yērusalem inrē kikōnyö kikānö, nö töhakövö tö yīö. Röh öi yī-ö kanahnguṙen tö tököölre im Mā Tēv ngam Tēv yīö?

¹¹Yĕh hang ṙô chu töngamuh, havanngö më tökē-ĕ nö in yip mak alaha yīö më kahë yīö, tön i kui yīö an ngam tö kalēḵ lanīnö ngam Mā Tēv.

¹²Rīkre inrē yik mā kūö yik tarik aṅ Ifrēm, Asarīyā ök kikōnyö kūön Yôhanan, Përakiyā ök kikōnyö kūön Mesilmòt, Yēhiskiya ök kikōnyö kūön Salūm, Amasā ök kikōnyö kūön Hatlai, söklöre nö lā-al cha yik yamih nö ṙā-anng im kinyūngö,

¹³Ngaich ngö ṙô tö cha, Uh yin kētö në tökē-ĕ nö ihih, tön hòṅ kētö kui hī yin töfālen im Mā Tēv nö ṙinūöten në tökööl hī töngamuh fālen inrē, Pòṅ ha-ëhelen ngam fālen hī nö kiröng, ngaich kalēḵ öp lanīnö nö lā-al Israĕl.

¹⁴Lökten yik töchehevti tarik nö ṙāngö yik tökē-ĕ tö nuk tötōmö chehen nö i kūö yik kūön rācha yik tömūl inrē.

¹⁵Ngaich yik tarik yik tö kakka minë-eny nö söklöre ngaich kē yik tökē-ĕ, kafānö cha inrē tö aṅ i nuk tötōmö chehen yik tö chumlal in cha; hayūtö cha-a tö cha, kētu nāmröön, meukṙen cha tö nya-aṅkūö ök inrē, hachāmö cha inrē; halai yik tötkalē-en in cha inrē nö i uk köttö, kēten cha ngaich nö im elpanam kachūr. Havan cha-a ngaich nö i Samariā.

¹⁶Hē e ök rācha Ahas nö havëkö holṙenre nö ik rācha aṅ Asiria.

¹⁷Pò yik aṅ Ētöm nö hēk nö havīlen Yūtā ngaich ötkô-òtī tö e, halaingö yik tökē-ĕ ngaich.

¹⁸Yik aṅ Filistain inrē nö yôp nup elpanam i Sefelā i Nēkep inrē i Yūtā, ngaich kē-ĕ Pētsemes, Ayalòn, Kētiròt, Sokō holtö nup tuhēt e, Timnā hol tö nuk tuhēt e, Kimsō hol tö nuk tuhēt e; ngaich iyöng umuh cha-a.

¹⁹Pò ngam Mā Tēv nö tumṙeūten Yūtā, tö kūö Ahas ök rācha aṅ Israĕl, pò ò nö ötkô-en inrē nö im Mā Tēv.

²⁰Lökten Tilkātpilnĕsar rācha aṅ Asīria nö yih nö lā-al ò, ngaich hachökan nö ṙënngen inngëṅlö ò.

²¹Pò Ahas nö kē nö ṙā-ang el patī ngam Mā Tēv el patī ngam rācha inrē tö yik kūön rācha inrē, ngaich kētö masūl nö ik rācha aṅ Asiriā; hö-ö pöri angū-ö nö holṙen ò.

²²I hē ök kanihngen ò hanṙūöhangen anga-aṅ nö ötkô-en nö im Mā Tēv anga-aṅ ngòh rācha Ahas.

²³Pò ò nö kētö tökētu nö i nup tēv Tamaskös yip töt kô-òtī tö ò, nö ngö ṙô, Kūö yip tēv yip rācha aṅ Siriā nö holṙen cha hòṅ kētö tökētu chin in u hòṅ u nö holṙen chu. Anū-ö pöri pinyāingö ò, ṙòkhöre inrē yip aṅ Israĕl.

²⁴Ngaich Ahas nö hamūl nuk chūökṙen el patī ngam Tēv ngaich pinyeny nup chūökṙen nö rökö u nuk el patī ngam Tēv, öpngö kūö nuk inkūp ngam patī ngam Mā Tēv inrē; ngaich vī tahāklöre anga-aṅ nö keuheūt sinkeukngö Yērusalem.

²⁵Keuheūt nuk elpanam Yūtā anga-aṅ nö vīlö lātulöng chūökö chūök finöngö tötahūsa i nup tahëng tēv harunnyö tanānyö ngam Mā Tēv, ngam Tēv yik yöng cha.

²⁶Nup tö ōtngöre inlahen talöökö ò inrē löktö kūö raneh söl manā-aṅ, yĕh meuk kūichiyö nuk nö i mat Līpöre yik Rācha aṅ Yūtā aṅ Israĕl inrē.

²⁷Haṙòh ngaich Ahas nö i yik yöngre, lāpngen ò cha-a ngaich nö elpanam i Yērusalem, pò cha nö ötkēhĕtnen ò nö i kui kupah yik rācha aṅ Israĕl. Hayöng ngaich Hesīkia ök kikōnyö kūön ò nö ṙënngen ò.