Read Car_Nicobarese 2 KINṘÖTNGÖ 3 Bible Online

2 KINṘÖTNGÖ 3 - Car_Nicobarese bible

2 KINṘÖTNGÖ 3

¹Rultöre ngaich Sòlòmön nö manlö ök patī ngam Mā Tēv i Yērusalem i kui öp Rung Môrīya, i chūök ngam Mā Tēv nö meūkö tö Tāvit ök kikōnyö yöng ò, ik chūökö halēnlö Tāvit el chūök pinṙōngö sāiny Ôrnan ök aṅ Yapus.

²Rultöre anga-aṅ nö mānö ik innëtö chingëṅt ik finën samyeūheu ò nö hayöng.

³Në nun kinlah ṙôkö tī Sòlòmön nö mānlö ök patī ngam Tēv: rôta e, i sumkôngö ngam hötṙeh kinlaha, nö tafūöl anāi sumkôngö, nët anāi sumkôngö ṙôkti ël.

⁴Ök lökhöt lā kūö ök el milūkö ngam patī nö nët anāi sumkôngö rôta nö sā ṙôkti ël ngam patī; hēngòng nët anāi sumkôngö (9 Mtr) rô-òlkui angū-ö. La-el e tī anga-aṅ nö hatāptö töng humlumnyöre.

⁵Haṙākö ël ök milūkö tö sīprös, ngaich ha-nyāti angū-ö tö töng humlumyöre ngaich vī mirun e tö rōi kachūr sayōk inrē.

⁶Hanyöṅt ök patī anga-aṅ tö nuk tö vītu töpōi-ṙāi ihong. Nup humlum aṅ Parvēm nö humlum.

⁷Ngatī tī anga-aṅ nö hatöökngö humlum nö ik patī i mikēunö e, i ël e, i kaha e, i inkūp e inrē; ka-iphötvö kaha angū-ö tö kërupīm.

⁸Ngaich anga-aṅ inrē, nö vīlö ök tölngö töhet chūökö; ṙôta e, sā ṙôkti ël ök patī nö nët anāi sumkôngö (9 Mtr), ṙôkti ël e, nët anāi sumkôngö inrē (9 Mtr); ngaich lūöpö e anga-aṅ tö töng humlumnyöre tafūölòng tālen.

⁹Hĕng siköl lumngan (570 grm) nuk kīny nö tönlngö tötaneui anāi siköl (20 Metric Ton’s) humlum. Ngaich i kui nup lā tulöng urôhò tī anga-aṅ nö lūöptö humlum.

¹⁰Im tölngö töhet chūökö anga-aṅ nö nëtö vahī tö kërupim nöng chōn lūöpö tö humlum.

¹¹Nuk saneôk nuk kërupim nët anāi sumkôngö rô-òny: öp kël ngam töhĕng, taneui sumkôngö sōngtöre nö i kaha ngam patī, tök tahëng kël ò inrē, nö taneui sumkôngö, (2.2 Mtr) sōngtöre nö i kël ök tahëng kërup;

¹²Ngaich i ngòh kërup, hĕng ök kël, tötaneu i sumkôngö (9 Mtr) sōngtöre nö i kaha ök patī, ngaich ök tahëng kël, angū-ö inrē tö taneui sumkôngö, nö taptu kūö nö i kël ök tahëng kërup.

¹³Ngaich nuk kël në kerūpim nö sölngö nët anāi sumkôngö (27 Mtr); sökhaka nuk kërupim nö röönhak röön, kū-ötö el milūkö.

¹⁴Vī ranang kūö anga-aṅ tö tölingūṅ tö-amëla töhuṙing, tö-amëla ta-īö tö laturë tövai inrē linen hilā, ngaich mirūnö mat tö insā kërup.

¹⁵Lā kūö ök patī anga-aṅ nö vī machöḵlö nët tölūöi anāi taneui sumkôngö (15.50 Mtr) rôlòng, nö hol tö tulkui tö tö taneui sumkôngö (2.2 Mtr) nö kö i kui u.

¹⁶Vī sayōk anga-aṅ nö sā aneūmö ngaich vītö u nö el kui nup machöḵlö; vī anār inrē anga-aṅ hēngòng, ngaich vītö u nö i nuk sayōk.

¹⁷Asöklö nuk machöḵlö anga-aṅ nö lākūö ök tempöl, hĕng lā lòhngö, kapā ök tahëng; kaheūkö minë-eny ök lā lòhngö nö Yākin, ngaich Pō-as ök lā kapā.