Read Car_Nicobarese 2 KINṘÖTNGÖ 30 Bible Online

2 KINṘÖTNGÖ 30 - Car_Nicobarese bible

2 KINṘÖTNGÖ 30

¹Söömngö ṙô ang Hesikia nö in yik Israĕl nö ṙòkhöre Yūtā inrē, kūich līpöre Ifrĕm inrē, Manasē inrē nö hōten cha nö yih nö i patī ngam Mā Tēv i Yērusalem, nö haköpkö ngam chinööḵngö im Mā Tēv ngam Tēv Israĕl.

²Pò ngam rācha tö yik kūön rācha in ò nö ṙòkhöre nö hamūlöre nö i Yērusalem ngaich halēnöre nö haköpkö ngam chinööḵöng im innëtö chingëṅt.

³Pò cha nö ötkô nö haköpkö e nö ik hē e, kūö yik kūönṙô nö öt timtörekūö tumtaka nö ahetlöre, öt rēhĕn yik tarik nö mūl nö i Yērusalem

⁴Ngaich tölöök ngam töhalēnlöng tölōn ök rācha lōn yik tömaṙôngö inrē.

⁵Lökten cha-a nö chöngu tö inhānga nö keuheūtngöre chūök nö i Israĕl, löktökūö Pīrsipā söl Tën nö hōtö yik tarik nö yih nö haköpkö ngam chinöö-öng im Mā Tēv ngam Tēv Israĕl, i Yērusalem: pò cha nö öt haköpken e nö pōyen nö sā hinôtöre.

⁶Lökten yik samöömngöṙô nö kiröönngöre nö keuheūt nö i Israĕl, Yūtā inrē nö kumtö līpöre tökūichö ṙamā-ang in ök rācha in yik kūön rācha inrē, sā chöngö ök rācha, ngö ṙô, Ō yī-ö tarik Israĕl, havantöre im Mā Tēv, ngam Tēv Aprahām, Isāk, Israĕl inrē hòṅ ò nö hēk nö havöötö kūöre nö in yip chööḵṙen in yīö yip tötkô-òng vah tö tī yip rācha aṅ Asīriā.

⁷Uh yin sā yik yöngre yik mak alaha yīö inrē, yik töt ṙamātö ellōnre nö im Mā Tēv yik yöng yīö, lökten ò nö vīten yīö meuk.

⁸Uh yin töngamuh hakeh likeunre öi sā yik yöngre misī kētöre pöri im Mā Tēv, yih inrē el ngam töhet chūök ò, ngam tö-ahetlöng nöng örheūheu, ngaich lök la-en ngam Mā Tēv yīö, hòṅ ngam tökiröng tanānyö ò nö havööṙikūö tö yīö.

⁹Pò yīö yē yīö havantöre im Mā Tēv, ngaich yip mak alaha yīö tö yip kūön yīö inrē min nö kôtökūö tö miṙēlōn nö in yip mahakövöre, ngaich havan nö i ngih panam. Pò ngam Mā Tēv yīö nö tö-aṙē-ĕlōn, öthō min nö havööngö kūöre tö yīö, yē yīö havantöre in ò.

¹⁰Lökten yik samöömngö ṙô nö kiröönngöre nö keuheūt elpanam nö i panam Ifrēm Manasē inrē, tölngö i Sĕpulòn inrē; ngaich pöri cha-a nö hayīölngen cha inrē.

¹¹Höng haroh tum taka pöri tarik aṅ Asēr, Manasē, Sĕpulòn inrē mahayāichngöre nö yih nö i Yērusalem.

¹²I kui Yūtā ngam kël ngam Tēv nö kētö tö hĕng ellōn cha nö la-evṙen tö hinôtöre tök rācha tö yik kūön rācha inrē nö löktö im ṙô ngam Mā Tēv.

¹³Maṙôngö ngaich yik tarik hamūlöre nö yih nö i Yērusalem nö ik tökiröng nyinā-aṅ tötaföhlöng rôti im innëtö chingëṅt, nö pōyen.

¹⁴Rultöre cha-a ngaich nö la-evṙen nö kēngö nuk tahāklö nuk mī-i Yērusalem, ṙòkhöre inrē nuk tahāklö chūök finöngö tötahūsa nö kē-ĕyö ngaich suktu nö el achāṙö Kitrōn,

¹⁵Ngaich cha-a nö ṙatnyö likeun tötāli sīṅp nö im chinöö-öng im finën sīön sakāmö ngam innëtö chingëṅt. Ngaich yik kūönṙô tö yik Lēvī inrē nö sumrōngikūö, lökten cha nö ahetlöre, ngaich kētö töföngö tökētu nö el patī ngam Mā Tēv.

¹⁶Kē nuk töha-eh chūökre cha-a nö sā chöngö Môsös ök tarik ngam Tēv; kicheny mahām yik kūönṙô nup kahë cha nö eltī yik Lēvi.

¹⁷Pòn maṙôngö yik umuh in yik tömūl töt ma-ahetlöre; lökten yik Lēvi nö ṙatnyö likeun tötāli sīṅp ngam chinöö-öng pòn öt ṙòkhöre cha-a nö het, nö vī-i e nö töhet nö im Mā Tēv.

¹⁸Pòn maṙôngö aṅ in yik tarik töt ma-ahetlöre, maṙôngö aṅ Ifrēm, Manasē, Isakar, Sĕpulòn inrē ngaich nöng nyā ngam chinöö-öng nö harīkngöre töm chöngö e. Pò Hesikia nö ve-elkui cha, nö ngö ṙô, Kö aṙēlöng yip min tö ngam tölöök Mā Tēv

¹⁹Yip kamëtö kūö ellōnre nö chöh ngam Tēv, ngam Mā Tēv yik yöng ò, pòrô nö öt sā ngam chöngö hanëtö im töhet chūök.

²⁰Ngaich ngam Mā Tēv nö hang ṙô Hesikia, ngaich lööken tī tö yik tarik.

²¹Ngaich yik tarik aṅ Israĕl yik mī-i Yērusalem nö haköpken ngam tökiröng nyinā-aṅ tötaföhlöng rôti nö sat sumkam holtö yöng ṙanāmölōnre; ngaich yik Lēvi tö yik kūönṙô nö ha-öiny ngam Mā Tēv nö kaheuk sakāmö, nö mā-ainyre nö tikökṙôre nö im Mā Tēv.

²²A Ngaich ang Hesikia nö vë-ekūö cha nö haruhkö alaha cha yik Lēvi mahameuktö huneū-enre nö i la-en ngam Mā Tēv. B Nyā-aṅvkūö ngaich yik tarik tö aṅ im tökiröng sakāmö nö satsumkam, kētö inlāmö tökētu ha-öiny ngam Mā Tēv inrē ngam Tēv yik yöng cha.

²³Ngaich ṙòkhöre yik tömūl nö hō-olōn tö inköpken ngam tökiröng nyinā-aṅ nö sattöre tahëng sakāmö; lökten cha nö haköpken e im tö sattöre tahëng sakāmö nö holtö ṙanāmölōnre.

²⁴Ngaich ök rācha Hesikia aṅ Yūtā nö kē-ĕkūö yik tömūl tö töhĕng köṅny kōiny nuā sat köṅny inrē sīṅp tökētu, hĕng köṅny kōiny nuā kahëtö yik kūön rācha nö in yik tömaṙôngö söm köṅny sīṅp inrē. Ahetlöre ngaich yik kūönṙô nö pōyen.

²⁵Ṙòkhöre yik tömūl aṅ Yūtā, tö yik kūönṙô Lēvi inrē, ṙòkhöre inrē yik tömūl yamih nö ṙā-ang Israĕl, yik törahëchtakūö yamih inrē nö ṙā-ang panam Israĕl, yik törahëchtakūö inrē mi-iyöng Yūtā, nö ṙāmölōn.

²⁶Lökten nö kirööngen ök ṙanāmölōn nö i Yērusalem, pòn hēngen tö ṙētak Sòlòmön ök kikōnyö kūön Tāvit rācha aṅ Israĕl nö öt töngatī-ivö nö i Yērusalem tö sā ngih.

²⁷Ngaich yik kūönṙô tö yik Lēvi nö choholre nö hakôlò yik tarik, hāngö nuk ṙô cha, nup ṙô tarik, hāngö nuk ṙô cha, nup ṙô cha inrē nö havë-a nö söllö nö im töhet elyöngö el halīöngö.