Read Car_Nicobarese 2 KINṘÖTNGÖ 31 Bible Online

2 KINṘÖTNGÖ 31 - Car_Nicobarese bible

2 KINṘÖTNGÖ 31

¹Hē kinheūṅten në nö ṙòkhöre, ṙòkhöre yik aṅ Israĕl mu-umuh nö kiröönngöre nö i nuk elpanam Yūtā ngaich pinyëny nuk machöḵlö nö likölngö u kūöltö nuk Asērim inrē tiṙölngö nuk lātulöng chūökö inrē tö nuk tahāklö keuheūt nö i Yūtā Penyamin inrē, i Ifrēm, Manasē inrē, hanöng saha tī cha nö hatngö tī nö ṙòkhöre. Ṙòkhöre ngaich yik tarik Israĕl nö havantöre nö i nuk elpanam cha, kö chuh i nuk inlānenre cha-a.

²Ngaich Hesikia nö vīlö ök tūmö milā-a ök i kūönṙô tö yik Lēvi inrē, kö i milā-a, kö i nuk la-enre, yik kūönṙô tö yik Lēvī, nö i töföngö tökētu i inlāmö inrē tökētu, i mineukṙen i kūö inkūp öp elyöngö ngam Mā Tēv ha-öiny inrē.

³Nuk tī ngam rācha aṅ i nuk inlānen ò nö lamöö i töföngö tökētu: töföngö tökētu tö peuheū tö harap inrē, töföngö tökētu inrē hē el töhet sakāmö, tufömngöre chingëṅt, töhalēnlöng tökiröng nyinā-aṅ inrē, sā kinūichngö e nö im chöngö ngam Mā Tēv.

⁴Ngaich anga-aṅ nö kētö chöngö yik tarik mī-iyöng Yērusalem nö kētö minchöö-ö yik kūönṙô tö yip Lēvi inrē, pòn hōtu cha-a nö kētöre nö im chöngö ngam Mā Tēv.

⁵Hē ngam chöngö nö ngaich nö paratiyö, ngaich yik tarik Israĕl nö pōyen kahëti tö lanòh ṙòng chōn sāiny inrē, vain, tavī-i, hönī, ṙòkhöre inrē nup samīöp aṅ panô-òṅ pōyen kum cha-a ngaich tö töhĕng i tösöm i tökeuheūtlöre mihëṅṙö.

⁶Ngaich yik aṅ Israĕl aṅ Yūtā inrē yik mi-iyöng kūö nuk elpanam Yūtā inrē nö kētö töhĕng i tösöm nuā, sīṅp inrē ngaich minë tökētu chehen nö tö ahetlöngö nö im Mā Tēv cha, ṙātö u ngaich cha-a nö fônghaka.

⁷Im linūöyö chingëṅt cha-a nö rultenre nö afônghanga, ngaich keuheūtngen u im sinātö chingëṅt.

⁸Hē Hesikia tö yik kūön rācha nö yih ngaich meuk nuk tö fônghaka, hakôlò ngam Mā Tēv cha-a ngaich hakôlò yik tarik Israĕl inrē.

⁹Ngaich Hesikia nö hatön yik kūönṙô tö yik Lēvi tö kūö minë töfônghaka.

¹⁰Ngaich Asariā ök mākūö kūönṙô, ök aṅ patī Satòk, nö sap ṙô ò, Hē ranulten cha nö kētö nup tī cha nö el patī ngam Mā Tēv nyā-aṅvkūö īhö ngaich kô-òng kūö inrē ngaich pōitit tö ōtre; pò ngam Mā Tēv nö hakôlò vē tarik ò, lökten in aṅhāṅv-in tö töpōitit tö hachūöki.

¹¹Ngaich Hesikia nö kētö chöngö cha nö halēn urôhò nö el patī ngam Mā Tēv; halēnö u cha-a ngaich.

¹²Ngaich cha-a nö öt michūḵṙen nö kētö nuk tīre, töhĕng i tösöm tökētu inrē chehen. Ök yöng kūö mā yōm u ang Kônania ök Lēvi, holten Simei ök mak alaha ò nö innëtö;

¹³Yēhi-el pöri Asaria, Nāhat, Asahel, Yērimòt Yôsapat, Elī-el, Ismakiyā, Mahāt, Pënayā inrē yōm mineūkṙen nö holṙen Kônaniya Sime-i inrē ök mak alaha ò, i chöngö Hesikiā ök rācha, Asarīa inrē ök yöng kūö mā ngam patī ngam Tēv.

¹⁴Kōrē inrē ök kikōnyö kūön Imna ök Lēvi, yōm ök lā chuhöt inkūp, i kui nuk kanahanglōn tökētu tī hanöngken ngam Mā Tēv, nup tölngö töhet tökētu inrē.

¹⁵Ēten, Miniyamin, Yēsua, Simayā, Amariyā, Sikēniya inrē, vē tökô-en hamòlṙen ò nö i nup elpanam yip kūönṙô nö katöl nup minchöö-ö yip hol cha, tököṅnyu tö-ayal inrē, nö sā minchööḵlö cha,

¹⁶Höng yip tökaheuklöng nö löktökūö lökngörītre, kikōnyö löktökūö tölūöi samyeūheu ṙēti söl tulöng inrē, ṙòkhöre yip kumhēthötre nö el patī ngam Mā Tēv nö la-en tö la-en töhĕng sakāmö, nö i nup la-en cha sā kamngö chūök cha, i minchööḵlö cha.

¹⁷Öp kinṙeuklö yip kūönṙô asā patī yik yöng cha, in yip Lēvi löktö kūö tö nët anāi samyeūheu ṙēti söl tulöng nö sā kamngö chūök la-en cha, i minchöḵlö cha.

¹⁸Kaheuklöng yik kūönṙô nö holre tö kūönre, tö pīhö cha kūön cha kikōnyö kūön cha inrē kikānö, ṙòkhöre yik tömaṙôngö, pò cha nö kô-en nö haköpöre nö het.

¹⁹In yip kikōnyö kūön Āròn inrē, yip kūönṙô, yip më-el nup panô-òṅ mikahlōn nup elpanam cha, tarik yik umuh i nuk töṙōl elpanam töminënyu nö halēniṙen nö katöl minchöö-ö töhĕng tak tarik in yik kūönṙô kö kahĕng tak inrē in yik Lēvī yik tökaheuklöng.

²⁰Ngatī tī Hesikia nö keuheūtngöre chūök nö i Yūtā, la-evṙen inrē anga-aṅ tö tölöök töchip inrē kô-en inrē nö i kūö ngam Mā Tēv ngam Tēv ò.

²¹Ṙòkhöre nup la-en ò nup kahëken ò nö i la-en ngam patī ngam Tēv nö sā ngam chöngö tö minë inchöngten inrē, chöh ngam Tēvre, hol tö ellōnre anga-aṅ nö la-evṙen, ngaich kôlò.