Read Car_Nicobarese 2 KINṘÖTNGÖ 32 Bible Online

2 KINṘÖTNGÖ 32 - Car_Nicobarese bible

2 KINṘÖTNGÖ 32

¹Unôichrit në la-en ök tökô-en Senakerīp rācha aṅ Asiriā yih nö kayīngö Yūtā iyöng töre ngaich nö la-al nup tömihôiṅ tö u tö lōnre.

²Ngaich hē Hesikia nö meūkö Senakerip nö yih nö hòṅ kiyung nö lā-al Yērusalem,

³Halēn yik yöng kūö kumyungre anga-aṅ tö yik tökalēḵ tarik ò inrē nö löpngökūö ök mak töhëmlö ök lā-el kahôiyö tök elpanam; ngaich cha-a nö holṙen ò.

⁴Pōiyen yik tarik nö hamūlöre ngaich cha-a nö löpngökūö nuk töhëmlö mak tö nuk kun töhëm mak lamök im panam, ngö ṙô, Kūöyòh yip min rācha aṅ Asiriā nö yih ngaich pōyen kanôtö kūö tö mak?

⁵Rultöre anga-aṅ ngaich nö la-evṙen nö kalē-ĕlōn ngaich katöplö kinlōngö nup tötaṙöli, asöklö chūök chamônga i kui e inrē, lā-el kahôiyö tö e inrē anga-aṅ nö katöplö ök Mīlō inrē anga-aṅ elpanam Tāvit. Vī aṅtī inrē anga-aṅ lanaklö inrē nö pōyen

⁶Ngaich anga-aṅ nö vīlö yöngṙen maharun i kinyūngö nö in yik tarik, hamūlten cha ngaich nö in ò nö el ök töluvë-aka nö ik inkūp ök elpanam ngaich vë-ekūö cha nö hangë-el alaha cha, nö ngö ṙô,

⁷Hangë-eṅre yin ui pa-ekūö. Uh yin pa-ekūö hēk ui ngangngö kūö i kūö öp rācha aṅ Asiriā yip tömaṙôngö hol ò inrē; tön hĕng tak öp tökiröng in hī töp in ò.

⁸In ò ap aṅtī nöng alaha; in hī pöri ngam Mā Tēv ngam Tēv hī inrē. Nyatlö alaha ngaich yik tarik tö kūö minë ṙô Hesikia ök rācha aṅ Yūtā.

⁹Unôichrit ngih ang Senakrip ök rācha aṅ Asīrīā ök töṙònghöichṙen nö havīlen Lakis nö holtö yik kumyung in ò, nö tīnngö tarikre nö i Yērusalem nö in Hesikia ök rācha aṅ Yūtā in yik tarik aṅ Yūtā inrē nö ṙòkhöre mī-i Yērusalem, nö ngö ṙô,

¹⁰Ngö ṙô ap Senakerip rācha aṅ Asiriā, Ikui yòh öm më-eṅ hayönglenre, töp lökten meh kô tök invīngö Yērusalem?

¹¹Röh ap Hesikia nöng halō-ongkūö yīö, pò yīö hōtu kapah tökūö inyāichö inṙehe nômö inrē, i saha ò nö ngö ṙô, Ṙānyen hī an min ngam Mā Tēv ngam Tēv hī ṙā-ang eltī öp rācha aṅ Asīria?

¹²Röh ang nö ngòh Hesikia kamëngö nuk lātulöng chūökö tö nuk tahāklö ò inrē ngaich tölṙô Yūtā, Yērusalem inrē, Ikūö töhĕng man tahāklö min salām, i kui e inrē më-eṅ föng tökētu?

¹³Öt akahalōn ömeh tö tī chu, yik yöng chu inrē tö yik tarik aṅkūö nuk tahëng panam? Kô yip tēv yip pumnāmö tarik i nup panam nö ṙānyö nup panam cha nö ṙā-ang eltī chu?

¹⁴Achīö ap i yip tēv yip pumnāmö tarik yik tö ahāti tö yik yöng chu tökô nö ṙānyö yik tarikre nö ṙā-ang eltī chu, Tö ngam Tēv yīö min nö kô nö ṙānyen yīö ṙā-ang eltī chu?

¹⁵Lökten töngamuh un hökiṙen Hesikia nö hachilö yīö hēk halō-ongkūö yīö nö ngatī inlahen, ui ṙātö ellōnre inrē in ò, tön öt hĕng tak tēv vē pumnāmö tarik hēk pūlngö töngaich nö kô nö ṙānyö tarikre nö ṙā-ang eltī chu, hēk ṙā-ang eltī yik yöng chu. Höichngen ngam Tēv yīö min nö ṙānyen yīö nö ṙā-ang eltī chu.

¹⁶Pōyen ṙô yik tarik ò nö lā-al kūö ngam Mā Tēv, lā-al kūö ök tarik ò inrē Hesikia.

¹⁷Kūich līpöre ngaich anga-aṅ inrē nö inyëngen ngam Mā Tēv ngam Tēv Israĕl chōchö ṙô inrē tö ò, nö ngö ṙô, Sā nup tēv yip pumnāmö tarik yip töt ṙamānyö tarikre nö ṙā-ang eltī chu, ngatī ngam Tēv Hesikia min nö ötṙānyö vē tarikre nö ṙā-ang eltī chu.

¹⁸Hūnyôre cha-a tö e pōitô nö i ëlô aṅ Yūtā nö in yik tarik i Yērusalem yik mī-ikui ök kinlōngö, nö pinhë-eṅlkūö hangāgö cha inrē, pò cha nö hòṅ kē ngam elpanam.

¹⁹Ngaich cha-a nö kakken ngam Tēv Yērusalem nö sā ṙôre tö nup tēv vē tarik aṅ ngih tumlat, nup vahīṙen kuntī tarik.

²⁰Ngaich Hesikia ök rācha Isayā inrē ök pròfĕt, ök kikōnyö kūön Amôs, nö vë-ekūötēv tökūö ngih, ngaich peuinyhökūö ngam halīöngö.

²¹Tīntö ma-ahāṅnga ngaich ngam Mā Tēv, ök famëlngö yik tökalēḵ kumyung tö chöngu inrē tö yik mā kūö ik elyöngö ök aṅ Asiria. Havantöre ngaich anga-aṅ nö i panam nö holtö sumrōngkūö re. Ngaich hē ò nö kuhēthötre nö el patī ök tēv ò, rīkre yik kikōnyö kūön ò samapngen ò nö aṅtī tö sanët.

²²Ngatī inlahen ngam Mā Tēv nö hayöölen Hesikia tö yik aṅ Yērusalem inrē nö ṙā-ang eltī Senakerip rācha aṅ Asīria, ṙā-ang eltī yik lā-al ò inrē ngaich anga-aṅ nö kētö haneūheu cha nö keuheūtngöre lā-a.

²³Maṙôngö ngaich yik tökumtö inlōnti nö im Mā Tēv nö i Yērusalem töpōi ṙai chehen inrē kum cha nö in Hesikia rācha aṅ Yūtā, lökten ò nö pōiyö nö i kūö yik pumnāmö tarik hēten tö e söl unôich inrē.

²⁴Hē nuk sakāmö anū-ö ang Hesikia nö vahavö ngaich nö hòṅ kapah, ngaich anga-aṅ nö vë-ekūö ngam Mā Tēv; sapṙô ò ngaich anga-aṅ kē-ĕ kūö ò inrē tö minkahngö.

²⁵Hö-ö pöri Hesikia nö havahal nö sā nuk inkôlò tökētu nö in ò, pò ò nö hakeūlenre ellōn. Lökten ngam lanīnö nö yih nö in ò i Yūtā, Yērusalem inrē.

²⁶Hayāichngöre pöri Hesikia tök inkeūlen ellōnre, anga-aṅ tö yik aṅ Yērusalem inrē lökten ngam lanīnö ngam Mā Tēv nö öt yih nö i kui cha hē Hesikia.

²⁷Pōyen kanôlò ngaich Hesikia ineū-eu inrē; ngaich nö vī chūök tīre tö rupīö, humlum, töpōiṙāi ihong, tötahūsa, lanaklö, nuk tö keuheūttöre mihëṅṙö inrē chūökṙen töpōiṙāi:

²⁸Patī inrē chūök inchūökngö ṙòng sāiny, vāin, tavī-i; chūök nup tökeuheūttöre mihëṅṙö töṙeūla inrē, kinlōngö sīṅp inrē.

²⁹Vīlö elpanam inrē anga-aṅ, pōyen inrē nuk sīṅp pököre inrē; pò ngam Tēv nö kē-ĕkūö ò tö töpōyen inlānen.

³⁰Anga-aṅ ngòh Hesikia lamöpngö kūö ök lātulöng löknyö mak i Kīhòn ngaich hachōngökūö u nö lātaṙeū lā sūng kaha öp elpanam Tāvit. Kôlòṙen, ang Hesikia nö i nup la-enre.

³¹Ngatī inrē in yip ma-ahānga in yip kūön rācha aṅ Pēpīlön yik tö tīntu nö in ò nö hatöntöre tö minkahngö nuk töngaich nö im panam, hökngen ò ngam Tēv nö kahngenre, pòn hòṅ kalahan ane inrē hòṅ akahalōn tö nup ellōn ò.

³²Nup tö ōtngöre inlahen Hesikia, tö nup tölöök la-en ò, Yĕh meuk, kūichiyö nuk in öp tömeūkö tö Isāya ök pròfĕt kikōnyö kūön Amôs, i mat Līpöre yik rācha aṅ Yūtā, Israĕl inrē.

³³Haṙòh ngaich Hesikia nö in yik yöngre, lāpngen ò cha-a ngaich nö i paneūlö nup kui kupah yik kikōnyö kūön Tāvit; ngaich yik aṅ Yūtā aṅ Yērusalem inrē nö ineū-euṅvtī tö ò ik kinpaha ò. Ngaich ök kikōnyö kūön ò Manasē nö ṙënngen ò nö hayöng.