Read Car_Nicobarese 2 KINṘÖTNGÖ 33 Bible Online

2 KINṘÖTNGÖ 33 - Car_Nicobarese bible

2 KINṘÖTNGÖ 33

¹Nët sīön höiny samyeūheu ṙēti Manasē hē ranulten ò nö hayöng, ngaich hayöng anga-aṅ nö taneui anāi taneui samyeūheu nö i Yērusalem.

²La-evṙen anga-aṅ tö tötlöök nö i kūö ngam Mā Tēv, tö tösā harunten yip pumnāmö tarik sin-òkkūö yik tö ahōṙi tö ngam Mā Tēv nö i kūö yik tarik Israĕl.

³Pò ò nö hēk nö vīlö nuk lātulöng chūökö nuk tö tiṙōli tök yöng ò Hesikia, vīlö tahāklö Pē-al inrē, ngaich vīten Asērā, salām nup el halīöngö inrē, nö lök la-en u.

⁴Vīlö tahāklö anga-aṅ inrē nö el patī ngam Mā Tēv, ngam ṙô ngam Mā Tēv nö ngö ṙô, I Yērusalem ap min minënyö chu nö örheūheu.

⁵Vītö tahāklö nup el halīöngö inrē anga-aṅ nö ël nup tö nët elmilūkö ngam patī ngam Mā Tēv.

⁶Föng yik kūön re anga-aṅ kikōnyö nö tökētu el achāṙö ök kikōnyö kūön Hinôm, mu-ulòhtenre inrē nö vë-eny yanihih mu-unôich, i chinòng alaha vinīngen, ngaich lök alaha mineuk sī-ö inrē. Ngaich la-envö anga-aṅ tö tötlöök nö kūö ngam miliūönö nö pōyen nö harunnyö lanīnö ò.

⁷Ngaich ök insātēv vahī ò nö asöklöng nö el patī ngam Tēv ngam patī ṙô ngam Tēv nö in Tāvit ik kūön ò inrē Sòlòmön, nö ngö, El ngih patī, i Yērusalem inrē, ngam atöllö chu nö i nup miyöngö Israĕl nö ṙòkhöre, öich ṙātö öp minë-enyre nö örheūheu;

⁸Ngaich chū-ö min öt hēk kēngö röön Israĕl nö ṙā-ang im panam ngam hateungngen chu tö pò kūö yik yöng yīö, yē cha öre min nö ṙēmen nö la-evṙen tö nup hachöngten chu in cha, ṙòkhöre chöngö, inchöngten, chöngö inrē tökētu nö lökten in Môsös.

⁹Haṙöingen Yūtā ang Manasē tö yip aṅ Yērusalem inrē, lökten cha nö ṙūöhölre la-en tö tötlöök nö mötlö tö yip pumnāmö tarik yik tö ahātiyö tö ngam Mā Tēv nö i kūö yik Israĕl.

¹⁰Vë-ekūö Manasē ngaich ngam Mā Tēv yik tarik ò inrē, hö-ö pöri cha-a nö kūötenre.

¹¹Lökten ngam Mā Tēv nö kētö kui cha tö yik töchöngu aṅ i yip kumyung in ök rācha aṅ Asīria, yik kamë-eṅ Manasē nö aṅtī tö vòk halökan inrē tö mās ngaich kēten ò nö i Pēpilön.

¹²Ngaich hē ò nö kihngen havëkö inṙē-ĕlre ngaich anga-aṅ nö im Mā Tēv, ngam Tēv ò hayāichngöre inrē nö i kūö ngam Tēv yik yöng ò.

¹³Vë-ekūö ò anga-aṅ, ngaich ngam Tēv nö hō-o ṙô ò nö vë-ekūö ò hang ök ṙô ò inrē vinë-elkui ngaich kēten ò nö hēk nö i Yērusalem ik pūlngö ò. Möl Manasē nö akahakūö tö ngam Mā Tēv nö Tēv.

¹⁴Unôichngöre anga-aṅ nö katöplö ök lā-uk kinlōngö ök elpanam Tāvit lā sūng tö Kihòn, elpanam i Yūtā.

¹⁵Kē nuk tēv inrē anga-aṅ aṅ tahëng ök insā tēv inrē nö ṙā-ang el patī ngam Mā Tēv, ṙòkhöre inrē nuk tahāklö vahīlö ò nö i kui nuk rôngö ik patī ngam Mā Tēv i Yērusalem, ngaich kavalngö u anga-aṅ nö lā uk ök el panam.

¹⁶Vītit ök tahāklö ngam Mā Tēv inrē anga-aṅ, ngaich ël e nö kētö tökētu inlāmö nöinytö tī inrē; ngaich anga-aṅ nöchöngu tö Yūtā nö lök la-en ngam Mā Tēv ngam Tēv Israĕl.

¹⁷Höng söönen pöri yik tarik nö kētö tökētu nö el nuk lātulöng chūökö, im Mā Tēv pöri ngam Tēv cha.

¹⁸Nup tö ōtngöre inlahen Manasē, ök invë-a inrē tö ò nö im Tēv ò, tö nup ṙô yik mameuk vamë-eṅkūö ò nö i minë-eny ngam Mā Tēv Israĕl Yĕh meuk i mat nup kinṙötö yik Rācha aṅ Israĕl nuk.

¹⁹Ök invë-a tö ò inrē tö inlahen ngam Tēv inrē nö hō-oṙô ò, ṙòkhöre nuk tökööl ò öt kanô-en ò inrē, tö nuk lā-atī ò nö vīlö nuk lātulöng chūökö insöklö Asērim inrē tö nuk insātēv urēhĕkūö ò nö hayāichngöre yĕh meuk, kūichiyö nuk nö i mat Kinṙötö yip Mameuk.

²⁰Haṙòh ngaich Manasē nö in yik yöngre, lāpngen ò cha-a ngaich nö el patī ò; ngaich ṙënngen ò nö hayöng ang Amön ök kikōnyö kūön ò.

²¹Nët anāi nët samyeūheu ṙēti ang Amön hē ranulten ò nö hayöng, nët samyeūheu anga-aṅ nö hayöng nö i Yērusalem.

²²La-evṙen anga-aṅ tö tötlöök nö i kūö ngam Mā Tēv, sā la-en ök yöngre Manasē. Kētö tökētu Amön nö i nuk insātēv nö ṙòkhöre nuk vahīlö ök yöng ò Manasē, ngaich lök la-en u.

²³Ngaich rö-ö anga-aṅ nö hayāichngöre, ngaich pöri ngòh Amön nö ṙūö ṙūölö fālenre.

²⁴Ngaich yik tarik ò nö ulāikö lōnre nö lā-al ò ngaich fëlngen ò nö el patī ò.

²⁵Ngaich pöri yik tarik ngam panam nö fëlngen cha yik mu-ulāikölōnre nö lālö Amön; ök rācha; Vīlen Yôsiyā inrē yik tarik ngam panam ök kikōnyö kūön ò nö ṙënngen ò nö rācha.