Read Car_Nicobarese 2 KINṘÖTNGÖ 35 Bible Online

2 KINṘÖTNGÖ 35 - Car_Nicobarese bible

2 KINṘÖTNGÖ 35

¹Ngaich ang Yôsiyā nö haköpkö ngam chinööḵngö nö im Mā Tēv, i Yērusalem; ngaich cha-a nö ṙatnyö likeun tötāli sīṅp nö im chinööḵngö im finënsīön sakāmö ngam raneh chingëṅt.

²Halēnlö yik kūönṙô anga-aṅ nö el chūökre ṙūöhöl alaha cha inrē nö i la-en ngam patī ngam Mā Tēv.

³Ngö ṙô anga-aṅ tö yik Lēvi yik mahaköptö yik Israĕl nö ṙòkhöre yik töhet inrē nö im Mā Tēv, Ṙātö ngam töhet kasòng el ngam patī ngam vahīlö Sòlòmön ök kikōnyö kūön Tāvit, rācha aṅ Israĕl; kô-òren yin öt keūnö e nö el ranôṙö yīö. Yĕh ngaich yin lök la-en ngam Mā Tēv ngam Tēv yīö yip tarik ò inrē Israĕl.

⁴Halēnöre yin sā mitī-i yik yöng yīö inchōten yīö tö Tāvit ök rācha aṅ Israĕl inchōten yīö inrē tö Sòlòmön ök kikōnyö kūön ò.

⁵Sökhak inrē el ngam töhet chūök öi sā inmūlngö patī yik yöng yik hol yīö töng tarīkaṙa, hökngen e nö lumnööṙö tö hĕng tak hĕng Lēvi.

⁶Ṙātnyö likeun ngam tötāli sīṅp chinööḵngö, ahetlöre yī-ö inrē, halēn yip hol yīö inrē, nö la evṙen asā ṙô ngam Mā Tēv nö in Môsös.

⁷Ngaich Yôsiyā nö tītö tötāli sīṅp tökūöṅnö inrē aṅ in nup tökiteūmhaka nö lūöi anāi köṅny, lūöi köṅny kōiny nuā inrē, tī ò in yip töng tarīka mū-umuh nö tökētu nö im chinööḵngö; aṅ in nuk chehen ök rācha nun anū-ö në.

⁸Ngaich yik kūön rācha in ò nö hōḵ nö meukṙen yik tarik yik kūönṙô, tö yik Lēvi inrē. Hilkiyā, Sakariyā, Yēhi-el inrē, tö yik mākūö ngam patī ngam Tēv nö kē-ĕkūö yik kūönṙô tötökētu nö im chinööḵngö nët köṅny tafūölòng tö tāli sīṅp tökūöṅnö inrē lūöiyòng kōiny nuā inrē.

⁹Kônaniya inrē, Simayā, Natanĕl inrē yik mak alaha ò, Hasapiyā, Yē-i-el, Yôsapāt inrē, yik yöng kūö yik Lēvi, nö kē-ĕkūö yik Lēvi tö tökētu im chinööḵngö taneui köṅny tötāli sīṅp tökūöṅnö inrē taneūyòng kōiny nuā inrē.

¹⁰Hē ngam la-en nö ngaich nö lēn, sökhak ngaich yik kūönṙô nö i chūökre, yik Lēvi inrē nö i minchööḵlöre sā chöngö ök rācha.

¹¹Ngaich cha-a nö ṙatnyö likeun nuk tötāli sīṅp nö ik chinööḵngö, ngaich yik kūönṙô nö kicheny nuk mahām nuk kahë cha nö in cha i sāha yik Lēvi nö leūch nuk töfëli.

¹²Ngaich cha-a nö haköhngen töföngö tökētu pò cha nö hòṅ michööḵngö u nö sā manūlö patī yik yöng yik töng tarīkaṙa, nö kahëtö cha nö im Mā Tēv, sā kinūichngö e nö i mat Līpöre Mösôs. Ngatī tī cha-a inrē nö i nuk kōiny nuā.

¹³Harang ngam tötāli sīṅp ngam chinööḵngö cha-a nö i kūö tameūiyö nö sā ngam chöngö; ngaich cha-a inrē nö sum nup töhet tökētu nö el tanīöyö, el kaltīròng, el törah inrē, ngaich ka-eūyen nö kētö u nö in yip töng tarīkaṙa.

¹⁴Ngaich unôichngöre cha-a nö halēn nyā-aṅkūöre tö yik kūönṙô inrē, pò yip kūönṙô yip kikōnyö kūön Āròn nö lūöichlen i kinëtö töföngö tökētu nup tösangöö inrē nö söl hatööm; lökten yik Lēvi nö halēn nyā-aṅkūöre nyā-aṅkūö yik kūönṙô inrē kūön Āròn.

¹⁵Yik tumkökṙôre, yik kikōnyö kūön Asaf, nö i chūökre sā chöngö Tāvit, Asaf, Hēman. Yētutun inrē ök mameuk nö ik rācha; yik yōm kūö inkūp inrē nö kö i nuk inkūp; öt hòṅ kiröönngöre cha-a nö ṙā-ang im la-en cha, pò yik hol cha yik Lēvi nö halēn nyā-aṅkūö cha.

¹⁶Ṙòkhöre ngaich nuk la-en ngam Mā Tēv nö halēnö ik sakāmö angū-ö, nö inköpkö ngam chinööḵngö, kētö töföngö inrē nö el tahāklö ngam Mā Tēv, sā chöngö ök rācha Yôsiyā.

¹⁷Ngaich yik tarik aṅ Israĕl yik mū-umuh nö haköpkö ngam chinööḵngö hē e ngam tökiröng nyinā-aṅ tötaföhlöng rôti inrē nö sat sumkam.

¹⁸Öt töngatī-iv chinööḵngö tösā e töhaköpka nö i Israĕl hēten tö nuk sakāmö Samu-ĕl ök pròfĕt; öt hĕng tak yik rācha Israĕl mahaköpkö töngatī chinööḵngö nö sā Yôsiyā, tö yik kūönṙô, Lēvi inrē ṙòkhöre Yūtā, Israĕl inrē yik mū-umuh, tö yik aṅ Yērusalem.

¹⁹Im hinëvhöre sīön samyeūheu Yôsiyā nö hayöng ngih chinööḵngö nö haköpka.

²⁰Unôichrit ngih ngaich, hē Yôsiyā nö halēn ök tempöl, ang Nikō rācha aṅ Aikup nö kiröönngöre nö kiyung nö i Karkēmis i kui Yūfratīs ngaich Yôsiyā nö kiröönngöre nö lā-al ò.

²¹Tīnngö ma-ahānga pöri anga-aṅ nö in ò, nö ngö ṙô, Asuh ap la-en hā in höö, më-eṅ rācha aṅ Yūtā? Rö-ö chin yih lā-al meh töngamuh, lālö ngam patī pöri ngam lā-al chu i kinyūngö; ngaich tölô chū-ö tö ngam Tēv öich hōtu kurāten. Ṙāngenre man harah kūö ngam Tēv, ngam mi-in chu, hòṅ ò nö öt fëlngen meh,

²²Hö-ö pöri Yôsiyā nö hòṅ havöökūöre nö ṙā-ang in ò, harīkngö inlahare pöri pò ò nö hòṅ kiyung nö lā-al ò. Öt hang minë ṙô Nikō anga-aṅ ṙamā-ang elvāng ngam Tēv, kiyung pöri ngaich nö i Mëkītō ök töṙā-akūö panam.

²³Liṙënyö ngaich ök rācha Yôsiyā tö yik lumreny; ngö ṙô ngaich ök rācha tö yik tarik ò, Kēngen chu, tön ngaich chin pōihangṙen.

²⁴Ngaich yik tarik nö kēngen ò nö ṙā-ang el ök inröl ngaich keunngen ò nö el ök innëtö inröl kēten ò ngaich nö i Yērusalem. Kapah ngaich anga-aṅ, lāpi ngaich nö i kui kupah yik yöng ò. Ṙòkhöre ngaich Yūtā, Yērusalem inrē nö haṙīvhen Yôsiyā.

²⁵Harāmö Yôsiyā inrē ang Yarimiā; ṙòkhöre yik tumkökṙôre tarik kikānö inrē nö kakken Yôsiyā i ṙô cha nö harāmöre söl ing töngamuh. Vīten u cha-a nö chöngö nö i Israĕl; Yĕh meuk; kūichiyö nuk nö i nup Inrāmöre,

²⁶Nuk tö ōtngöre inlahen Yôsiyā tö nuk tölöök la-en ò inrē nö sā nuk tökūichö im chöngö ngam Mā Tēv.

²⁷Nuk la-en ò inrē raneh manā-aṅ inrē, Yĕh meuk, kūichiyö nuk i mat Līpöre yik Rācha aṅ Israĕl, Yūtā inrē.