Read Car_Nicobarese 2 KINṘÖTNGÖ 4 Bible Online

2 KINṘÖTNGÖ 4 - Car_Nicobarese bible

2 KINṘÖTNGÖ 4

¹Ngaich anga-aṅ nö vīlö tahāklö tö mās, nët anai sumkôngö (27 Mtr) rôta, nët anāi sumkôngö (27 Mtr) ṙôktāk inrē, ngaich söm sumkôngö rôlö 4.50 Mtr.

²Ngaich anga-aṅ inrē nö vī insā mai tö tömiyëṙi mās; chuvī angū-ö, söm sumkôngö nö i tölngö taseū e taneui sumkôngö (4.4 Mtr) rôlö inrē, ngaich ök chinvīṙö e nö lūöi anāi sumkôngö kinlaha (13.2 Mtr).

³Elkatòh e nuk insā katū, lūöi anāi sumkôngö, vinngö nö havīlö ngam mai; nët mitöökö nuk katu tövī-i hē e nö vī-i.

⁴Sökhak angū-ö nö i uk nuk tö nët sīön nòng kōiny nuā, lūöi nòng kū-ötö lā kapā, lūöi nòng kū-ötö lā sūng, lūöi nòng kū-ötö lā chuhöt; töönglöngö ök mai nö i uk u ngaich ṙòkhöre nup lārit u nö lā tuhēt.

⁵Sā ṙôktāk eltī (75 Mili Ltr) ök kinfëyö e; ök taseū e inrē nö sā taseū kōp vinī-i, sā pūl ṙòng lilī; lūöi köṅny pāt aṅ angū-ö.

⁶Sömö vahī inrē anga-aṅ tö chūök tī samöichöre, ngaich taneūiyö ṙahāti nö lā lòhngö, taneui lā kapā ël u tī cha-a nö kichavngö nup mak tī cha nö föng tökētu, ngaich ök mai nö chūök yik kūönṙô nö söichöre.

⁷Sömö vahī anga-aṅ tö humlum chūök rööntö ëāṅvö nö sā insōkngenre, ngaich asöklö u nö el ök tempöl, taneui lā lòhngö taneui inrē lā kapah.

⁸Sömö vahī inrē anga-aṅ tö mīs, ngaich ṙātö u nö el ök tempöl, taneui lā lòhngö taneui inrē lā kapā. Hēngòng vahī inrē anga-aṅ tö humlum pēsön.

⁹Vī el milūkö yik kūönṙô anga-aṅ, tök tökiröng el milūkö, inkūp ök el milūkö inrē, ngaich hatāptö mās nö i nuk inkūp;

¹⁰Ngaich anga-aṅ nö ṙātö ök mai nö lā lòhngö chuhöt sinkeukngö ök patī.

¹¹Vī tanīöyö inrē Huram, sānël, tö nuk pēsön inrē. Keuheūten ngaich Huram tök la-en ò nö in ök rācha Sòlòmön nö ik patī ngam Tēv.

¹²Tö nuk tö nët machöḵlö tö nuk töchilū pingāṅl tö nuk tö nët inrē tulkui el kui nuk machöḵlö; nuk tö nët inrē tö sā mat inhāṅl i ṙòng nuk tö nët töchilū pingāṅl i nuk tulkui nuk më-el kui nuk machöḵlö;

¹³Nuk töfënòng anār inrē nö mi-i nuk tönët tö sā mat inhāṅl, nët mitöökö nuk anār i töhĕng mat inhāṅl nö i nuk tönët töchilū pingāṅl nuk tulkui i kui nuk machöḵlö.

¹⁴Vī insök anga-aṅ inrē, i kui nuk insök nuk chūökti samöchöre,

¹⁵Tök töhĕng mai, tö nuk tö nët sīön nòng kōiny nuā el katòh e.

¹⁶Nuk tanīöyö, nuk sanël, nuk lanòk, ṙòkhöre inrē nuk chehetī in u vahī Huramapī nö tö amëla mās nö lumnööṙö ök rācha Sòlòmön nö im patī ngam Mā Tēv.

¹⁷Im töṙa-akūö panam Yôtön ök rācha nö vī-i u, ik tilin ihôi Sakòt tö Sēreta,

¹⁸Vī në chehen inrē Sòlòmön nö pōiyen, lökten ök lumngan nuk mās nö öt kaheūkka.

¹⁹Lökten Sòlòmön nö vī nuk chehen el patī ngam Tēv: ök humlum tahāklö, tö nuk mīs chūök rôti tö hameuktu,

²⁰Nuk insök ëāṅvö tö nuk ëāṅvö inrē nö humlum nyöre nö hūṙökūö nö ël ök lātuhēt el ök töhet chūök, sā isōkngen e;

²¹Nuk pūl, nuk ëāṅvö, tö nuk tôpö inrē, nöng humlum nyöre;

²²Nuk innyangngökūö ëāṅvö, pēsön, pingāṅl tötahūsa, tāng tameūyö, nöng humlumnyöre; nuk löp im tempöl, mī-i nup lā tuhēt inkūp ngam tölngö töhet chūök i nuk inkūp ök el milūkö ök tempöl nöng humlumnyöre.