Read Car_Nicobarese 2 KINṘÖTNGÖ 6 Bible Online

2 KINṘÖTNGÖ 6 - Car_Nicobarese bible

2 KINṘÖTNGÖ 6

¹Ngaich ngö ṙô Sòlòmön, Ngö ṙô An ngam Mā Tēv tö ò nö hòṅ iyöng el sinngūlö tö kufëi, ūichhak inrē el kantēra Israĕl,

²Ngaich chin mānlö patī meh tö tö hapōilöng, chūök meh örheūheu iyöng.

³Havöötö kūöre ngaich ngam rācha, ngaich hakôlò yik tömūl Israĕl, i saha yik tömūl aṅ Israĕl nö sökhaka.

⁴Ngö ṙô anga-aṅ, Tökôlò an yēḵ ngam Mā Tēv, ngam Tēv Israĕl, ngam tö aṅtī tö këlre nö hateungngö ök kinlēḵngô ò nö in Tāvit ök yöng chu, nö ngö ṙô,

⁵Hētentö ök sakāmö chu kēnyö vē tarikre nö ṙā-ang ip panam Aikup, öt atölu chū-ö tö elpanam i nup taṙòkhöre miyöngö Israĕl tö chūök tī chu mānlö patī, hòṅ ngam minë-eny chu nö umuh, öt atöllö tarik chū-ö inrē nö rācha nö i kui vē tarik chu Israĕl;

⁶Atöllen Yērusalem pöri hòṅ ngam minë-eny chu nö umuh ngaich chū-ö inrē atöllen Tāvit nö i kui vē tarik chu Israĕl.

⁷Më ellōn ök yöng chu an angū-ö Tāvit nö mānlö patī nö minë-eny ngam Mā Tēv, ngam Tēv Israĕl.

⁸Ngö ṙô pöri ngam Mā Tēv tö Tāvit, ök yöng chu, Më-ellōn meh an angū-ö öm mānlö patī i minë-eny chu, tö huveū-en angū-ö nö ellōn meh;

⁹Hö-ö pöri më-eṅ min mānlö öp patī, höng öp kūön meh tö kayônyu nö in meh min mamānlö öp patī i minë-eny chu.

¹⁰Ngaich an töngamuh ngam Mā Tēv nö hateungngö ngam kinlēḵngôre; pò chu ngaich choholre i chūök Tāvit ök yöng chu ūich hak inrē el kantēra Israĕl, sā ṙô ngam Mā Tēv nö kilēḵngôre, ngaich chin inrē mānlö ngam patī i minë-eny ngam Mā Tēv, ngam Tēv Israĕl.

¹¹Ngaich chin ël e tī ṙātö ngam kasòng chöngö, tö aṅtö ngam kinlēḵngô ngam Mā Tēv ngam ṙô ò nö in yip tarik Israĕl.

¹²Söklöre ngaich Sòlòmön nö i kūö ök tahāklö ngam Mā Tēv i kūö yik tömūl aṅ Israĕl, hanyāknyö këlre ngaich.

¹³Vī mās ang Sòlòmön taneui sumkôngö (2.2 Mtr) rôta nö ranöönö röön, taneui sumkôngö (2.2 Mtr) ṙôktāk, lūöi sumkôngö (1.3 Mtr) rôlòng, asöklö e ngaich nö el milūkö; ngaich söklöre anga-aṅ nö i kui e. Simtö kui kinmônöre ngaich anga-aṅ nö i kūö yik tömūl aṅ Israĕl, hanyāknyö këlre inrē nö kū-ötö el halīöngö;

¹⁴Nö ngö ṙô, Ō Mā Tēv, Tēv Israĕl, öt Tēvu tö sā meh, el halīöngö hēk el tumlat, mahaköp kinlēḵngô ane inrē hameuktö tököp hanāngenlōn nö i vē tarik meh vē lamök i kūö meh nö holtö ellōnre;

¹⁵Mahaköphanga nö ik tarik meh Tāvit ök yöng chu nuk ṙô meh in ò; hòṅ, ngaich man ṙô-òv elvāngre, ngaich aṅtī tö këlre töngamuh hateungngö e i ngih sakāmö.

¹⁶Ō Mā Tēv, Tēv Israĕl, lökten man yēḵ töngamuh haköpngö öp ṙô meh kinlēḵngôre in ò ngam tarik meh Tāvit yöng chu, öm ngö ṙô, Öt hĕng tak min tarik tö rö-ö nö i kūö chu nö ūich el kantēra Israĕl, yē yip kūön meh nö haṙēmngenre tö talöököre, nö lök im chöngö chu sā meh më-eṅ ngaich lök i kūö chu.

¹⁷Ō Mā Tēv, Tēv Israĕl, lökten töngamuh, hökngen ngam ṙô meh nö haköpi, ngam ṙô meh ik tarik meh Tāvit.

¹⁸Hōḵ ang pöri min ngam Tēv nö kô-en nö iyöng i tarik nö el tumlat? Yĕh meuk, ngam halīöngö tö ngam latulöng halīöngö inrē nö öt kô-òre nö chūök meh; sitih hanöichngen ngih patī ngih mahānlö chu!

¹⁹Ngaich sön yēḵ hō-oṙô ngòh tarik meh nö vë-ekūö meh ve-el kui inrē, Ō Mā Tēv chu, hang ṙô chu ayôṙa ṙô ane inrē hang vinë-eṅkūöre tö ngòh tarik meh, nup havëkö ngòh tarik meh nö in meh:

²⁰Hòṅ meh milakhak mat kū-ötö ngih patī sakāmö hatööm inrē, ngih chūökö chūök öp minë-eny meh tö ṙô meh nö ṙātu, hòṅ meh hang vinë-eṅkūöre tö ngòh tarik meh nö kū-ötö ngih chūökö.

²¹Hangihtöre inrē më-eṅ tö nup vinë-elkui aṅ i ngòh tarik meh tö vē tarik Israĕl inrē, yē cha nö vë-ekūö meh nö kū-ötö ngih chūökö; hôṅ, el halīöngö man yĕh hang im chūök meh tunī-aka; ane inrē yē meh hang, aṙē-ĕl.

²²Yē öp tarik nö köölö fālen nö i holre ngaich hōtu nö chūökuṙô, ngaich yih chūökuṙô, ngaich nö i kūö ngam tahāklö meh el ngih patī,

²³Hang më-eṅ yēḵ ngaich el halīöngö, kētöre inrē, akah fālen vē tarik meh inrē, havahlö fālen öm kēten e i kui ò, haköp ngam töchip ngaich asā lanöökö ò tī reushen ò.

²⁴Yē vē tarik meh Israĕl nö ötkô tö lā-alre nö kūö cha nö köölö fālen nö in meh, yē cha nö hēk nö havantöre ngaich akah ngam minë-eny meh, havë-a ngaich vë-el kui inrē nö in meh nö el ngih patī,

²⁵Ngaich më-eṅ yĕh hang el halīöngö, aṙēlö tökööl vē tarik meh Israĕl, ngaich kēten cha hēk ing panam kahëtö meh in cha in yik yöng cha inrē.

²⁶Yē ngam halīöngö, nö löpngöre kūö nö öt kumṙah pò cha nö köölö fālen nö in meh, yē cha nö havë-a nö kū-ötö ngih chūök, akah minë-eny meh inrē, ngaich havööngö kūöre nö ṙā-ang im tökööl cha, hē meh hakihten cha,

²⁷Hang më-eṅ yēḵ ngaich el halīöngö, ngaich aṙēlö tökööl vē tarik meh, vē tarik meh Israĕl, hē meh haköpten cha tö tölöök talöökö öp lahök ël cha; kētö kumṙah inrē i kui ngam panam cha, ngam kahëtö meh nö amin in vē tarik meh.

²⁸Yē öp inyāichö nö im panam, yē öp tölëlngö kūö invah hēk nyanangngö chōn hēk nganāvngö hēk hāyö hēk kata-ĕm; yē cha nö havīlöng tö lā-alre nö i nup elpanam cha; öp töng sitih invah tölëlngö kūö, öp töng invah umuh;

²⁹Öp töng sitih invë-a, öp töng sitih vinë-el kui tötöng tarīka hēk tö yip tarik Israĕl, nö kö akah kanihngenre, miṙivlōn ò inrē ngaich hateutnyö këlre nö kū-ötö ngih patī;

³⁰Ngaich më-eṅ yĕh hang elhalīöngö ngam chūök meh tuni-ak, aṙē-ĕl inrē kökē-ĕkūö tö hĕng tak öp mikahkūö meh ellōn ò, sā nup talöökö ò (pò meh höng më-eṅ, tö akahalōn tö ellōn kūön tarik);

³¹Hòṅ cha nö pa-ekūö tö meh inrē i rô-òtö sakāmö cha nö aṅ im panam ngam kahëtö meh in yik yöng ih.

³²Ngatī inrē yē öp aṅ tahëng panam, öp töt aṅ in yip tarik Israĕl, yih nö ṙā-ang tömarôvat panam tökūö ngam tökiröng minë-eny meh, ngam tökalēḵ kël meh inrē tö ngam töteut hak kël meh, yē ò nö yih ngaich havë-a nö kū-ötö ngih patī,

³³Hang më-eṅ yēḵ el halīöngö ngam chūök meh tunī-ak, ngaich asā nup havëkö ngam aṅ panam tahëng nö in meh; hòṅ vē taṙòkhöre tarik ngih tumlat nö akaha kūö tö minë-eny meh pa-ekūö inrē tö meh, nö sā vē tarik meh Israĕl, hòṅ cha inrē nö akahalōn tö ngih patī ngih mahānlö chu nö kaheūkö tö minë-eny meh.

³⁴Yē vē tarik meh nö kunyī-inyre nö i kinyūngö nö lā-al yip lā-alre, ip töng kū-ö tī meh tinngen cha, ngaich havë-a cha-a nö in meh nö kū-ötö ngih elpanam ngih katöllö meh ngam patī inrē mahānlö chu i minë-eny meh,

³⁵Hang më-eṅ yĕh ngaich el halīöngö öp havëkö cha öp vinë-elkui ṙô cha inrē, ngaich ṙapkö ngam chööḵnyö cha.

³⁶Yē cha nö köölö fālen nö in meh pòn öt tarīku öp tötköölö fālen ngaich më-eṅ līn in cha, ngaich kēten cha nö ip lā-al cha, ngaich lökten cha nö halayi nö töhakövö i panam tömarôvat töröhta inrē;

³⁷Ngaich yē cha nö haköpngö e nö ellōn cha im panam chūök cha nö halāyi nö hakövö, havöötö ellōnre ngaich vë-elkuire inrē nö in meh ip panam chūök inkövö cha, nö ngö ṙô, Köölö fālen in ngaich chōichen inlaha inrē ötlöök inrē;

³⁸Yē cha nö havötö ellōnre nö keuheūttö kuilōnre keuheuttö ellōnre inrē nö im panam chūök inkövö cha, ngam chūök cha nö halāyi nö hakövö, ngaich kū-ötö ngih panam nö havë-a, ngam kahëtö meh in yik yöng cha, im elpanam ngam atöllö meh, ngam mahānlö chu inrē patī i minë-eny meh,

³⁹Hang më-eṅ yĕh ngaich el halīöngö im chūök meh tunī-ak öp havëkö cha nup vinë-elkui inrē ṙô cha ṙapkö öp chööḵnyö cha inrē ngaich aṙēlö vē tarik meh vē tököölö fālen nö in meh.

⁴⁰Ō Tēv chu, ngaich man yĕh töngamuh milaklö matre elnangre inrē ip töhavëka i ngih chūök.

⁴¹Yĕh choholre ngaich, Ō Mā Tēv, öm chuh el chūök haneūheure, më-eṅ tö ngam kasòng minhôiṅyö meh. Hökngen më kūönṙô meh, Ō Mā Tēv, nö hayūtö tö inyöölen, hökngen yip töhet in meh nö ṙāmölōn nö im lanöökö meh.

⁴²Ō Mā Tēv, uh man havööngö kūöre tö ngam hacham kui meh! Köpölōn tök tököp hanāngen meh tö Tāvit ök tarik meh.