Read Car_Nicobarese 2 KINṘÖTNGÖ 7 Bible Online

2 KINṘÖTNGÖ 7 - Car_Nicobarese bible

2 KINṘÖTNGÖ 7

¹Hē Sòlòmön nö keuheūtöṙô nö vë-ekūötēv, yih ngaich ök taneūyö nö ṙeū-eung el halīöngö ngaich haṙāpngö nuk töföngö tökētu nuk tökētu inrē, ngaich ök kanôlò ngam Mā Tēv nö tööḵlö tī tök tempöl.

²Ngaich yik kūönṙô nö ötkô nö kuhēthötre nö el ök patī ngam Mā Tēv. Pò ngam kanôlò ngam Mā Tēv nö tööḵlö tī tö ngam patī ngam Mā Tēv.

³Hē yik kūön Israĕl nö ṙòkhöre nö meuk ök tameūyö nö yônti tök kanôlò ngam Mā Tēv inrē nö i kui ök tempöl, sōnngöre cha-a nö fāthāk kūö nö el tumlat nö el ök tösumītö, salām cha-a, ngaich ha-öiny ngam Mā Tēv inrē, nö ngö ṙô, Pò ò nö tölöök pòn köp ngam hanāngen ò nö örheūheu.

⁴Ngaich ök rācha tö yik tarik inrē nö ṙòkhöre nö kētö tökētu nö i kūö ngam Mā Tēv.

⁵Kētö tökētu ök rācha Sòlòmön tö nuk tö nët anāi köṅny kōiny nuā hēngòng nët anāi köṅny sīṅp. Lökten ök rācha tö yik tarik nö ṙòkhöre nö kētö ngam patī nö im Tēv.

⁶Kö i chūökre yip kūönṙô nö sökhaka; ngati inrē yik Lēvī, nö holtö nuk ranöng nö röng nö i kūö ngam Mā Tēv nuk vahīlö ök rācha Tāvit nö nöönyö ngam Mā Tēv pòn köp ngam hanāngen ò nö örheūheu, ip töng hē Tāvit nö kētö nöönyö i nup la-en cha: lā kūö cha ngaich yip kūönṙô nö föö nup römpĕt; ṙòkhöre ngaich yik Israĕl nö söklöre.

⁷Ahetlö ök ṙat ngam el milūkö ngaich ang Sòlòmön ök i kūö ngam patī ngam Mā Tēv; pòn in e anga-aṅ nö kētö töföngö tökētu nuk tösangöö inrē aṅ im inlām tökētu, pò öp mās tahāklö vahīlö Sòlòmön nö öt kô-òre nö chūök töföngö tökētu tö sāiny tökētu tösangöö inrē.

⁸Hē e Sòlòmön nö sat sumkam rô-òten tī tö ngam nyinā-aṅ, hol ò yik Israĕl nö ṙòkhöre, nö kiröngen ṙôngö löktökūö öp lökhöt i Hamat söl ik Töhëm Mak i Aikup.

⁹Im hinëvhöre sakāmö ök manūlö tö chēv nö kēkaṙen tö cha; pò cha nö kēten ök tahāklö nö sat sumkam sat sumkam ök nyinā-aṅ inrē.

¹⁰Im sakāmö tö nët anāi lūöi ök sinātö chingëṅt anga-aṅ nö tīnngörit yik tarik nö chuh patīre, nö ṙāmölōn tö kūö lanöökö tī ngam Mā Tēv tö hameuktu nö in Tāvit in Sòlòmön inrē in yik tarik Israĕl inrē.

¹¹Ngatī inlahen Sòlòmön nö keuheūtngen ök patī ngam Mā Tēv tök patī rācha inrē; nuk halēnngen Sòlòmön la-en ò nö im patī ngam Mā Tēv i patī ò inrē nö teūngen inteungngö tö ò.

¹²Meūkö ngaich ngam Mā Tēv tö Sòlòmön im hatööm ngaich ngö ṙô tö ò: Ngaich chin hang ṙô meh havë-a, ngaich inrē öich atöllö ngih chūök kanahngen chu nö patī chūök tökētu.

¹³Hē chu löpngö kūö minë halīöngö hòṅ u nö öt kumṙah, hēk tölṙô nup hāyö hòṅ u nö keuheūtngö ngam panam hēk söömtö invah tölëlngö kūö in vē tarik chu,

¹⁴Yē vē tarik chu vē mahavëkö minë-eny chu nö hayāichngöre, havë-a chöh kūö chu inrē, ngaich havööngö kūöre tö nup tötlöök talöököre, ngaich chū-ö min hangṙô cha el halīöngö ngaich aṙēlen cha min tö nup tökööl cha halanken ngam panam cha inrē.

¹⁵Ngaich nun min në mat chu nö milak hakṙen në el nang chu inrē nö hangihtöre tö öp töhavëka nö el ngih chūökö.

¹⁶Pò chu ngaich töngamuh atöllö ngih patī ahetlen e inrē hòṅ ngam minë-eny chu min nö örheūheu nö in e; örheūheu min inrē në mat chu töng ellōn chu nö umuh.

¹⁷Më-eṅ pöri, yē meh lök i kūö chu, sā lahök ök yöng meh Tavit, la-evṙen inrē tö nup tinöölô meh tö chu haköp në hachöngten chu inrē tö në chöngö chu.

¹⁸Ngaich chū-ö min köpötī tö ngam kantēra meh öm rācha sā ṙô chu kilēḵngôre in ök yöng meh Tāvit, öich ngö ṙô. Öt törö-övö min tarik in meh mahayöng in Israĕl.

¹⁹Yē meh pöri kānngöre ṙāngö në hachöngten chu inrē tö në chöngö chu në ṙahātö chu i kūö meh, ngaich kiröönngöre lök la-en tahëng tēv salāmö u inrē,

²⁰Ngaich chū-ö min nyòklen meh ṙā-ang im panam ngam kahëtö chu in meh; ngaich ngih patī, ngih ahetlö chu nö i minë-eny chu, kavāli min tö chu nö ṙā-ang i kūö chu, ngaich chū-ö min vīten e nö inchō-oṙô kūöngö ṙô inrē nö i taṙòkhöre tarik.

²¹I ngih patī inrē, ngih töhapōilöng, yip töng chamööḵngen e min nö uṙeh, ngaich ngö ṙô, Kūöyòh ang ngam Mā Tēv nö ngatī tī tö ngih panam tö ngih patī inrē?

²²Ngaich ngö ṙô min cha-a, Pò cha nö ṙāngö ngam kamënyen cha nö ṙāngö panam Aikup, ngaich kētö tīre inrē nö i tahëng tēv, salāmö u inrē ngaich lök la-en u; lökten an nö kētö në tötlöök nö i kui cha.