Read Car_Nicobarese 2 KINṘÖTNGÖ 9 Bible Online

2 KINṘÖTNGÖ 9 - Car_Nicobarese bible

2 KINṘÖTNGÖ 9

¹Ngaich hē ök rāni aṅ Sīpā nö hang ineūnyö Sòlòmön yih anga-aṅ ngaich nö i Yērusalem nö kalahan tö tökihngen intönö, nö maṙôngö holröön kumtö tö tahūsa inrē nuk ūṅt pōyen inrē humlum tö pōṙāi ihong inrē. Hē ò nö yih nö in Sòlòmön, vë-eny nang ò ngaich anga-aṅ nö keuheūtnyöre ṙô tö nuk ellōn ò.

²Sap nuk hatön ò ngaich Sòlòmön nö ṙòkhöre; öthĕng tö mahāyö nö in Sòlòmön öp öt kanô-òṅ ò nö halööknyö elnang ò.

³Ngaich hē ök rāni aṅ Sipā nö meuk mikah Sòlòmön, meuk ök patī mahānlö ò,

⁴Nyā-aṅkūö el mīs ò, anūchö yik mā, yik tarik ò inrē mu-umuh mameukṙen ò, inyut cha, yik sumlô nya-aṅkūö ò, tö nuk inyut cha, nuk töföngö inrē tökētu tö ò, nuk kahëtö ò nö el patī ngam Mā Tēv öt ōtre ma-alaha ngaich anga-aṅ nö inrē.

⁵Ngö ṙô ngaich anga-aṅ tök rācha, Kô-en an ngam tö-eūka ngam ahang chu i panamre ineūkö meh ngam mikah meh inrē,

⁶Hö-ö pöri chū-ö ṙātö ellōnre im tö-eūka hanöng saha chu yih ngaich meūkö e në mat chu; ngaich yĕh meuk, öt ròngti ineūka an nö in chu ngam tökiröng mikah meh; tôlö man tö ngam tö-eūka ahang chu.

⁷Töṙāmölōn yip pīhö meh! Töṙāmölōn vē tarik meh, vē tö-örheūheu nö sökhak nö i kūö meh nö hang ap mikah inrē!

⁸Tökôlò an yēḵ ngam Mā Tēv, ngam Tēv meh, ngam tö kuchīkölōn nö in meh nö ha-ūichlen meh inrē el kantēra ò sā rācha ngam Mā Tēv! Pò ngam Tēv meh nö hāngenlōn tö Israĕl ngaich haköpngen cha nö örheūheu inrē, vīlen meh an nö ngaich öm rācha i kui cha, pò meh hōtu kahôkken töchip kinṙôka lanöökö inrē.

⁹Ngaich kē-ĕkūö ök rācha töhumlum hēngòng nët anāi tālen (4,000 Kg mötlö), pōyen inrē nuk tötahūsa, töpōiṙāi inrē ihong; öt töngatī-ivö tötahūsa tö sā në në kahëtö ök rānī aṅ Sipā nö ik rācha Sòlòmön.

¹⁰Hēk inrē yik tarik Hurām tö yik tarik Sòlòmön, yik tökumtö humlum nö ṙā-ang Ôfir, kumtö alkum chōn töpōiṙāi ihong inrē.

¹¹Ngaich ök rācha nö vī nuk alkum chōn nö tayôhò ngam patī ngam Mā Tēv i patī ngam rācha inrē, hĕnghöre lāir hārp inrē nö in yik tumkökṙôre; öt hĕng heuh nö meūkö tö sā u nö i panam Yūta tö lā urĕh.

¹²Ngaich ök rācha Sòlòmön nö kē-ĕkūö ök ranī aṅ Sīpā tö nuk lōn ò nö ṙòkhöre nuk töng havëkö ò ötkaheuktu nuk kum ò nö ik rācha. Havöökūöre ngaich anga-aṅ ngaich havantöre nö i panam re, tö yik tarik ò.

¹³Tafūölòng tafūöl anāi tāfūöl tālen lumngan (23,000 Kg Weight) nuk humlum yamih nö in Sòlòmön i töhĕng samyeūheu.

¹⁴Öt kaheuktu nup kum yik mi-inyihkö chehen; ṙòkhöre inrē yik rācha aṅ Arapia tö yik mahayöng panam nö kētö humlum rupīö inrē nö in Sòlòmön.

¹⁵Nëtòng vahī ök rācha Sòlòmön tö tö kiröng lanaklö tö röömö humlum; tafūölòng tö röömö humlum i tö hĕng lanaklö.

¹⁶Lūöyòng vahī anga-aṅ tö lanaklö töröömö humlum; lūöyòng siköl (3 Kg) humlum i tö hĕng lanaklö; ngaich halinngen u ngam rācha nö i Patī ngam El Inchōn Lepanön,

¹⁷Tökiröng ök inrē vahī ök rācha kantēra kanël höttī, lūöpö angū-ö tö töng humlum nyöre.

¹⁸Tafūöl nuk vanānglö ök kantēra hĕng ök humlum ranöönö röön ök tö taptöre nö ik kantēra, āṅngöre lā-a ik anūichö nup kël nët nòng nuk lāyön sökhak nö hol nuk tanööngö kël,

¹⁹Ngaich nët sīön nòng nuk lāyön sökhaka nö umuh, hĕng i tö hĕng lā i kūö nuk vanānglö tö tafūöl. Öt töngatī-iv tö ngaich nö vī-i töng pūlngö.

²⁰Ṙòkhöre nuk chūökkūö ök rācha Sòlòmön nö òk nö humlum, ṙòkhöre inrē nuk chūökṙen el ök Patī El Inchōn Lepanön nöng humlum nyöre; öt kaheuktu rupīö nö chehen hē nuk sākāmö Sòlòmön.

²¹Pò nuk chōng ök rācha nö chuh Tārsis nö hol tö yik tarik Hurām; hēng heuh i tö lūöi samyeūheu nuk chōng aṅ Tārsis nö yih nö kumtö humlum, rupīö, kanël höttī, ônychi, pīkòk inrē.

²²Ngatī inlahen ök rācha Sòlòmön nö samötlöng tö yik rācha ngam tumlat nö ṙòkhöre i kanôlò i mikah inrē.

²³Ngaich ṙòkhöre yik rācha ngam tumlat nö chöh mineūkö kūö Sòlòmön nö hòṅ hang mikah ò ngam chahaphöt ngam Tēv nö el kuilōn ò.

²⁴Kö kūmuṙen ngòh tö hĕng tak tö raneushö ò, tö chehen rupīö, humlum inrē hilā, mūr, tötahūsa kōra, köttö inrē nö pōyen i tum samyeūheu.

²⁵Ngaich Sòlòmön nö fën köṅny chūök kōra inröl nö fën köṅny kōra inröl inrē, nëtsīön köṅny tarik aṅ uk kōra, yiktö hachūöki tö ò nö el nuk el panam inröl in ök rācha inrē i Yērusalem.

²⁶Ngaich anga-aṅ nö hayöng i kui yik rācha nö ṙòkhöre löktökūö Yūfritīs söl ip panam aṅ Filistain, i kūöngö Aikup inrē.

²⁷Ngaich ök rācha nö vī rupīö nö tëḵ nö i Yērusalem sā ihong, sītör chōn inrē nö pōyen höng sā sikamôr i Sīfëlā.

²⁸Hayih tö nuk kōra Sòlòmön nö ṙā-ang Aikup ṙā-ang taṙòkhöre panam inrē.

²⁹Röh nup inlahen Sòlòmön, löktökūö ik raneh söl ik manā-aṅ nö kūchiyö nö i Kinṙötö Nātan ök pròfĕt, tö vënyu inrē tö Ahīchā ök aṅ Sailō, i maheuṅk Aito ök mameuk inlahen Yeropōam ök kikōnyö kūön Nēpòt.

³⁰Hayöng ön Sòlòmön nö i Yērusalem fën anāi samyeūheu nö i kui Israĕl,

³¹Haṙòh ngaich Sòlòmön nö in yik yöng re, lāpī ngaich nö elpanam Tāvit ök yöng ò; ṙënngen ò ngaich Rehopōam ök kikōnyö kūön ò nö hayöng.