Read Car_Nicobarese ESRĀ 1 Bible Online

ESRĀ 1 - Car_Nicobarese bible

ESRĀ 1

¹Ik raneh samyeūheu Sāirös rācha aṅ Pörsiā, ngam ṙô ngam Mā Tēv nö löknyö elvāng Yarimiā nö hōtu nö hateungtukūö, haruhlö ellōn Sāirös ngam Mā Tēv ök rācha aṅ Pörsiā pòn hōten ò nö keuheūt i nuk pūlngö ò nö ahānga kūichngö e inrē:

²Ngö ṙô an Sāirös rācha aṅ Pörsiā: Kē-ĕkūö chu an ngam Mā Tēv, ngam Tēv halīöngö, tö në pūlngö ngam tumlat, ane inrē töl ṙô chu anga-aṅ mānlö patī ò i Yērusalem, öp i Yūtā.

³Öp töng aṅ in yīö öi tarik ò ṙòkhöre, in ò an yēḵ ngam Tēv ò, hökngen ò inrē nö chuh Yērusalem, öp i Yūtā, nö hēk nö mānlö ngam patī ngam Mā Tēv, ngam Tēv Israĕl Anga-aṅ An Tēv ngam i Yērusalem;

⁴Hökngen öp tö-aṅ, ip töng chūök ò nö iyöng nö rahëchtaṙen, nö hōtuṙen tö yip tarik ip chūök ò nö tī tö rupīö, humlum inrē, tī tö chehen töṙeūla inrē, nö holre tö kanahanglōn tökētu nö ip patī ngam Tēv öp i Yērusalem.

⁵Choholre ngaich yik yöngkūö patī yik yöng Yūtā Penyamin inrē, tö yik kūönṙô Lēvi inrē, ṙòkhöre cha-a yik tö haruhlöng ellōn töngam Tēv nö kiröönngöre nö mānlö ngam patī ngam Mā Tēv nö hēk ngam i Yērusalem;

⁶Ngaich ṙòkhöre yik umuh in cha nö holṙen cha nö tī tö rupīö chūökṙen, humlum, chehen, töṙeūla, töpōiṙāi inrē chehen holre tö kanahanglōn tökētu.

⁷Kēnyö nuk chūökṙen ngam patī ngam Mā Tēv inrē ang Sāirös ök rācha nuk tö halāyi tö Nēpōkatnēsör nö ṙā-ang Yērusalem ngaich chaphötvö, nö el patī nuk tēv ò.

⁸Kēnyö u ang Sāirös ök rācha aṅ Pörsiā nö hayōmö tö Mitretat ök yōm chehen ök kamheuṅknyö u nö in Sespassār ök kūön rācha aṅ Yūtā.

⁹Ngih ön ṙôken u hĕng köṅny pēsön chūök humlum, hĕng köṅny pēsön chūök rupīö, nët anāi machūötöre chūök finöngö tötahūsa,

¹⁰Lūöi anāi töchilū pingāṅl humlum, nët köṅny fënòng söm töchilū pingāṅl rupīö, hĕng köṅny nuk tahëng chūökṙen;

¹¹Ṙòkhöre nuk chūökṙen humlum tafūöl anāi machūötöre. Ṙòkhöre në nö kum Sespassār, hē yik tö ahötiyö nö kē-ĕyö nö ṙā-ang Pēpilön nö i Yērusalem.