Read Car_Nicobarese ESRĀ 10 Bible Online

ESRĀ 10 - Car_Nicobarese bible

ESRĀ 10

¹Hē Esrā nö ṙònghöichṙen nö vë-ekūötēv ve-eny tökööl re inrē, peuiny afukngöre inrē nö i kūö ngam patī ngam Tēv, maṙôngö yip tarik tömūl, nyīö inrē, hamūlöre nö in ò aṅ in yik Israĕl; pò yip tarik nö kalē-ĕṙô nö peuiny.

²Ngaich Sēkāniya ök kikōnyö kūön Yēhī-ĕl, aṅ in yik kikōnyö kūön Ēlām, nö vë-ekūö Esrā: Falālötī in tö ngam ṙinātö ellōn im Tēv hī ngaich öi pīhövö tö aṅ tahëng kikānö aṅ in vē tarik ngih panam sön pöri töngamuh öi maheūṅk kuvö in Israĕl nö pòrô angū-ö ngih.

³Lökten tā-a töi vī kinlēḵngô im Tēv hī öp ṙināngö vē töpīhövö kikānö tö yip kūön cha inrē, nö sā ṙô ngam Mā chu nö halēn cha-a inrē yip tökichëyöre nö im chöngö ngam Tēv hī; tā-a inrē kēkö alaha e nö sā ngam chöngö.

⁴Choholre, tön la-en meh an, holṙen meh īhö inrē; hangë-eṅre öm la-evṙen tö e.

⁵Choholre ngaich Esrā ngaich vīten yik yöngkūö kūönṙô tö yik Lēvī inrē ṙòkhöre inrē yik Israĕl nö chūökuṙô nö kilēḵngôre tö cha min nö la-evṙen tö ngam ṙô. Kilēḵngôre cha-a nö chūökuṙô.

⁶Kē-ĕngre ngaich Esrā nö ṙā-ang i kūö ngam patī ngam Tēv, ngaich chuh el ök tökiröng urôhò Yēhōhanan ök kikōnyö kūön Ēlīāsip, i chūök ò nö hĕng mitööm, öt rēhĕn nö nyā rôti öt rēhĕn nö òk mak; pò ò nö haṙivlōn tö öt ṙinātö ellōn aṅ in yik tö-ahöti.

⁷Keuheūtngöre chūök ngaich ök inhānga nö i Yūtā Yērusalem inrē nö in yik tö-ahötiyö mahavan nö hōten cha nö hamūlöre nö i Yērusalem,

⁸Ngaich yĕn hĕng tak öp töt yamih i ël tölūöi sumkam, i chöngö yip mākūö tö yip maṙöinylö inrē ṙòkhöre min inlānen cha nö kē-ĕ, ngaich anga-aṅ min inrē nö ha-uknyu tö yip ṙôngö aṅ in yip tö-ahötiyö.

⁹Ngaich ṙòkhöre yik tarik aṅ Yūtā aṅ Penyamin inrē nö hamūlöre nö i Yērusalem i ël tölūöi sumkam; ngam minchūötöre chingëṅt an angū-ö, im tönët anāi sakāmö ngam chingëṅt. Ṙòkhöre ngaich yik tarik nö ūichhak nö el ök töngāṅ i kūö ngam patī ngam Tēv, kichëyöre tökūö ngam tö ngatī, kūö ngam yöng kumṙah inrē.

¹⁰Söklöre ngaich Esrā ök kūönṙô, ngaich ngö ṙô tö cha, Tôichngen yin öi pīhövö tö aṅ tahëng kikānö, ngaich ṙūölö ṙôken fālen Israĕl.

¹¹Ngaich yin yĕh halööknyôre tö tökööl re im Mā Tēv ngam Tēv yik yöng yīö, la-evṙen inrē tö lōn ò; haköhngenre yin tö yip tarik aṅ ngam panam tö yip aṅ tahëng inrē kikānö töpīhövö.

¹²Ngaich ṙòkhöre yik tömūl nö pōitô nö sapṙô, Ngatī an yēḵ; Sā ṙô meh in ngaich la-evṙen.

¹³Maṙôngö pöri yik tarik ngaich hē tökiröng kumṙah angū-ö inrē; ötkô öi sökhaka el kahôyö. Öt rēhĕn angū-ö nö la-en töhĕng sakāmö hēk tönët; pò hī kiröngö tanôichngen in e angū-ö.

¹⁴Hökngen yip mākūö hī nö sökhaka nö lā in yip tömaṙôngö; hökngen nup elpanam hī kamë pīhöre tö aṅ tahëng kikānö nö yih ip töhalēnlöng ṙētak, ngaich hol cha yip maṙöinylö tö yip ma-akah fālen aṅ i nup elpanam, hanöng saha ngam tökalēḵ lanīnö ngam Tēv hī tökūö e ngih nö lākiröön in hī.

¹⁵Höng Yônatan ök kikōnyö kūön Asahĕl tö Yasiya inrē ök kikōnyö kūön Tikvah samô-ò ngih, ngaich Mësulām tö Sappĕtali ök Lēvī hamòl lōn cha.

¹⁶Ngaich ngatī yik tö-ahöti mahavantöre. Katöllö tarik ngaich Esrā ök kūönṙô, yik yöngkūö patī yik yöng nö sā mitī-i patī yik yöng cha, kö minënyu cha-a tö minë-enyre. Ik raneh sakāmö ngam sinömö chingëṅt cha-a nö ūichngöre nö mikahtö elmat re tö e;

¹⁷Ngaich i raneh sakāmö ngam raneh chingëṅt cha-a nö keuheūtlöre tī tö yik tarik tö pīhövö tö aṅ tahëng kikānö.

¹⁸Aṅ in yik kikōnyö kūön yik kūönṙô töpīhövö tö aṅ tahëng kikānö nö kôti Ma-asāya, Ēliasör, Yārip, Kētaliyā inrē, aṅ in yik kikōnyö kūön Yēsua ök kikōnyö kūön Yōsatak tö yik mak alaha ò.

¹⁹Kilēḵngôre cha-a ngaich nö ṙā-ngö yik pīhöre, ngaich hĕng nòng töttāli sīṅp kūö fālen cha nö tökētu aṅ i nup tö kiteūmhaka.

²⁰Aṅ in yip kikōnyö kūön Immer: Hananī, Sapatiyā inrē.

²¹Aṅ in yip kikōnyö kūön Harim, Masāyā, Ēlaicha, Samayā, Yēhīel. Usīyā inrē.

²²Aṅ in yip kikōnyö kūön Pasūr: Ēliō-enāi, Ma-asēyā, Ismael, Netanĕl, Yōsapāt, Elasāh inrē.

²³Aṅ in yik Lēvī: Yōsapāt, Simē-i Kēlāya (ngam töngö, Kēlīta), Pĕtahīyā Yūta, Ēliāsör inrē.

²⁴Aṅ in yik tumkökṙôre Ēliāsip. Aṅ in yik yōmkūö inkūp: Salūm, Tēlem, Urī inrē.

²⁵Aṅ Israĕl inrē: Aṅ in yik kikōnyö kūön Paròs: Ramëyā, Isīyā, Malchīyā, Mëyamin, Ēlīasör, Hasapīyā, Pannāyā inrē.

²⁶Aṅ in yip kikōnyö kūön Ēlām: Mëtaniya, Sakāriā, Yēhīel, Aptī, Yērimòt, Ēlaicha inrē.

²⁷Aṅ in yik kikōnyö kūön Sattu Elīō-enāi, Ēlīasip, Mataniyā, Yērimòt, Sappāt, Asīsā inrē.

²⁸Aṅ in yip kikōnyö kūön Pēpai hēḵ Yēhōhanan, Hananiyā, Sappāi, Atlāi inrē.

²⁹Aṅ in yip kikōnyö kūön Pānī hēḵ Mësulām, Māluk, Attayā, Yāsup, Sīal, Yērimòt inrē.

³⁰Aṅ in yip kikōnyö kūön Pahatmō-ap: Atmā. Chēlāl, Pennāyā, Ma-asēyā. Mataniyā, Pesalēl, Pinnūi, Manasē inrē.

³¹Aṅ in yip kikōnyö kūön Harim; Ēliāsör Isīyā, Malkiya, Malūk, Samërīyā inrē.

³²Aṅ in yip kikōnyö kūön Hāsum; Matēnāi, Matatah, Sappāt, Elīfëlet, Yërīmai, Manasē, Simēi inrē.

³³Aṅ in yip kikōnyö kūön Pānī: Maatai, Amram, Yūel,

³⁴Pennāyā, Pĕttēyā, Chēluhī,

³⁵Vanīyā, Meremòt, Ēliāsip,

³⁶Matāniyā, Matēnai, Ya-asū.

³⁷Aṅ in yip kikōnyö kūön Pinnūi: Simē-ī,

³⁸Salemiyā, Natān, Atāya,

³⁹Maknatēpai, Sāsai, Sārai,

⁴⁰Asārel, Salemiyā, Saremiyā,

⁴¹Salūm, Amarīya, Yôsĕf inrē.

⁴²Aṅ in yip kikōnyö kūön Nēpō: Yē-iel, Matītīyā, Sapat, Sapīnā, Yatāi, Yôel, Pennāyā inrē.

⁴³Ṙòkhöre yin vē nö töpīhövö tö aṅ tahëng kikānö, ṙāngen cha ngaich cha-a nö holtö yik kūön cha.