Read Car_Nicobarese ESRĀ 3 Bible Online

ESRĀ 3 - Car_Nicobarese bible

ESRĀ 3

¹I yanīhih ngam sinātö chingëṅt, yik kikōnyö kūön Israĕl nö i nuk elpanam, hamūlöre yik tarik nö i Yērusalem nö sā töng hĕng tak nö tarik.

²Söklöre ngaich Yēsua ök kikōnyö kūön Yōsatak, nö holtö yik kūönṙô tö sā ò, Sërupāpĕl inrē ök kikōnyö kūön Sī-eltī-el nö holtö yik mak alahare, ngaich cha-a nö vīlö ök tahāklö ngam Tēv Israĕl, nö hòṅ kētö töföngö tökētu nö ël e, sā kinūichngö e nö im chöngö Môsös ök tarik ngam Tēv.

³Asöklö ök tahāklö cha-a nö i chūök e, pò cha nö pa-ekūö tö yik tarik aṅ ngam panam, kētö töföngö tökētu cha-a ngaich nö ël e nö im Mā Tēv, föng tökētu tö peuheū harap inrē.

⁴Ngaich cha-a nö haköpkö ök tökiröng nyinā-aṅ nö el sanrā, sā kinūichngö e, Öt hĕng hang sumkam ngaich nö kētö töföngö tökētū nö i kinṙeuklöre asā ngam chöngö, sā lōn ngam töhĕng sakāmö,

⁵Unôichrit e ngaich ngam tötheumköre finöngö tökētu, tökētu hē el ayöö chingëṅt i nup töhalēnlöngö inrē tökiröng nyinā-aṅ im Mā Tēv, nup tī töhĕng tak tökētu nö kanahanglōn tökētu nö im Mā Tēv.

⁶Löktökūö ngam raneh sakāmö ngam sinātö chingëṅt cha-a nö rĕhtenre nö kētö töföngö tökētu nö im Mā Tēv. Öl pöri ök chūökröön tö machöḵlö ngam tempöl ngam Mā Tēv nö ṙātu.

⁷Lökten cha nö kētö rupīö nö in yik tö huveū nö i ihong in yik mistrī inrē; nyā-aṅkūö, òk, tavī-i in yik aṅ Sītōn Tūrös inrē nö tö hōtu nö halāitö sītör chōn nö ṙā-ang Lepanön nö chuh i kūö mai i Yôppa, sā ṙôken nuk tī Sairös ök rācha aṅ Pörsia nö in cha.

⁸Im innëtö samyeūheu yanīhö cha nö im patī ngam Tēv i Yērusalem, im innëtö chingëṅt, ang Serupāpĕl ök kikōnyö kūön Si-eltiel, Yēsūa inrē ök kikōnyö kūön Yōsatak nö rultöre, nö holtö yik hanöng kisānö cha, yik kūönṙô tö yik Lēvī inrē ṙòkhöre inrē yik yamih nö i Yērusalem nö ṙā-ang im inkövö. Vīlö yik Lēvī cha-a, löktökūö tönët anāi samyeūheu ṙēti söl tulöng inrē, nö mameukkö ngam la-en ngam patī ngam Mā Tēv.

⁹Holtö yik kikōnyö kūönre ang Yesūa tö yik mak alaha ò. Katmi-el inrē tö yik kikōnyö kūön cha, kikōnyö kūön Yūtā, holṙen re nö meuk yik töla-evṙen tarik el patī ngam Tēv, nö holre tö yik kikōnyö kūön Hënatat tö yik Lēvī inrē, kūön cha kikōnyö mak alaha cha inrē.

¹⁰Ngaich hē yik mamānö nö ṙātö chūök rööntö machööḵlö ök tempöl ngam Mā Tēv, yik kūönṙô nö chehen tö chehen re nö yihtöre nö lā kūö nö kumtö römpĕt, tö yik Lēvī, tö yik kikōnyö kūön Asaf, nö kumtö simpòl nö ha-öiny ngam Mā Tēv sā inchōḵngen re tö Tāvit ök rācha nup aṅ Israĕl;

¹¹Ngaich cha-a ane inrē nup tösāpö, ha-öiny ane inrē ha-öinytö tī ngam Mā Tēv ò, pò Ò nö tölöök. Pòn köp ngam hanāngen ò nö örheūheu nö in Israĕl. Ngaich ṙòkhöre yik tarik nö pōitô nö ayôṙā, hē cha nö ha-öiny ngam Mā Tēv, pò ngam rööntö machööḵlö ngam patī ngam Mā Tēv nö ṙātu.

¹²Maṙôngö pöri yik kūönṙô Lēvī inrē tö yik yöngkūö patī yik kikōnyö yöng cha, tököiny tarik mameuk ök raneh patī, pōitô nö harāmöre hē cha nö meuk ök chūök rööntö machööḵlö ngam patī nö ṙātu, maṙôngö inrē yik ma-ayôṙa nö pōitô tökūö ṙanāmölōn re;

¹³Lökten yik tarik nö ötkô nö akah nuk ṙën re nö i ṙô yik tarik pameuny, pò yik tarik nö pōitô nö ayôṙa, ngaich hāngö inyôṙa nö maṙôvat.