Read Car_Nicobarese ESRĀ 4 Bible Online

ESRĀ 4 - Car_Nicobarese bible

ESRĀ 4

¹Ngaich hē yik tökunyāha elmat tö Yūtā tö Penyamin inrē nö hang yik tö ahötiyö nö havantöre nö mānlö ök tempöl ngam Mā Tēv, ngam Tēv Israĕl,

²Yihtöre ngaich cha-a nö in Serūpāpĕl in yik yöngkūö patī yik yöng inrē ngaich ngö ṙô tö cha, Tā-a töi holṙen yīö mānö; tön salām ngam Tēv yīö īhö sā yīö, ngaich in inrē kētö tökētu in Ò hēten tö nuk sakāmö kinëtö ih ihih tök rācha aṅ Asirīa Ēssörhatön.

³Ngaich ngö ṙô pöri tö cha Serupāpĕl, Yēsūa, tö yik tö ōtngöre inrē yöngkūö nuk patī yik yöng i Israĕl, Hö-ö yin yī-ö la-evṙen in ih i minānlö patī ngam Tēv ih; höng kahangenre pöri īhö mānlö patī ngam Mā Tēv, ngam Tēv Israĕl, sā tinöölô ih tök rācha Sairös rācha aṅ Pörsīa.

⁴Ngaich yik tarik aṅ ngam panam nö pinhëṅtökūö yik tarik aṅ Yūtā, ngaich vīten cha nö pa-ekūö nö mānö,

⁵Ngaich haṙāi mahalēnöre nö lā-al cha pòn hōten cha nö öt teunglen nö im la-enre, i rô-òtö nuk sakāmö Sairös rācha aṅ Pörsīa, urōsen nö söl ik hē Tērīös nö hayöng rācha aṅ Pörsīa.

⁶Hē Ahāsōrös inrē nö hayöng, ik ranehten ò nö hayöng, achā-a nö kūich vinë-eny fālen yik aṅ Yūtā Yērusalem inrē.

⁷I nuk sakāmö Artasörsös ang Pislām, Mitretat, Tapīl, tö yik tö ōtngöre hol cha nö kūich līpöre Artāsörsös rācha aṅ Pörsia; i ṙô Aramik ök līpöre nö kūichö. Ngaich kūichö manah inrē.

⁸Kūich līpöre inrē Rēhum ök tö chöngu Simsai inrē ök kamūich nö vë-eny fālen Yērusalem nö in Artāsörsös ök rācha nö ngö tī

⁹Kūich ngaich Rēhum ök tö chöngu, Simsai ök kamūich, tö yik tö ōtngöre hol cha, yik ma-akah fālen, mahayöng, mākūö, aṅ Pörsia, tarik aṅ Ērek, aṅ Pēpilön, tarik aṅ Sūsa, achā-a yik aṅ Ēlam,

¹⁰Yik tö ōtngöre inrē pumnāmö tarik yik tösöömi tök tökiröng mā Òsnāppār ngaich iyöng in nuk elpanam Samaria i nuk tö ōtngöre inrē panam. Lāmuh tö ngam Tahël,

¹¹Ngih ön insā mat öp līpöre tö söömi tö cha Löö in Artāsörsös ök rācha: Yip tarik meh, yip tarik ngam panam Lāmuh tö ngam Tahël, söömtö sinlāmö.

¹²Akahalōn an yēḵ ngam rācha tö e tö yip Yahūti yip yamih nö ṙā-ang in meh nö in ih nö ngaich nö chuh Yērusalem. Ngaich yip nö hēk nö vīlö ngam tö minôṙô tötlöök elpanam; keuheūtötī yip nö ngaich tö nup kinlōngö ngaich nö vītit nup rööntö machööḵlö.

¹³Akaha e an yēḵ ngam rācha tö e, yē ngih elpanam nö vīlöng nö hēk keuheūten inrē nup kinlōngö e, hö-ö cha-a min nö kētö masūl, ṙāi ṙināhöt chehen, hēk ṙāi kūö chūök, ngaich min nup rupīö ngam rācha nöng yëḵngen.

¹⁴Lökten sā ih nyamā sāl ngam patī rācha rö-ö in kô höng meuk ngam rācha nö hayë-eiṙen, lökten in söömngö vinë-eny nang ngam rācha,

¹⁵Hòn chöhlöngö nö i mat nup līpöre kinṙötö yik yöng meh. Kôtökūö man min i mat nup līpöre kinṙötö ngaich akahalōn tö ngih elpanam nö elpanam töminôṙô, töchökhuṙen tö rācha panam inrē, ël e ik misī inhôngen chöngö nö haruhlöngṙen, Angū-ö an lökten ngih elpanam nö piṙātiyö.

¹⁶Mikahtölōn ngam rācha in tö e, yē ngih elpanam nö vīlöngö nö hēk ngaich keuheūtiṙen në kinlōngö e, ngaich hö-ö min më-eṅ amīnu tö panam Lāmuh tö ngam Tahël.

¹⁷Söömngö sanap ṙô ngaich ngam rācha, Löö in Rēhum ök tö chöngö, Simsai inrē ök kamūich in yip tö ōtngöre hol cha inrē yip mi-iyöng Samarīa in nup tö ōtngöre inrē panam Lāmuh tö ngam Tahël, salām.

¹⁸Ngaich an ngam līpöre ngam sahöömtö yīö in ih nö löökö vinë-eṅkūö nö i kūö chu.

¹⁹Ngaich chin vītö chöngö, ngaich inrē nö chöhlöngö, ngaich angū-ö nö kôti tö ngih elpanam löktökūö mīsī chamôhòlre nö lā-al rācha tö e inrē nö ël e nö vīlöng minôṙô inhôngen chöngö inrē.

²⁰Rācha yik inrē tökalēḵ mī-i Yērusalem, yik mahayöng ngam panam nö keuheūtlöre Lāmuh tö ngam Tahël, tökē-ĕvkūö tö masūl, ṙāi ṙināhöt chehen ṙāi kūö chūök inrē.

²¹Lökten vītö chöngö hòṅ yip tarik nö vītuṙen nö sökngö tīre, hòṅ ngih el panam nö öt hēk nö vīlöngö, hanöng saha öp chöngö nö vīlöng tö chu.

²²Haṙēmngenre inrē un hāṅaṅ alaha in e angū-ö; kūöyòh ṙöng yanëngen nö sīöplö nö inchök rācha?

²³Ngaich hē ök insā mat ök līpöre aṅ in ök rācha Artarsarsös, nö vë-ekūö nö i kūö Rēhum, Simsai inrē ök kamūich tö yik hol cha kurāten cha-a ngaich nö kiröönngöre nö chuh in yik Yahūti i Yērusalem ngaich i kumlēḵ chöngöre nö tölṙô cha nö ṙāngen re.

²⁴Sökngöre ngaich ngam la-en im patī ngam Tēv ök i Yērusalem; ṙā-aiṙen angū-ö hanöng sāha ök innët samyeūheu Tērīös ök rācha aṅ Pörsia nö hayöng.