Read Car_Nicobarese ESRĀ 5 Bible Online

ESRĀ 5 - Car_Nicobarese bible

ESRĀ 5

¹Ngaich yik pròfĕt Hakai Sakarīa inrē kikōnyö kūön Aitō, nö vë-eny yanihih mu-unôich nö in yik Yahūti yik mi-ī Yūtā Yērusalem inrē, i minë-eny ngam Tēv Israĕl ngam mi-ikui cha.

²Ngaich Sērupāpĕl ök kikōnyö kūön Sī-ĕltiel, Yesuā inrē ök kikōnyö kūön Yōsatak nö choholre ngaich rultenre nö mānlö ngam patī ngam Tēv i Yērusalem; hol cha inrē yik pròfĕt ngam Tēv, nö holṙen cha.

³Hē e ang Tatēnai ök mahayöng ngam panam Lāmuh tö ngam Tahël ane inrē Satarpōsēnai yik hol cha inrē nö yih nö in cha ngaich vë-ekūö cha nö ngö ṙô, Chiāp kamë tö chöngö yīö mānlö ngih patī öi keuheūtö tī tö e nö sökhakaṙen?

⁴Hatönö cha inrē cha-a tö ngih, Chīöp minënyö yip tarik mamānlö ngih patī?

⁵Ngaich pöri ngam mat ngam Tēv cha nö i kui yik mā in yik Yahūti, ngaich cha-a nö öt asökngö tī cha hanöng saha öp vinënyö cha nö sölngö nö in Tērīös ngaich möl min öp sanap ṙô nö havan nö lökten i tökūichö līpöre.

⁶Ngam insā mat ngam līpöre tösöömi tö Tatēnai ök mahayöng ngam panam Lāmuh tö ngam Tahël, Satarpōsēnai inrē tö yik hol yik mahayöng i nup panam Lamuh tö ngam Tahël tösöömi nö in Tērīös ök rācha;

⁷Söömngö vinë-eny cha-a nö in ò, ök tö ngö kinūichö: Löö in Tērīös ök rācha, ṙòkhöre lanāmö.

⁸Akahalōn an yĕh ngam rācha tö ih öi chuh panam Yūtā, i patī öp tökiröng Tēv. Tökiröng nup ihong tökatöplöng nö in e ṙātu inrē savaich nö i nup kinlōngö; iṙūöhöröön an ngam la-en nöng pētngen kôlò inrē nö eltī cha.

⁹Ngaich īhö hatön yip mā vë-ekūö cha inrē öi ngö ṙô, Chiāp kamëtö chöngö yīö mānlö ngih patī öi keuheūtngen e nö sökhakaṙen?

¹⁰Hatönö cha īhö inrē tö minë-eny cha, pò i hòṅ eūkö elnang meh, hòṅ ih kūich minë-eny yip tarik yöngṙen cha.

¹¹Ngaich ngih ṙô cha nö sap ṙô ih: Tarik ngam Tēv halīöngö tumlat inrē in īhö, ngaich īhö mānlö ngih patī ngih tövīlöngö nö ṙōl samyeūheu misī, vahīlö ök tökiröng rācha aṅ Israĕl nö keuheūten.

¹²Kūö yik yöng ih pöri nö līnö tī tö ngam Tēv ngam halīöngö, ngaich kēngen cha anga-aṅ nö eltī Nēpukatnēsar rācha aṅ Pēpilön, ök aṅ Kālti, ök tumṙölngö ngih patī ngaich halaingö yik tarik nö i Pēpilön.

¹³Ik raneh samyeūheu Sairös pöri ök rācha aṅ Pēpilōn vī tö chöngö ök rācha Sairös nö hōten ngih patī ngam Tēv nö mānlöngö nö hēk.

¹⁴Nup humlum rupīö inrē chūökṙen im patī ngam Tēv, nuk tökē-ĕyö tö Nēpukatnēsar nö ṙā-ang el ngam tempöl ngam i Yērusalem ngaich kētu nö chaphötvö nö el tempöl i Pēpilön, kēnyu anū-ö tök rācha Sairös nö ṙā-ang el tempöl i Pēpilön, ngaich kētu anū-ö nö in ök töhĕng tak ök tö minënyu tö Sespassār, ök tövīlöngö tö ò nö mahayöng;

¹⁵Ngaich ngö ṙô anga-aṅ tö ò, Kē në chūökṙen, kuṙòh chaphöt u el öp tempöl i Yērusalem hökngen öp patī ngam Tēv nö mānlöng nö hēk nö i chūökre.

¹⁶Ngaich ngòh Sespāssar nö yih ngaich ṙātö rööntö machööḵlö ngam patī ngam Tēv ngam i Yērusalem; hēten tö e an söl ing töngamuh nö mānlöngö,

¹⁷Lökten, yē e nö tölöök tö lōn ngam rācha, chöhö nup yēḵ chūök inlinngen līpöre ngam rācha nö umuh i Pēpilön, nö ngëichka yē ök rācha Sairös nö kētö chöngö minānlö ngam patī ngam Tēv nö hēk i Yērusalem. Ngaich hökngen ngam rācha i kumchiklōn ò nö söömhöti nö in ih i ngih tö ngatī inlahen.