Read Car_Nicobarese ESRĀ 6 Bible Online

ESRĀ 6 - Car_Nicobarese bible

ESRĀ 6

¹Ngaich ök rācha Tērīös nö vī chöngö, ngaich chöhö nö i Pēpilön, el patī chūök inlinngen līpöre i chūök nuk līpöre nö hamūlīyö.

²Ngaich i Ekpatanā, tökiröng elpanam i panam Mītia, ök hĕng tölömö līpöre tökôti ök tö ngö kinūchö aṅ mat: Töhĕng kinṙötö.

³Ik raneh samyeūheu ök rācha Sairös kētö chöngö ök rācha Sairös. Tö inlahen ngam patī ngam Tēv i Yērusalem, hökngen ap patī nö hēk nö mānlöngö, ap chūök tökētu nö kētu töföngö inrē tökētu; tafūöl anāi sumkôngö rô-òlkui öp min tafūöl anāi sumkôngö inrē ṙôkti ël e,

⁴Lūöi mitöökö nup tökiröng ihong hĕng mitöökö inrē savach; hökngen nup ṙāi e min nö kētu nö ṙā-ang el chūök rupīö ngam rācha.

⁵Ane inrē hökngen nup humlum tö nup rupīö chūökṙen aṅ im patī ngam Tēv, nuk kahë Nēpukatnēsör nö el ök tempöl i Yērusalem ngaich halaitu nö i Pēpilön, hökngen u nö havantu nö hēk ngaich kētu nö ip tempöl öp i Yērusalem chaplö u min më-eṅ el patī ngam Tēv nö kö i chūök re.

⁶Yĕh lökten, Tatēnai, mahayöng ap panam Lāmuh tö ngam Tahël, Satörpōsēnīa, yip hol meh inrē mahayöng yip ing panam Lamuh tö ngam Tahël, ṙūhöng re;

⁷Hökngen ngam la-en i ngih patī ngam Tēv nö un asānka; hökngen öp mahayöng yip Yahūti tö yip mā yip Yahūti inrē nö hēk nö mānlö ngih patī ngam Tēv nö i chūök re.

⁸Vītö chöngö chin inrē töp la-en meh min in vē mā vē Yahūti i minānlö ngih patī ngam Tēv; hòṅ hateūngö ṙôken öp ṙāi nö kētu nö in vē tarik nö un hāṅen nö i nup rupīö rācha, nup masūl aṅ ip panam Lāmuh tö ngam Tahël.

⁹Nup törö-övö inrē kōiny kūön nuā, töt tāli kūön sīṅp hēk sīṅp töföngö tökētu nö im Tēv ngam halīöngö, maita, sāl, vāin, hēk tavī-i, sā lōn yip kūönṙô i Yērusalem. Hökngen u yēḵ nö kētu nö in cha nö kaheuk sakāmö nö un öt teung,

¹⁰Hòṅ cha nö kētu inṙamlōn tökētu nö im Tēv ngam halīöngö, ngaich vë-elkui nômö ngam rācha tö yip kūön ò inrē.

¹¹Vī chöngö chin inrē yĕn haṙī-iyö ngih chöngö tö töhĕng tak tarik, hĕng min öp milöönyö tö tūöknyu nö i patī ò, ngaich anga-aṅ min nö kôilöngö nö i kūö ò, ngaich öp patī ò min nö vītu nö rung sôḵ nuā.

¹²Ap Tēv ap yēḵ vamīten ngam minë-eny re nö iyöng in e nö kumringngö töng rācha hēk tarik öp kamëtö tī re nö haṙīngö ngih, hēk tiṙōlngö ngih patī ngam Tēv ngam i Yērusalem chu-ö chin Tērīös vamītö chöngö; hökngen e yēḵ nö kēkaṙen nö ṙēmen.

¹³Ngaich ang Tatēnai, ök mahayöng ngam panam Lāmuh tö ngam Tahël, Satörpōsēnai, tö yik hol cha inrē nö haṙēmngenre nö i chöngö ök rācha Tērīös, nö sā nuk ṙô tösöömtu tök rācha Tērīös.

¹⁴Ngaich yik mā yik Yahūti nö mānö ngaich öt kihngen, nö lökten i ṙô Hakai nö vë-eny yanīhö mū-unôich ök pròfĕt, Sakaria inrē ök kūön Aitō. Keuheūten cha-a ngaich töp patī i chöngö ngam Tēv Israĕl ane inrē i chöngö Sairös, Tērīös, Artārsörsös rācha aṅ Pörsia;

¹⁵Keuheūten ngaich ngih patī im linūöyö sakāmö ngam chingëṅt Atör, im tinfūölö samyeūheu ök rācha Tērīös nö hayöng.

¹⁶Ngaich yik tarik Israĕl, tö yik kūönṙô Lēvi inrē, tö yik hol cha tahëng mahavantöre nö tö ahötiyö, nö kēken ngam kinëten ngih patī ngam Tēv holtö ṙanāmölōn re.

¹⁷I kinëten ngih patī ngam Tēv cha-a nö hēngòng tī tö kōiny nuā, nëtòng töt tāli sīṅp, fënòng tö tāli sīṅp, ngaich tökētu inrē kūö tökööl yik aṅ Israĕl nët sīön nòng kōiny pököre sā tum miyöngö yik Israĕl.

¹⁸Ngaich cha-a nö ṙāḵ yik kūönṙô nö sā minchööḵlö cha tö yik Lēvī inrē nö ip hē cha, nö i la-en ngam Tēv nö i Yērusalem, sā kinūichngö e nö i mat līpöre Môsös.

¹⁹Im finën sīön sakāmö ngam raneh chingëṅt yik töha-ötiyö mahavantöre nö haköpkö ngam chinööḵngö.

²⁰Pò yik kūönṙô tö yik Lēvī nö hol re nö ahetlöre; ṙòkhöre cha-a ngaich nö het. Lökten cha nö ṙatnyö likeun nuk tö tāli sīṅp ngam chinööḵngö nö kūö yik töha-ötiyö mahavantöre nö ṙòkhöre, kūö yik hol cha inrē kūönṙô, kūö cha inrē;

²¹Kāḵa ngaich anū-ö tö yik tarik Israĕl yik mahavantöre nö ṙā-ang inhötngöre, kāḵa tö cha inrē yik mahanôltöre nö in cha mahaköhngen re inrē tö nup töthet aṅ i yip tarik ngam panam, nö salām ngam Mā Tēv, ngam Tēv Israĕl.

²²Haköpkö ngam tökiröng nyinā-aṅ töt aföhlöng rôtī cha-a inrē nö sat sumkam nö holtö ṙanāmölōn re; pò ngam Mā Tēv nö vīten cha nö ṙāmölōn; ngaich havöötökūö ellōn ök rācha aṅ Assirīa nö in cha, lökten ò nö holṙen cha i la-en ngam patī ngam Tēv, ngam Tēv Israĕl.