Read Car_Nicobarese ESRĀ 7 Bible Online

ESRĀ 7 - Car_Nicobarese bible

ESRĀ 7

¹Unôichrit ngih, hē Artāsörsös rācha aṅ Pörsia nö hayöng, ang Esrā kikōnyö kūön Sērāya, kikōnyö kūön Asariyā, kikōnyö kūön Hilkiyā,

²Kikōnyö kūön Sālum, kikōnyö kūön Sētòk, kikōnyö kūön Ahitöp,

³Kikōnyö kūön Amariyā, kikōnyö kūön Asariyā, kikōnyö kūön Mërayòt,

⁴Kikōnyö kūön Serahīyā, kikōnyö kūön Usī, kikōnyö kūön Pōki,

⁵Kikōnyö kūön Apīsuā, kikōnyö kūön Finehas, kikōnyö kūön Ēliasör kikōnyö kūön Āròn ök mākūö kūönṙô

⁶Ṙamā-ang Pēpilön ön ngòh Esrā. Töhuveū ök nö kūich im chöngö Môsös ngam kahëtö ngam Mā Tēv ngam Tēv Israĕl: ngaich ök rācha nö kētö nuk töng havëkö ò, pò ngam kël ngam Mā Tēv ò nö i kui ò.

⁷Rīkre inrē yik chamuh Yērusalem tarik Israĕl, im sinātö samyeūheu ök rācha Artāsörsös, rīkre inrē yik kūönṙô Lēvī inrē, tö yik tumkökṙôre yōmkūö inkūp inrē, tö yik tarik ök tempöl.

⁸Yih anga-aṅ ngaich nö i Yērusalem im tinneūyö chingëṅt, ngam mi-im sinātö samyeūheu ök rācha;

⁹Pòn im raneh sakāmö ngam raneh chingëṅt anga-aṅ nö kirööngngöre nö ṙā-ang Pēpilön, ngaich im raneh sakāmö ngam tinneūyö chingëṅt anga-aṅ nö sölngö nö i Yērusalem, kūö lanöökö tī ngam Tēv nö in ò.

¹⁰Pò Esrā nö kētö ellōnre nö haköp ngam chöngö ngam Mā Tēv, ngaich la-evṙen tö e, haköptö nup hachöngten ò inrē tö nup chöngö ò nö i Israĕl.

¹¹Ngih ön yih insā mat ök kahëtö ök rācha Artāsörsös nö in Esrā ök kūönṙô, kamūich, töpōi haköp nö i nuk chöngö ngam Mā Tēv tö nuk hachöngten ò in Israĕl:

¹²Artāsörsös, rāchakūö rācha, löö in Esrā ök kūönṙô, kamūich ngam chöngö ngam Tēv ngam halīöngö. Yĕh pöichö

¹³Vītö chöngö chin tö öp töhĕng tak aṅ in vē tarik Israĕl hēk vē kūönṙô cha hēk vē Lēvī ing pūlngö chu, vē kamahang lōnre nö hòṅ chuh Yērsalem, kiröönngöre nö kô-òren nö hol meh.

¹⁴Pò meh tīniyö tö ngam rācha tö yip tösat tak inrē mahalēnö ò öi hatöntöre tö inlahen Yūtā Yērusalem inrē nö sā ngam chöngö ngam Tēv yīö, ngam eltī meh

¹⁵Ane inrē kumtö rupīö humlum inrē nup kahëtö ngam rācha tö yip mahalēnö ò inrē nö kahanglōn re nö im Tēv Israĕl, ngam tö elyönguvö töp i Yērusalem,

¹⁶Nö holtö nup rupīö humlum inrē nup kanôtökūö meh min i nup panam Pēpilön, holtö nup kanahanglōn tökētu tö yip tarik kūönṙô inrē nö kilēḵngôre nö chūökuṙô nö hōḵ nö kētö u kūö ngam patī ngam Tēv cha ngam i Yērusalem.

¹⁷Aṅtī tö në rupīö, më-eṅ yēḵ ngaich haṙēmngenre havah kōiny nuā, töt tāli sīṅp, tötāli sīṅp, holtö nup, sāiny tökētu tö-ôkö inrē tökētu, ngaich më-eṅ min el öp tahāklö ngam patī ngam Tēv meh ngam i Yērusalem öm kētö u.

¹⁸Öp töng löök tö lōn meh tö lōn yip hol meh inrē nö la-en nup chööḵṙen rupīö humlum inrē, la-evṙen më-eṅ kô-òren, sā lōn ngam Tēv meh.

¹⁹Nup chūökṙen kinë-eṅkūö meh nö ngaich nö i la-en ngam patī ngam Tēv meh, kētö u min më-eṅ ikūö ngam Tēv i Yērusalem.

²⁰Nup tö öltöre lōn meh im patī ngam Tēv meh, nup tö hēk pi-a nö hòṅ meuktuṙen, meukten më-eṅ kô-òṙen ṙā-ang el chūök rupīö ngam rācha.

²¹Ngaich chū-ö, rācha Artāsörsös, öich vītö chöngö in yip yōm rupīö im panam Lāmuh töm Tahël: Nup töng lōn Esrā ngam kūönṙô nö in yīö ngam kamūich chöngö ngam Tēv halīöngö, kēkö kaha e holtö ṙanëmenre,

²²Tölngö töhēngòng tālen rupīö, hēngòng kōr maita, hēngòng pāt vāin, hēngòng pāt tavī-i sā töt kaheūkö ṙôken.

²³Nup töng chöngö ngam Tēv halīöngö, hökngen e nö hateūngö ṙôken nö im patī ngam Tēv halīöngö, hòṅ ngam lanīnö ò min nö öt im pūlngö ngam rācha tö yip kūön ò inrē.

²⁴Mikahtölōn yīö in inrē tö e min nö töchōich yē yīö kē masūl, ṙāi ṙināhöt chehen, hēk ṙāi inchūökkö kūö chūökö öi ip töhĕng tak i vē kūönṙô, Lēvī, tumkökṙôre, yōmkūö inkūp yip tarik ngam tempöl, hēk yip tahëng tarik ngam patī ngam Tēv.

²⁵Ngaich më-eṅ Esrā sā ngam mikah ngam Tēv meh ngam më-eltī meh, vīlö kamhôṅka ma-akah fālen inrē nö ma-akah fālen yip tarik im panam Lāmuh tö ngam Tahël ṙòkhöre yip töhuveū-en nö i nup chöngö ngam Tēv yīö; ngaich cha-a inrē yip tö öt akahakūö tö u, haköpten cha më-eṅ.

²⁶Öp töt hamang chöngö ngam Tēv yīö min chöngö ngam rācha inrē, hökngen öp kinṙôka nö kēka alaha nö in ò, yĕn kinpaha, hēk yĕn sinöömhanga hēk yĕn kinë-eṅ nup inlānen ò hēk chinaphöt el kinlōngö.

²⁷Tökôlò an yēḵ ngam Mā Tēv, ngam Tēv yik yöng hī, ngam chamaphöt töngatī nö ellōn ngam rācha, nö hinôtö ngam patī ngam Mā Tēv nö havailöng ngam i Yērusalem,

²⁸Ngam tamrākhökūö chu tö ngam tököp hanāngenlōn ò öich i kūö ngam rācha i kūö yip mahalēnö ò inrē i kūö yip tökiröngö chöngö inrē mākūö im rācha. Öt pa-ekūö chū-ö ngaich, pò ngam kël ngam Mā Tēv ngam Tēv chu nö i kui chu, hamūl yik yöngṙen tarik chū-ö ngaich in yik Israĕl nö hol chu kiröönngöre.