Read Car_Nicobarese ESRĀ 8 Bible Online

ESRĀ 8 - Car_Nicobarese bible

ESRĀ 8

¹Vē yin yöngkūö patī yik yöng cha, ngaich angū-ö ngih lökngörit cha yik kumröönngöre nö hol chu ṙā-ang Pēpilön, hē ök rācha Artāsörsös nö hayöng:

²Aṅ in yik kikōnyö kūön Finehas, Kērsōm. Aṅ in yip kikōnyö kūön Itamār, Taniĕl. Aṅ in yik kikōnyö kūön Tāvit, Hatus,

³Aṅ in yip kikōnyö kūön Sēkaniyā, Aṅ in yip kikōnyö kūön Pāròs, Sakariyā, hol cha nö kaheuktu yik töhēngòng taneui anāi tarik.

⁴Aṅ in yik kikōnyö kūön Pāhat Mô-ap Elī-ehōenāi kikōnyö kūön Sērāhia, hol ò inrē nö nëtòng tarik.

⁵Aṅ in yik kikōnyö kūön Sātu, Sakaniyā ök kikōnyö kūön Yahasī-el, hol ò inrē yik tölūöyòng tarik.

⁶Aṅ in yik kikōnyö kūön Atin; Epĕt kikōnyö kūön Yônatan, hol ò inrē taneui anāi tarik.

⁷Aṅ in yik kikōnyö kūön Ēlām, Yēsaiyā kikōnyö kūön Ataliyā, hol ò inrē sat anāi tarik.

⁸Aṅ in yip kikōnyö kūön Safatiya, Sapatiya kikōnyö kūön Maiköl hol ò inrē hëvöre anāi tarik.

⁹Aṅ in yip kikōnyö kūön Yô-ap, Opētiya ök kikōnyö kūönYēhi-el, hol ò inrē nëtòng hëvöre sīön tak tarik.

¹⁰Aṅ in yip kikōnyö kūön Pānī Selōmit ök kikōnyö kūön Yôsifiya, hol ò inrē hēngòng tafūöl anāi tarik.

¹¹Aṅ in yip kikōnyö kūön Pēpai, Sakariya, ök kikōnyö kūön Pēpāi, hol ò inrē nët anāi hëvöre tak tarik.

¹²Aṅ in yip kikōnyö kūön Askat, Yôhanan, ök kikōnyö kūön Hakatan, hol ò inrē hēngòng söm tak tarik.

¹³Aṅ in yik kikōnyö kūön Atônikam, yik yamih nö unôich, në nun minë-eny cha Ēlīfëlet, Yū-el, Semayā inrē, hol cha inrē tafūöl anāi tarik.

¹⁴Aṅ in yik kikōnyö kūön Pikvai, Utāi, Sakūr inrē, hol cha inrē sat anāi tarik.

¹⁵Hamūlö cha chū-ö ip tahël töhëm nö kū-ötö Ahavā, ngaich in e īhö lūöi sumkam iyöngtöre. Hē chu ngëichkö yik tarik tö yik kūönṙô, ngaich kôtökūö chū-ö tö Lēvi nö öt kūönu tö kikōnyö nö umuh.

¹⁶Ngaich chū-ö tīnngö lamukken Ēlīasör, Arī-ĕl, Simayā, Elnatān, Yārip, Etnatān, Natān, Sakariyā, Mesulam inrē yöngkūö yik tarik havëken Yōyarip inrē tö Elnatā, nak tö akaha elmat,

¹⁷Ngaich tīnngen cha nö in Aitō, ök yöngkūö tarik ik chūökö Kasīfīa, kilēḵngen cha töp ṙô nö in Aitō i yip hol ò inrē yip tarik ök tempöl ip chūökö Kasifia, nö tīntö mameukṙen nö in ih im patī ngam Tēv hī.

¹⁸Ngaich lökten ngam tölöök tī ngam Tēv nö i kūi ih, ngaich cha-a nö kumtö ök tarik töhuveū-en nö in ih, aṅ in yik kikōnyö kūön Mahli ök kikōnyö kūön Lēvī, kikōnyö kūön Israĕl, ang Sarāpiya holtö yik kikōnyö kūön ò mak alaha ò inrē, hëvöre sīön tak;

¹⁹Hasapayā inrē hol ò inrē Yēsayā in yik kikōnyö kūön Merārī, holtö yik mak alaha ò tö yik kūön cha kikōnyö, nët anāi;

²⁰Nëtòng nët anāi yik hol cha tarik ngam tempöl, yik töhakösiṙen tö Tāvit tö yik mā in ò inrē nö hamòlṙen yik Lēvi. Ṙòkhöre yin cha-a nö vënyu minë-eny.

²¹Ngaich umuh chū-ö ahangkö inhīkö, ip tahël Ahavā hòṅ ih hayāichngöre i kūö ngam Tēv, öi chöh öp tö chip talöökö ih in ò, tö vē kūön ih, tö në chehen ih inrē nö ṙòkhöre.

²²Pò chu sirōngkūö havëkö kumyung aṅ ip rācha tarik nö lamaklen ih i tö kunyaha elmat tö ih el talöökö ih; pò ih ngāichö ṙô ik rācha, Tö ngam kël ngam Tēv ih nö tölöökö tī nö in cha yip chamööhan, ngam kumlēḵ ngam lanīnö ò inrē nö lā-al cha yip ṙamāngen ò.

²³Lökten ih ahik ngaich vë-ekūö ngam Tēv inrē tö e, ngaich Anga-aṅ nö hang ṙô ih.

²⁴Ngaich chū-ö haköhngen yik tö nët sīön tak yöngkūö kūönṙô: Serapiyā, Hasapiyā, söm tak yik inrē mak alaha cha nö hol cha.

²⁵Ngaich chū-ö kalah lumngan rupīö,, humlum inrē tö nuk chūökṙen öich in cha, nuk tökētu nö im patī ngam Tēv ih nuk kahëtö ök rācha tö yik mahalēnan tö yik mā in ò tö yik Israĕl inrē umuh;

²⁶Eltī cha tī chū-ö kalah lumngan tafūölòng taneui anāi tālen rupīö, (22 Metric Tons) rupīö inrē chūökṙen hēngòng tālen ṙāi, hēngòng tālen humlum inrē.

²⁷Nët anāi töchilū humlum hĕng köṅny tālen ṙāi (8.4 Kg), nët nuk chūökṙen tövai tö ayānga mās töpōirāi nö sā humlum (3,400 Kg).

²⁸Ngaich ngö ṙô chū-ö tö cha, Töhet yin yī-ö im Mā Tēv, töhet inrē në chūökṙen; ngaich minë rupīö tö minë humlum inrē nö kanahanglōn nö tökētu nö im Mā Tēv, ngam Tēv yik yöng yīö.

²⁹Meukö u halinngen u hanöng saha yīö kalah lumngan u i kūö yip mākūö kūönṙô Lēvī inrē tö yip yöngkūö patī yik yöng i Israĕl i Yērusalem, el nup urôhò ngam patī ngam Mā Tēv.

³⁰Lökten yik kūönṙô tö yik Lēvī inrē nö kēḵ lumngan nuk rupīö tö nuk humlum tö nuk chūökṙen inrē, nö kētö u nö i Yērusalem, nö i patī ngam Tēv hī.

³¹Kiröönngöre īhö ngaich ṙāngö öp tahël Ahavā im innët sīön sakāmö ngam raneh chingëṅt, öi chuh Yērusalem; i kui ih ngam kël ngam Tēv ih ṙānyen ih Anga-aṅ inrē ṙā-ang eltī tökunyaha elmat ṙā-ang im inyūnö inrē el talöökö.

³²Sölta ngaich īhö i Yērusalem, ngaich lūöi sumkam īhö höngngöh umuh.

³³Im finënö sakāmö, el patī ngam Tēv ih, nö kalah lumngan minë rupīö, humlum tö nuk chūökṙen inrē nö eltī Meremòt ök kūönṙô, kikōnyö kūön Ōriya, hol ò inrē Ēliasör ök kikōnyö kūön Finehas, hol cha inrē yik Lēvī, Yôsapet ök kikōnyö kūön Yesu-a, Nō-atiyā inrē ök kikōnyö kūön Pinnūi.

³⁴Ṙòkhöre anū-ö nö kaheūkö kalaha lumngan inrē, ngaich nuk lumngan u nö ṙòkhöre nö kūichiyö.

³⁵Hē e yik yamih nö ṙā-ang el inkövö, yik mahavan nö ṙā-ang inhötngöre, nö kētö töföngö tökētu nö im Tēv Israĕl, nët sīön nòng kōiny nuā kūö yik Israĕl nö ṙòkhöre, machūötöre anāi tafūöl töt tāli sīṅp, sat anāi tötāli sīṅp, ngaich tökētu inrē kūö tökööl nët sīön nòng kōiny pököre; ṙòkhöre anū-ö në nö töföngö tökētu nö im Mā Tēv.

³⁶Ngaich cha-a inrē nö kētö öp chöngö ök rācha nö in yik Setrāk tö yik mahayöng im panam Lāmuh tö ngam Tahël; ngaich cha-a nö holṙen yik tarik tö ngam patī ngam Tēv inrē.