Read Car_Nicobarese ESRĀ 9 Bible Online

ESRĀ 9 - Car_Nicobarese bible

ESRĀ 9

¹Hē kinheūṅten në, yik mākūö nö yihtöre nö in chu nö ngö ṙô, Hö-ö yin vē tarik Israĕl tö vē kūönṙô tö vē Lēvī inrē nö haköhngen re tö vē tarik në panam tö nuk sin-òkkūö in cha inrē, öt haköhngen re tö aṅ Kanā-an, Hitait, Peris, aṅ Amôr Mô-ap, aṅ Aikup, aṅ Amôr inrē.

²Pò cha nö kē yip rīkre kūön cha kikānö nö pīhö cha pīhö kūön cha tö kikōnyö inrē; ngaich vē töhet tarik kalūöchtöre nö in vē tarik në panam. Ngaich in ngih tökô-en ṙinātö ellōn ngam eltī vē mākūö tö vē yöngkūö vē mā vē tarik nö urööṙen.

³Hē chu hāngö e tikaichngö inyut re chū-ö ngaich tö ök tökiröng inyut chu, teuklö keūyöre inrē ikuire teuklö sanôikūö re inrē ūichngöre ngaich öich pingangkūö.

⁴Ngaich ṙòkhöre yik tö kichëyöre tökūö ṙô ngam Tēv Israĕl, kūö ngam tötkô-en ṙinātö ellōn in yip mahavantöre nö ṙā-ang i inhötngöre nö hamūlöre nö havīlen chu hē chu ūichhakṙen pingangkūö hanöng saha öp tökētu tö harap.

⁵Hē öp tökētu tö harap chū-ö chōholre ṙā-ang i inhīkö tö chu, öich höng takācha inyut ök tökiröng inyut chu inrē, ngaich sim tö kui kinmônöre chū-ö hanyāṅknyö këlre inrē im Mā Tēv ngam Tēv chu.

⁶Öich ngö ṙô: Mā Tēv chu, sirōngkūö chin aṙē-ĕv inrē öich môklökūöre in Meh, Tēv chu kūö në öt lanöökö ih nö reunglöre nö lā tulöng tö kui ih, në fālen ih inrē nö yônlö nö el halīöngö.

⁷Löktökūö nuk sakāmö yik yöng ih söl ing töngamuh in öi kiröngö fālen; kūö öt lanöökö ih inrē, tö yik rācha ih, tö yik kūönṙô ih öi kētu eltī vē rācha në panam, öi i kūö sanët, i inkövö, i kinëngö inlānen ngaich nö yöng sumrōngkūö, sā e nö ing töngamuh.

⁸Ngaich pöri töngamuh nöng rahëichtaṙen nö hameuktu ngam miṙēlōn ngam Mā Tēv ngam Tēv ih, nö ṙāngen ih chööḵṙen, kē-ĕkūö ih inrē tö linaklöre el ngih töhet chūök, hòṅ ngam Tēv nö ahatlö elmat ih el ngih inkövö.

⁹Pò ih tarik töhakövö; sönen pöri ngam Tēv ih nö öt ṙāngen ih el inkövöre, kē-ĕkūö ih pöri tö ngam tököp hanāngenlōn re i kūö yip rācha aṅ Pörsia, nö kē-ĕkūö ih tö anahlö öi asöklö ngam patī ngam Tēv ih, öi vī tit tö taṙōli in e, kētö lanaklö ih inrē i Yūtā, Yērusalem inrē.

¹⁰Yĕh pöchö Ō Tēv ih, sitih ṙô öi min unôichrit ngih? Tö ih ngaich ṙāngö minë chöngö meh,

¹¹Minë chöngö Meh in yik tarik Meh pròfĕt, öm ngö ṙô, Ngam panam chūök meh kuhēthötre, öm kē-ĕ e nö amin meh, panam töthet an nö hol re tö inchōichngöre tö yip tarik aṅ kūö në panam, nö aṅtī tö nup sin-òkkūö tanöölö e nö keuheūtngöre chūök tö nup öthanëtö cha inrē.

¹²Lökten in kētö kūön re tö kikānö nö pīhö yip kūön cha kikōnyö, unrēhĕn kē yip kūön yīö kikōnyö, ui chöh lanāmö in cha hēk kanôlò, hòṅ yīö kalēḵ nyā-avkūö inrē tö nup tölöök aṅ ngam panam, ngaich ṙātö e nö amin yip kūön yīö nöng örheūheu.

¹³Ngaich in teunghukui tökūö në la-en re tötlöök kūö tökiröng fālen ih inrē, ngaich Më-eṅ, Tēv ih sācha tī tö ih öm kūöṅnen tī tö ṙôken nuk fālen ih ngaich kē-ĕkūö ih īhö chööḵṙen tö tö ngatī,

¹⁴Hēk öyih min finlalngö në chöngö Meh öi pīhivö tö tarik vē maharūnöre nö i sin-òkkūö? Röh öm min tainy in ih hanöng saha Meh hatngötī tö ih, lökten min nö öt ōtre chööḵṙen, ötrēhĕn nö tötkô-òng vahvö?

¹⁵Ō Mā Tēv, ngam Tēv Israĕl, töchip Man, pò ih īhö chööḵṙen tö ōtre öi tötkô-òng, sā e nö ngaich i ngih sakāmö. Yĕh meuk i kūö Meh in öi ing fālen re öt hĕng tak tökô nö sökhak nö i kūö Meh tökūö ngih.