Read Car_Nicobarese NAHIMIĀ 1 Bible Online

NAHIMIĀ 1 - Car_Nicobarese bible

NAHIMIĀ 1

¹Në ṙô Nahimiā ök kikōnyö kūön Hakaliyā. Ngö lāinyngen an ik chingëṅt Kislev, im innët anāi samyeūheu, hē chu i Sūsā öp tökiröng elpanam,

²Tö Hanānī, töhĕng tak aṅ in yip hol chu, yih nö hōlu tö yik rīkre tarik nö ṙā-ang Yūtā; ngaich chū-ö hatönö cha tö inlahen yik tö-aṅ Yahūti, yik töt kô-òngvah nö ahötiyö, hatön inlahen Yērusalem inrē.

³Ngaich ngö ṙô cha-a tö chu, Yip tö ōtren nö aṅ umuh ip panam yip tö kiröngö kanihngen yip tö sirōngkūö inrē; tiṙöli ap kinlōngö Yērusalem, ṙāpngö inrē nuk inkūp e tökūö tameūyö.

⁴Ngaich hē chu hang në ṙô ūichngöre chū-ö ngaich öich peūny, ṙōl sumkam inrē öich haṙivlōn ngaich höng iṙūhen chū-ö ahik havë-a inrē i kūö ngam Tēv halīöngö.

⁵Ngö ṙô chū-ö, Ō Mā Tēv ngam halīöngö, tökiröng Tēv inrē tö pahë-ev mahaköp kinlēḵngô tököpö hanāngenlōn inrē tö cha yip tö hāngenlōn tö ò mahaköp nup chöngö ò inrē;

⁶Hökngen ngam elnang Meh nö hangihtöre, minë mat inrē nö milakhak, hang ṙô ngòh tarik meh nö havë-a në ṙô chu hatööm sakāmö tökūö vē tarik Israĕl, vënyö nup tökööl vē tarik Israĕl, nup tökööl fālen ih in Meh. Hòṅ, köölö fālen chin chū-ö tö patī öp yöng chu kikōnyö inrē.

⁷Chōchö inlahen in öi in Meh, hö-ö in inrē haköp në chöngö Meh, inchöngten, në chöngö inrē në hachöngten Meh ik tarik Meh Môsös.

⁸Köpölōn tö ngam ṙô Meh öm tölṙô ök tarik Meh Môsös, Öm ngö ṙô, Yē yīö öt kô-en pirātngen yīö chū-ö min in vē tarik;

⁹Yē yīö pöri havantöre in chu ngaich haköp në chöngö chu lā-evṙen inrē tö u, pòrô öp pinrātngö yīö min nö ip tömarôvat elkatòh ngam halīöngö, ngaich ṙeū-eung in e chū-ö min hamūlö cha ngaich kēten cha ip chūökö öp atöllö chu, öich vītö ngam minë-enyre nö iyöng umuh.

¹⁰Tarik Meh yin kūön alaha Meh inrē, vē töṙānyu tö ngam tökiröng minhôiṅyö Meh tökalēḵ kël Meh inrē.

¹¹Ō Mā, hökngen ngam el nang Meh nö hangihtöre tö ṙô ngòh tarik Meh nö havë-a, tö ṙô vē tarik Meh inrē nö havë-a vē tö kuchikölōn nö pa-ekūö tö minë-eny Meh; kētö taneunglen inrē in ngòh tarik Meh töngamuh, ane inrē kētö miṙēlōn in ò i kūö ngòh tarik. Sumlô kōp chū-ö in öp rācha ik hē e.