Read Car_Nicobarese NAHIMIĀ 13 Bible Online

NAHIMIĀ 13 - Car_Nicobarese bible

NAHIMIĀ 13

¹Ik sakāmö angū-ö cha-a nö löktökūö ök līpöre Môsös nö vë-ekūö e nö elnang yik tarik; ngaich kôtökūö tö e nö kūichiyö tö yik aṅ Amön hēk aṅ Mô-ap nö öt hētu nö kuhēthötre i manūlö ngam Tēv;

²Pò cha nö öt höngkūö yik kūön Israĕl tö nyā-aṅkūö mak inrē, haṙāyö Pēlām pöri nö lā-al cha nö rūtngövah cha, sön pöri ngam Tēv hī nö havöötö ngam rinūtngen nö inkôlò.

³Hē yik tarik nö hang ṙô ngam chöngö ngaich cha-a nö haköhngen yik kūön aṅ tahëng pumnāmö tö yik Israĕl.

⁴Urēhĕkūö e sin, Ēlīasip ök kūönṙô, ök töhalēnlöng nö i nuk tökiröng urôhò ngam patī ngam Tēv hī, ök tönôlngö inrē nö in Topiya,

⁵Halēnlö tökiröng anga-aṅ urôhò Topiya ök chūök tī cha sin nö lā urĕh nö chaphöt sāiny nuk tökētu nö umuh tötahūsa, chūökṙen, töhĕng i tösöm sāiny, vāin, tavī-i inrē nuk tökētu i chöngö yik Lēvi, tumkökṙôre, yōm inkūp inrē, nuk tī inrē lamöö in yik kūönṙô.

⁶Hē e angū-ö nö kēkaṙen öt i Yērusalem chū-ö, pòn im tölūöi anāi nët samyeūheu Artāsörsös ök rācha aṅ Pēpilön öich chuh ik rācha. Unôichrit tö rēh rô-òten chū-ö havë-engritre ik rācha

⁷Ngaich yih i Yērusalem, ngaich möl chū-ö kôtökūö tök tötlöök tī Ēliasip nö holṙen Topiya, halēn chūök ò tö tökiröng urôhò nö el milūkö ngam patī ngam Tēv.

⁸Ngaich chū-ö tainy, ngaich kavalngö nuk chehen Topiya nö ṙā-ang el ök urôhò tökiröng.

⁹Kētö chöngö chū-ö ngaich, ngaich cha-a nö ahetlö nuk tökiröng urôhò; ngaich chū-ö inrē kētö nuk chūökṙen ngam Tēv nö umuh, hol tö nup sāiny tökētu tötahūsa inrē.

¹⁰Ngaich chū-ö inrē kôtökūö tö nuk michööḵ-ö yik Lēvi nö öt kētu nö in cha; lökten yik Lēvi tö yik tumkökṙôre inrē, yik töla-evṙen, nö kö falngöre nö i panô-òṅre.

¹¹Lökten chu vëken yik mākūö öich ngö ṙô. Kūöyòh öng ngih patī ngam Tēv nö ṙā-ayö? Ngaich chū-ö hamūlö cha ngaich ṙāten cha nö i chūök cha.

¹²Ngaich ṙòkhöre yik aṅ Yūtā nö kētö töhĕng nö i tösöm sāiny, vāin, tavī-i inrē nö el patī inchūökngö nya-aṅkūö.

¹³Ngaich chū-ö halēnlö yōm rupīö i nuk patī chūök inchūökngö nya-aṅkūö tö Selamiya ök kūönṙô Sētòk ök kamūich, Peteya aṅ in yik Lēvi, hamòlṙen cha inrē Hanan ök kikānö kūön Sākūr, kikōnyö kūön Mataniya, pò cha nö akahaiṙen nö tökô-en; ngaich la-en cha angū-ö nö michööḵ yik hanöng kisānöre.

¹⁴Ō Tēv chu, köplōn tö chu in e, un sīchiyö nuk tölöök la-en chu tö ngaich i ngam patī ngam Tēv chu i la-en Ò inrē.

¹⁵I nuk sakāmö anū-ö chū-ö meuk yip tarik i Yūtā nö karān vāin hē el anôilö, afônglö sāiny inrē nuk kum cha hakeunlö u inrē nö i uk köttö; vāin inrē, ṙòng vāin inrē, anychīr, keuheūttöre mihëṅṙö inrē nup tölangan, nup kum cha nö löö Yērusalem hē el anôilö sakāmö; ngaich chū-ö vëken cha ik sakāmö cha nö inyihkö nyā-aṅkūö.

¹⁶Tarik aṅ Tūrös inrē, yik mi-iyöng im elpanam, kumtö kāḵ tökeuheūttöre mihëṅṙö chehen inrē ngaich inyihkö u hē el anôilö nö in yik tarik aṅ Yūtā, i Yērusalem inrē.

¹⁷Ngaich chū-ö vëken cha holtö yik mā aṅ Yūtā öich ngö ṙô tö cha, Asuh öng ngih tötlöök ngam la-en yīö, hachōichngö ngam töhet sakāmö?

¹⁸Röh yik yöng yīö misī nö ngatī la-en, ngaich rö-ö hòng ngam Tēv hī nö kētö në tötlöök nö i kui hī i kui ngih elpanam inrē? Ngaich yī-ö iṙūhen kētö lanīnö nö i kui Israĕl i inchōichngö anôilö.

¹⁹Yē e nö sangulköti nö i nup inkūp i Yērusalem urēhĕkūö anôilö, chöngu chū-ö ngaich tö nup inkūp nö öptukūö kētö chöngö inrē tö u nö öt löpnyukūö höng lā unôich töp anôilö. Ṙātö yik rēvre chū-ö tarik re nö i nuk inkūp hòn öt keunhötvö tö langan hē el anôilö sakāmö.

²⁰Ngaich yik mi-inyihkö chehen ane inrē mi-inyihkö tökeuheūttöre mihëṅṙö chehen nö iyöng lā uk Yērusalem hĕng heuh hēk nët heuh.

²¹Vëken cha pöri chū-ö öich ngö ṙô tö cha, Kūöyòh öi iyöng lā kūö ngam kinlōngö? Yē yīö ngatī hēk kētö tī re chin min in yīö. Hēngen tö e cha-a nö öt yih hē el anôilö.

²²Ngaich chū-ö tölṙô yik Lēvi öich hōten cha nö ahetlöre ngaich yih nö aṅtö kūö inkūp, haköpkö ngam anôilö sakāmö inrē nö töhet. Ō Tēv chu, köpölōn inrē tö ngih nö in chu, aṙēlen chu inrē sā ṙôken öp tököp hanāngenlōn Meh.

²³Hē nuk sakāmö chu-ö inrē meuk yik Yahūti yik tö pīhö tö kikānö aṅ Astòt, Amön. Mô-ap, inrē;

²⁴Ròngti yik kūön cha töng ṙô tö ṙô aṅ Astòt, öt huevū-eu ṙô cha-a nö ṙô tö ṙô aṅ Yūtā, höngkö ṙô tö ëlô yik tarik pöri.

²⁵Ngaich chū-ö lā-alkūö cha rūtngövah cha inrē rīkre tö cha yik tö fōhoh ngaich nyòṅklöng keūyö inrē; ngaich vīten cha chū-ö nö chūökuṙô nö kilēḵngôre i minë-eny ngam Tēv, öich ngö ṙô, Uh yin kētö yip kūön re kikānö nö in yip kikōnyö kūön cha, hēk in yip kikōnyö kūön cha, hēk un kē yip kūön cha kikānö nö pīhö yip kūön yīö kikōnyö hēk pīhö yīö.

²⁶Röh ök Sòlòmön ök rācha Israĕl nö köölö fālen kūö tö ngatī kikānö? Öt asā-av pöri anga-aṅ nö in vē tömaṙôngö pumnāmö tarik nö rācha, hanāngenlōn ngam Tēv ò inrē, ngaich vīlen ò ngam Tēv nö rācha nö i kui Israĕl; ngaich pöri yik aṅ tahëng pumnāmö kikānö nö vīten ò nö köölö fālen.

²⁷Ngaich öi pökeh hang ṙô yīö öi la-evṙen tö në tökiröng tötlöök öi hayuntö inlaha re lā-al ngam Tēv hī i pinīhö tö aṅ tahëng pumnāmö kikānö?

²⁸Ngaich hĕng tak ök aṅ in yik kikānö kūön Yehōyata, ök kikōnyö kūön Ēliasip ök mākūö kūönṙô, nö köinykūön Sanpalāt ök aṅ Hōròn; lökten chu lūḵ an nö ṙā-ang in chu.

²⁹Ō Tēv chu, köpölōn tö cha pò cha nö hachōichngö ngam la-en kūönṙô ngam kinlēḵngô ngam la-en kūönṙô inrē tö yik Lēvi inrē.

³⁰Ngatī inlahen chū-ö ahetlen cha tö nuk aṅ i tahëng pumnāmö, ngaich chū-ö haköpngö minë la-en kūönṙô,Lēvi inrē, nö kö i la-enre;

³¹Ngaich chū-ö meukten ngòh tökētu, i nuk töhalēnglöng ṙētak, nuk lanòhlòng chōn inrē. Ō Tēv chu, köpölōn tö chu örheūheu.