Read Car_Nicobarese NAHIMIĀ 2 Bible Online

NAHIMIĀ 2 - Car_Nicobarese bible

NAHIMIĀ 2

¹Im chingëṅt Nīsan, im innët anāi samyeūheu ök rācha Artāsörsös, hē ò nö aṅhavkūö tö vāin, kē ök vāin chū-ö ngaich kētö e nö ik rācha. Höng törö-ö chū-ö hēṙu ūnngen i kūö ò.

²Ngö ṙô ngaich ök rācha tö chu, Kūyòh öm ūnökūö, yĕh meuk tö meh öt vahav? Öt tahëng an angū-ö höng anū-unglōn pöri. Ngaich chū-ö kiröngö pinhë-ekūö.

³Ngö ṙô chū-ö ngaich tök rācha, Hökngen ngam rācha yēḵ nö örheūheu nö aṅ? Kūöyòh öich öre öt ūnökūö, yē ap elpanam, ap chūök kui kupah yik yöng chu nö hulalhaka nö öt aṅhavkūö, nup inkūp e inrē nö ṙāpngö tökūö tameūyö?

⁴Ngö ṙô ngaich ök rācha tö chu, Öp yòh öp pökeh havëkö meh? Lökten chu vë-ekūö ngam Tēv halīöngö.

⁵Ngaich ngö ṙô chū-ö tök rācha. Yē ngam rācha nö kuchīkölōn tö e, yē ngòh tarik meh inrē nö aheukhuvö nö i kūö meh, öm tīnten chu chuh Yūtā, ip elpanam chūök kui kupah yik yöng chu kikōnyö, hòṅ chu vīlen e hēk.

⁶Ngaich ngö ṙô ök rācha tö chu (ūichhak ök rāni nö in ò), I rô-angṙen öm min ngaich i hē min inrē öm havan? Ṙāmölōn ngaich ök rācha nö tīnngen chu; ngaich chū-ö kētö ṙētak in ò.

⁷Ngö ṙô chū-ö inrē tök rācha, Yē ngam rācha nö kuchīkölōn nö in e, yĕh hökngen öp tö kūichö līpöre nö kētu nö in chu nö lamöö in yip mahayöng panam, Lāmuh tö ngam Tahël, hòṅ cha nö halöngten chu lök umuh hanöng saha chu sölta i Yūtā;

⁸Hĕng inrē öp tökūichö līpöre löö in Asaf, ök yōm öp el inchōn ngam rācha, hòṅ ò nö kē-ĕkūö chu tö chōn nö mikeūnö nup inkūp öp chūök kumyung ip tempöl, chōn kinlōngö öp elpanam inrē, chōn öp patī chu inrē chūök chu iyöng. Ngaich ök rācha nö kētö nuk havëkö chu, pò ngam kël ngam Tēv nö löök nö i kui chu.

⁹Sölta chū-ö ngaich in yik mahayöng panam Lāmuh tö ngam Tahël, ngaich kē-ĕkūö cha tö nuk tökūichö līpöre aṅ ik rācha. Ngaich ök rācha nö tīntö hol chu tö mākūö kumyung aṅ uk kōra inrē tarik.

¹⁰Hē Sanpalāt pöri ök aṅ Hōròn; Tōpīa inrē ök tarik, ök aṅ Amön nö hang ngih, kunyāhalōn tī angū-ö tö cha nö kiröngen pòn hĕng tak öp yamih lamukkö inkôlò yik kūön Israĕl.

¹¹Sölta chū-ö ngaich i Yērusalem lūöi sumkam chū-ö ngaich in e.

¹²Chōholre chū-ö ngaich tö hatööm, haroh tumtak yik tarik hol chu; ngaich chū-ö öt hĕng tak vahë-eny nang töp la-en chu i Yērusalem tö chaphötvö tö ngam Tēv nö ellōn chu. Öt aṅhav-in chū-ö tö töṙeūla höng ök tö aṅhav-uk tö chu.

¹³Kunyī-inyre chū-ö tö hatööm löknyö ök el Achāṙö Inkūp ök tö kū-ö tö ök inkūp Sôḵ nuā, ngëichkö nuk kinlōngö Yērusalem chū-ö inrē nuk tötaṙöli nuk inkūp inrē töṙāpngö tökūö tameūyö.

¹⁴Iṙūhöröön chū-ö ngaich chuh ik Löklö Mak Inkūp ik Törūngö Mak ök Rācha inrē; öt lökhötvö pöri ök töṙeūla tö aṅhav-uk tö chu.

¹⁵Ngaich kiröönngöre chū-ö ik hatööm lök ip achāṙö ngaich ngëichkö ök kinlōngö; havan ritre chū-ö ngaich lökhöt Ip Achāṙö Inkūp, havan ngaich.

¹⁶Öt akahalōn yik mākūö töp chahūhu chu hēk la-en chu inrē; Öölu chū-ö inrē vë-eny nang yik Yahūti, kūönṙô, mā, mākūö, yip tahëng inrē töla-evṙen tö ngam la-en.

¹⁷Ngaich ngö ṙô chū-ö tö cha, Meuk nup kanihngen hī ö-yih, tö Yērusalem nö hulalhak nö taṙōli haṙāpi inrē nuk inkūp e. Tā-a töi katöplö kinlōngö Yērusalem, hòṅ hī öt ngöhören minṙēngö.

¹⁸Ngaich vë-eny nang cha chū-ö tö ngam kël ngam Tēv nö löök nö in chu, ane inrē nup ṙô ök rācha nö vë-ekūö chu. Ngaich ngö ṙô cha-a, Tā-a töi chōholre mānlö e. Ngaich cha-a nö hangëkö këlre nö im tölöök la-en.

¹⁹Hē Sanpalāt pöri ök aṅ Hōròn Tōpīa inrē ök tarik ò, aṅ Amön, tö Kīsem ök Arap nö hāngö e, ahūöngen ih cha-a ngaich pinhëṅtökūö ih inrē nö ngö ṙô Asuh öng ngih la-en yīö? Ahôngen öp rācha öyih?

²⁰Ngaich sapṙô cha chū-ö, Ngam Tēv ngam halīöngö an min mahakôlò ih, ngaich īhö tarik ò min öi choholre mānö; hö-ö pöri yī-ö minchööḵöv hēk huneū-envṙen hēk inköpkulōn i Yērusalem.