Read Car_Nicobarese NAHIMIĀ 3 Bible Online

NAHIMIĀ 3 - Car_Nicobarese bible

NAHIMIĀ 3

¹Ngaich Ēlīāsip ök mākūö kūönṙô nö choholre nö in yik holre kūönṙô ngaich cha-a nö vīlö ök Inkūp Sīṅp, Ahetlö e cha-a ngaich asöklö nuk inkūp e inrē; ahetlö e cha-a tölngö öp chūök Chamônga Töhēngòng, tölngö ip chūök Chamônga Hananel.

²Ṙanët tī ò yik tarik aṅ Yerikō nö vī-il. Ṙanët tī cha inrē Sakur ök kikōnyö kūön Imrī nö vī-il.

³Vīlö ök Inkūp Kāḵ yik kikōnyö kūön Hassēna-ah; ngaich ṙātö nuk mikeūnö e asöklö nuk inkūp e inrē, tö nuk vët inköp, tö nuk kāl kūö e inrē.

⁴Ṙanët tī cha ang Meremòt ök kikōnyö kūön Uriyā, kikōnyö kūön Hakkös nö vītit. Ṙanët tī cha ang Mesulam ök kikōnyö kūön Pērakiyā, kikōnyö kūön Meshesāpĕl nö vītit. Ṙanët tī cha inrē Sētòk ök kikōnyö kūön Pa-anā nö vītit.

⁵Ṙanët tī cha inrē yik aṅ Tēko nö vītit hö-ö pöri yik mā in cha nö keunlö el ranôṙöre tö la-en ngam mā cha.

⁶Ngaich Yēhōyata ök kikōnyö kūön Pasēa tö Mesulam inrē ök kikōnyö kūön Pësotēya nö vītit ök Hötṙeh Inkūp; ṙātö mikeūnö e cha-a asöklö inkūp vët e inrē, inköp e tö kāl kūö e inrē.

⁷Ṙanët tī cha nö vītit ang Melatīya ök aṅ Kipīön Yātòn inrē ök aṅ Mërōnòt, tarik aṅ Kipīön, aṅ Mispā inrē ök më-el katòh chöngö ök mahayöng panam Lāmuh tö ngam Tahël.

⁸Ṙanët tī cha ang Usīĕl ök kikōnyö kūön Harhayā, ramöm humlum, nö vītit. Ṙanët tī ò Hananiyā, töhĕng tak an in yip vamī tötahūsa, nö vītit; ngaich cha-a nö halöök tit Yērusalem nö tölngö ik Töpōi tāk Kinlōngö.

⁹Ṙanët tī cha Rafīyā ök kikōnyö kūön Hör, mahayōm töròngti panam i Yērusalem, nö vītit.

¹⁰Ṙanët tī cha Yētayā ök kikōnyö kūön Harumaf nö vītit ök lākūö patī ò; ranët tī ò inrē Hatus ök kikōnyö kūön Hasapnīyā nö vītit.

¹¹Melkiyā ök kikōnyö kūön Harim Hāsup inrē ök kikōnyö kūön Pahatmōap nö vītit ök tahëng mirökö tök chūök Chamônga inrē i nuk Tisum.

¹²Ṙanët tī ò Sālum ök kikōnyö kūön Halōhas mahayōm ök töròngti panam i Yērusalem, nö vītit, anga-aṅ tö yik kikānö kūön ò inrē.

¹³Hanun tö yik aṅ Sanū-a vītit ök el Achāṙö Inkūp; hēk cha-a nö vīlö e asöklö inkūp e inrē, tö vët inköp e kālkūö inrē, hĕng köṅny sumkôngö ök kinlōngö tö vītitvö inrē, nö tölngö Inkūp Sôḵ nuā.

¹⁴Melkiyā ök kikōnyö kūön Rēkap, mahayōm ök panam Pĕthakchërem, vītit ök Inkūp Sôḵ nuā; vī-il e anga-aṅ nö hēk asöklö inkūp e inrē, vët inköp e, tö nuk kālkūö e inrē.

¹⁵Sālum inrē ök kikōnyö kūön Kolhaseh, mahayōm ök panam Mispā, vītit ök Inkūp Löklö Mak: vī-il e anga-aṅ nö hēk ruptö kui e inrē ngaich asöklö inkūp e, vët inköp e, kālkūö e inrē; ngaich hēk anga-aṅ nö vīlö Kinlōngö ök Tömūlngö Mak Sëlla ik panô-òṅ ök rācha, nö tölngö i nuk vanānglö pameūtöre nö ṙā-ang elpanam Tāvit.

¹⁶Unôichrit Nahimiā ök kikōnyö kūön Aspuk, mahayōm ök töròngti panam Pĕtsūr, vītit ök kunnyòknyi lā ip kui kupah Tāvit, söl ip töng vīlöng chūök mak, söl ip patī yip tökalēḵ tarik inrē.

¹⁷Unôichrit ò yik Lēvī nö vītit: Rēhum ök kikōnyö kūön Pāni; ṙanët ò Hasapiya, mahayōm töròngti panam Keilah, vītit panam re.

¹⁸Unôichrit ò yik hol cha nö vītit: Pavai ök kikōnyö kūön Hanātat, mahayōm töròngti panam Keilah;

¹⁹Ṙanët ò Ēsör ök kikōnyö kūön Yēsua, mahayōm i Mispā, vītit ök tahëng lā ök paneūlö ik chūök chehetī kumyung i Sinkeukngö.

²⁰Unôichrit ò Pārök ök kikōnyö kūön Sapāi nö vītit ök tahëng mirökö löktökūö Sinkeukngö söl ik inkūp patī Ēliāsip ök mākūö kūönṙô.

²¹Unôichrit ò Meremòt ök kikōnyö kūön Urīyā kikōnyö kūön Hakkös nö vītit ök tahëng mirökö löktökūö inkūp patī Ēliāsip söl manā-angkūö ök patī Ēliāsip.

²²Unôichrit ò yik kūönṙô, tarik Töṙā-akūö panam, nö vītit.

²³Unôichrit cha Penyamin Hāsup inrē nö vītit ök lā kūö patī cha. Unôichrit cha Asariyā ök kikōnyö kūön Maasiyā, kikōnyö kūön Ananīyā nö vītit nö kumngöre tī tök patī ò inrē.

²⁴Unôichrit ò Pinnūi ök kikōnyö kūön Hanātat nö vītit ök tahëng mirökö, löktökūö patī Asariyā söl ik Sinkeukngö.

²⁵Nö söl ik kinvônngö inrē. Palal ök kikōnyö kūön Usāi vītit ök lākūö Sinkeukngö ök chūök chamônga inrē tānyöre nö löktökūö ök lātulöng patī ök rācha ik el milūkö chūök amahati. Unôichrit ò Pĕtayā ök kikōnyö kūön Paròs.

²⁶Tö yik tarik ök tempöl mī-iyöng ik ôfel vītit ök kunnyòknyi lākūö ök Inkūp Mak nö lā chuhöt ip tötānyu inrē chūök chamônga.

²⁷Unôichrit ò yik aṅ Tēkō nö vītit ök tahëng mirökö lākūö öp tökiröng tötānyu chūök chamônga nö tölngö i kaha kinlōngö Ôfel.

²⁸Lātulöng tök Inkūp Kōra yik kūönṙô nö vītit, nö kö ikūö nuk patī chu.

²⁹Unôichrit cha Sētòk ök kikōnyö kūön Imer nö vītit ök lākūö patī ò. Unôichrit ò Sēmayā ök kikōnyö kūön Sakaniyā, ök yōm ök lā chuhöt Inkūp, nö vītit.

³⁰Unôichrit ò Hananiyā ök kikōnyö kūön Selemēya Hanun inrē tinfūöl tak kikōnyö kūön Sēlaf nö vītit ök tahëng mirökö. Unôichrit ò Mesulam ök kikōnyö kūön Përakiyā nö vītit ök lākūö tökiröng urôhò ò.

³¹Unôichrit ò Melkiyā, töhĕng tak aṅ in yik ramöm humlum, nö vītit nö tölngö ök patī yik tarik ngam tempöl yik mī-inyihkö chehen inrē, lākūö ök chūök Inmūlö Inkūp, söl ip lātulöng urôhò ip Sinkeukngö.

³²Ihôi öp lātulöng tökiröng urôhò öp sinkeukngö töp Inkūp Sīṅp vahītit yip ramöm humlum tö yip mi-īnyihkö chehen inrē.