Read Car_Nicobarese NAHIMIĀ 4 Bible Online

NAHIMIĀ 4 - Car_Nicobarese bible

NAHIMIĀ 4

¹Ngaich hē Sanpalāt nö hang tö ih katöplö ök kinlōngö, tainy ngaich anga-aṅ ngaich kiröngö lanīnö, ahūöngö yik Yahūti inrē.

²Ngö ṙô anga-aṅ nö i kūö yik holre i yik kumyung i Samariā inrē, Suh öp la-en vē töt kalē-en Yahūti? Halööktit nup töng sitih aich min? Kētö tökētu aichvö min? Keuheūten aichvö min i töhĕng sakāmö? Halööklö nup ihong aichvö min i nup töfônghaka chōnṙen, nup töföngiyö?

³In ò inrē ang Topiyā ök aṅ Amön, ngö ṙô anga-aṅ, Hôṅ, ngam vahī-il cha yĕn yôkö kui angū-ö tö am aṅ el inchōn ngaich taṙöli min ngam kinlōngö cha ihong?

⁴Ō Tēv ih hang inyëngen ih; havāngtö ngam miyëṙen cha man nö i kui cha, kēten cha inrē nö kīlö inlānen ip panam chūök cha nö hakövö.

⁵Un hanyātiyö öp fālen cha, ane inrē un hökiṙen ap tökööl cha nö sīchiyö nö ṙā-ang i kūö Meh; pò cha nö harunnyö lanīnö Meh nö i kūö yip mamānö.

⁶Katöp ök kinlōngö īhö; ngaich keuheūtngöre ök kinlōngö nö taptöre kūö ik tö ròngti ṙô-òlkui e. Pò yik tarik nö lōnu nö la-evṙen.

⁷Hē Sanpalāt pöri Tōipīa inrē tö yik Arap tö yik aṅ Amön aṅ Astòt inrē nö hang tö ök vinītit nuk kinlōngö Yērusalem nöng irūhöröön tö nup manëngö inrē nö ngaich nö hòṅ löpngökūö, tainy cha-a ngaich;

⁸Ngaich cha-a nö vī ellōn re nö yih nö kiyung nö lā-al Yērusalem nö hòṅ kilūöchngö el kui cha inrē.

⁹Ngaich īhö vë-ekūö ngam Tēv re, ngaich ṙātö amahati nö lamaklen ih tö cha hatööm sakāmö inrē.

¹⁰Ngö ṙô pöri Yūtā, Öt kalē-en yip nö ngaich tamyuk tölangan, pōitit inrē nup chōnṙen; ötkô in la-evṙen im kinlōngö.

¹¹Ngaich ngö ṙô yip lā-al hī, Öthō yip nö akahalōn hēk meuk hanöng saha hī yih ellōn cha ngaich fëlngen cha asökngö ngam la-en inrē.

¹²Hē yik Yahūti yik mi-īyöng nö ranghen cha nö yih ngaich ngö ṙô tö ih nö söm heuh, Ṙā-ang i nup chūökö chūök cha nö iyöng yih cha-a min nö lā-al hī.

¹³Lökten chu ip lā taṙeū ël e lā uk öp kinkōngö, ip tölungāṅhaka chūökö, öich ṙātö tarik sā mupīhö cha, nö sanëtu, vöiyu, linrënyu inrē.

¹⁴Ngëcha chū-ö ngaich, choholre inrē, ngaich ngö ṙô tö yik mā tö yik mākūö inrē yik tö ōtngöre tarik inrē, Uh yin pa-ekūö tö cha. Köpölōn tö ngam Mā, ngam tökiröng töpahë-evö inrē, kiyunglö yip holre inrē, kūön yīö kikōnyö kūön yīö kikānö, pīhö yīö, patī yīö inrē.

¹⁵Hē yik lā-al ih nö hang tö ih öi akahalōn tö e tö ngam Tēv inrē nö piyāingö ök halēn cha, ṙòkhöre īhö ngaich havantöre im kinlōngö, kö i la-en.

¹⁶Löktökūö e angū-ö sakāmö, ròngti yik tarik chu töla-envö im minānö, ròngti inrē yik kamëkö vöi, lanaklö, linreny, vët inyut inrē; ngaich yik yöngṙen nö sökhaka nö lā rit nup patī Yūtā,

¹⁷Yik kamtöplö ihong nö i kui ök kinlōngö. Cha-a yik tamyuk tölangan nö kö halēnö nö hĕng lā tī nö lā-evṙen hĕng lā tī inrē nö ṙapkö aṅtīre.

¹⁸Kö sanëtu yik kamtöp ihong nö i ṙat cha isaha cha nö la-evṙen. In chu ök tarik famöö römpĕt.

¹⁹Ngaich ngö ṙô chū-ö tö yik mā tö yik mākūö inrē tö yik tö ōtngöre tarik inrē, Kiröngen an ngam la-en pōiti pinrātö inrē, ngaich ayī-ö köhngen tö höö i kui ngam kinlōngö, kö marôvat tö höö.

²⁰Ip chūök elnang yīö hang ṙô ngam römpĕt, hamūltöre in ih umuh. Ngam Tēv hī an min kumyunglen hī.

²¹Lā-evṙen īhö ngaich tö ngam la-en, ròngti tö cha ṙamapkö vöi, löktökūö minlīlö peuheū hanöng saha taneūsömat nö mātu.

²²Ngö ṙô chū-ö inrē hē e tö yik tarik, Hökngen yip tarik tö yip tarik cha inrē nö lā ël Yērusalem tö hatööm, hòṅ cha nö amahten hī tö hatööm ngaich la-evṙen tö sakāmö.

²³Lökten chu ötrēhĕn, ötrēhĕn yip hol chu ötrēhĕn yip tarik chu ötrēhĕn yip tarik amahati yip tamömrit chu nö hĕng tak tö ih lamuhngö inyutre: kö aṅhav eltī īhö tö aṅtī re.