Read Car_Nicobarese NAHIMIĀ 6 Bible Online

NAHIMIĀ 6 - Car_Nicobarese bible

NAHIMIĀ 6

¹Ngaich hē e nö vënyu nö in Sānpalāt Tōpaya inrē tö Kisem inrē ök Arap in yik tö-ōtngöre inrē tökunyaha elmat tö ih tö chu ngaich vīlö öp kinlōngö tö nup tömëngö inrē in e nö öt hĕng tö-ōtren (öl pöri chū-ö ik hē e asöklö nuk inkūp i nuk lökhöt),

²Söömtö ṙô ngaich nāṅ Sanpalāt nāṅ Kisem nö in chu, nö ngö ṙô, Tā-a töi meukkūöre hĕng kang chūök i nup tuhēt ip töṙā-akūö panam Ôno. Hòṅ lōnu pöri cha-a nö hòṅ chökhutī tö chu.

³Ngaich chū-ö tīnngö vamë-eny nang cha, öich ngö ṙô, Kiröngö la-en chin ngaich ötkô öich yòhti. Kūöyòh öng min ngih la-en nö asöki i saha chu ṙāngö e öich yòhti in yīö?

⁴Ngaich cha-a nö fën van tī nö ngatī nö söömhöti nö in chu ngaich chū-ö höng hĕngren ṙô sapṙô cha.

⁵Ngatī ang Sanpalāt ik tinneui heuh nö tīntö ök tarik re nö kumtö ök līpöre tökūichö töng luve-akkūö nö eltī ò.

⁶I mat e nö ngö kinūichö, Eūka an nö in yip pumnāmö tarik, ṙôten e inrē Kīsem, tö meh tö yip Yahūti inrē öi hòṅ ahôngen: lökten yin vīlö ngam kinlōngö, ngaich më-eṅ hòṅ vīlöre rācha cha, sā ineūkö e nö ngaich.

⁷Ngaich më-eṅ inrē vīlö pròfĕt nö ma-ahangken meh i Yērusalem, Rācha ap umuh i Yūtā. Ngaich an yih min nö vënyu nö in öp rācha nö sā në ṙô. Yĕh lökten tā-a yih, tā-a inrē tai holre halēnö e.

⁸Ngö ṙô chū-ö hēk söömhöti in ò, Öt ngatī-ivö tösā minë ṙô meh nö ngaich, tön höng vahī meh nun nö löknyö ellōn meh.

⁹Pò cha nö ṙòkhöre nö hòṅ pinhëtökūö ih, nö ngö lōn, Ṙā-ang tīre yip min tö ngam la-en ngaich öt keuheūten tö e. Ō Tēv, hangëkö nö kël chu pöri më-eṅ yēḵ.

¹⁰Ngaich hē chu chuh patī Sāmayā ök kikōnyö kūön Tēlayā, kikōnyö kūön Mehetāpĕl, ök tö-öpikūö, ngö ṙô ang-aṅ, Tā-a tai meukkūöre el patī ngam Tēv, lā tuhēt el ngam tempöl, tai öptökūö në inkūp ngam tempöl inrē; tön hòṅ yih yip nö fëlngen meh, yih yip min tö hatööm nö fëlngen meh.

¹¹Ngö ṙô pöri chū-ö, Famalngöre öich chū-ö tarik? Asuh öich chū-ö tarik inrē öich töhō kiröönngöre iyöng el ngam tempöl? Hö-ö chin hòṅ kuhēthötre.

¹²Akahalōn chū-ö ngaich meuk inrē tö ngam Tēv nö öt tīnten ò, ṙô-òv pöri ngaich anga-aṅ tö ngam ṙô nö kunyaha elmat tö chu pò Tōpayā, Sanpalāt inrē nö haṙāyan.

¹³Angū-ö chööḵnyö ò nö haṙāyö, pòn hòṅ pinhëṅtökūö chu nö ngatī inlahen ngaich köölö fālen, ngaich lökten cha nö ötkô nö kētö minë-eny chu tö tötlöök, pòn hòṅ pinhëṅtökūö chu.

¹⁴Ō Tēv chu köpölōn tö Tōpayā, Sanpalāt inrē tö tösā në tī cha töp kikānö inrē pòfĕt Nôatīyā tö yip ōtngöre inrē pròfĕt yip töhòṅ vīten chu pa-ekūö.

¹⁵Keuheūten ngaich ök kinlōngö im tönët anāi sakāmö ngam chingëṅt Elul, i ëltö taneui anāi nët sakāmö.

¹⁶Hē yik lā-al ih nö ṙòkhöre nö hāngö e, ṙòkhöre yik pumnāmö tarik mahavīlen ih nö pa-ekūö ngaich pōyen miṙē-ĕv nöng kahngenre; pò cha nö akahalōn tö ngam la-en nö keuheūten i hinôlṙen ih tö ngam Tēv ih.

¹⁷Hēk inrē i nuk sakāmö anū-ö yik mā i Yūtā nö pōyen kahūich tö līpöre tösöömi nö in Tōpaya yih inrē nö in cha nup līpöre kahūich Tōpayā.

¹⁸Pòn pōyen yik i Yūtā tömūlta nö in ò lökten i töchūöku kinlēḵngô, kūö ò nö köiny kūön Sēkanīya ök kikōnyö kūön Arah: ök kikōnyö kūön ò inrē Yēhōhanan nö hēḵ ök kikānö kūön Mesulām ök kikōnyö kūön Parakiyā nö pīhö ò.

¹⁹Ane inrē cha-a eūkö nup tölöök la-en ò nö i kūö chu, vënyö nuk ṙô chu inrē nö in ò. Söömtö nuk tökūichö līpöre inrē ang Tōpayā nö hōten chu pa-ekūö.