Read Car_Nicobarese NAHIMIĀ 9 Bible Online

NAHIMIĀ 9 - Car_Nicobarese bible

NAHIMIĀ 9

¹Im innët anāi fën sakāmö ngòh chingëṅt yik tarik Israĕl nö hamūlöre nö ahik inyut tö sāk inrē, tumlat inrē nö el kui cha.

²Ngaich yik aṅ Israĕl nö haköhngenre tö yik aṅ tahëng tarik, ngaich söklöre nö vë-eny tökööl re kanöölö yik yöng cha inrē.

³Söklöre cha-a ngaich nö i chūök re ngaich vë-ekūö ngam līpöre chöngö ngam Mā Tēv ngam Tēv cha lūöi köṅny ṙô rô-òten ngam sakāmö; ngaich im tahëng tölūöi köṅnyṙô cha-a nö vë-eny tökööl re salām ngam Mā Tēv inrē, ngam Tēv cha.

⁴Ik vanānglö yik Lēvī ngaich söklöre Yēsūa, Pāni, Katmi-el, Sipaniyā, Punnī, Serapīyā, Panī, Chenāi inrē; ngaich cha-a nö pōitô nö hū-a nö im Mā Tēv ngam Tēv cha.

⁵Ngaich yik Lēvī Yēsūa, Katmiel, Panī, Hāsapnīya, Serepiyā, Hotīyā, Sīpaniyā, Petahī-a inrē, nö ngö ṙô, ʽʽSöklöre yin hakôlò ngam Mā Tēv yīö ngam Tēv yīö töng öt chanūhuvṙen. Tökôlò an yēk ngam tökôlò minënyö meh ngam tahapōilöngö nö lātulöng tö nup inkôlò nö ṙòkhöre nöönyö inrē.ʼʼ

⁶Ngaich ngö ṙô Esrā: ʽʽMe-eṅ man Mā Tēv, höng hĕng tak man më-eṅ; vīlö halīöngö man ngaich tö ngam halīöngö minë halīöngö, tö nup ël e nö ṙòkhöre, ngam tumlat nup aṅ kui e inrē, minë mai tö nup aṅ u inrē; ngaich meūkken u më-eṅ; yip tömaṙôngö inrē el halīöngö nö salāmö meh.

⁷Më-eṅ man Mā Tēv, Tēv öm kamtöllen Aprām ngaich kēten ò nö ṙā-ang Ör öp i Kālti ngaich kētö minë-eny ò nö Aprahām;

⁸Ngaich kôtökūö më-eṅ tö ellōn ò nö tökô-en nö i kūö meh, ngaich in ò më-eṅ vīten ngam kinlēḵngô nö kētu nö in yip kūön ò ngam panam yip Kanā-an, Hitait, Amôr, Përis, Yëpus, Karkes inrē; ngaich më-eṅ hateungngö ngam kinlēḵngôre, pò meh tölöök.

⁹Ngaich më-eṅ inrē meuk kanihngen yik yöng ih nö i Aikup hang ṙô cha inrē nö havëken meh ip Mai Ētöm,

¹⁰Ngaich tī-iv më-eṅ tö minkahngö pinngangkūö inrē öm lā-al Fërō tö yik tarik ò inrē tö yik tarik ngam panam ò inrē nö ṙòkhöre, pò meh akahalōn tö cha nö miyëṙen tö yik yöng ih; ngaich më-eṅ inrē kē minë-enyre, nö sā e ing töngamuh.

¹¹Ngaich më-eṅ inrē harēv ngam mai i kūö cha, lökten cha nö lök ellōn ngam mai el tönyô tumlat; ngaich më-eṅ inrē kavalngö yik lamū-u cha nö el ngam tö-aṙuḵ sā ihong nö el tökalēḵ mak.

¹²Löktö ël ök tökufëi më-eṅ taṙul öm hachōkūö cha tö sakāmö, ane inrē lökten ik tökufëi tameūyö tö hatööm nö ëāṅvö mat cha nö kiröönngöre nö el talöököre.

¹³Yônti më-eṅ i kui öp rôngö Sināi, ngaich vë-ekūö cha öm löktö el halīöngö ngaich kē-ĕkūö cha tö töchip inchöngten tökô-en chöngö inrē, tölöök inchöngten chöngö inrē,

¹⁴Ngaich më-eṅ inrē mikahtölōn cha tö ngam töhet sakāmö ngaich kētö minë chöngö inchöngten inrē nö lökten ik tarik meh Môsös nö chöngö.

¹⁵Kētö nyā-aṅkūö cha më-eṅ ṙā-ang el halīöngö pò cha nö kapahare kēnyö mak cha inrē ṙā-ang ip ihong pò cha nö haṙehe nômö, ngaich tölṙô cha më-eṅ inrē nö kiröönngöre nö kē ap panam öp kahëtö meh in cha öm chūökuṙô kilēḵngôre.

¹⁶ʽʽNgaich, pöri yik yöng ih nö hakeūlenre hangëngö likeunre inrē ngaich öt hang ṙô minë chöngö, meh;

¹⁷Sōḵ cha-a nö hang chöngö, ngaich öt köpölōn tö nuk pinngangkūö nuk tī meh in cha; hangëngö likeun re pöri cha-a ngaich vīlö yöngṙen re nö havantöre nö el inkövöre nö i Aikup. Tēv pöri më-eṅ tölēnen aṙē-ĕl, tö-aṙē-ĕlōn tö-aheūkölōn inrē, töt ka-eūyö tanānyö töpōyen, aṅ in inrē tö tököp hanāngenlōn, ngaich rö-ö öm ṙāngen cha.

¹⁸Pòrô cha-a nö vī töhaṙöichö kūön nuā ngaich ngö ṙô, Ngòh ön Tēv yīö ngam kamënyen yīö ṙā-ang Aikup, Ngaich kiröngö kahëken tö inchōichngö minë-eny Meh.

¹⁹Ngaich më-eṅ i ṙôkö miṙēlōnre öt ṙāngen cha nö el tönyalnyi; öt ṙāngen cha ök tökufëi taṙul tö sakāmö ök mahachōkūö cha tö talöökö, öt rēhĕn ök tökufëi tameūyö tö hatööm ök töhātö tī tö el talöökö cha nö kiröönngöre.

²⁰Kētö ngam katalöök Fanöinylöre më-eṅ nö mahaköpten cha, ane inrē öt haköptīre më-eṅ tö nuk manna nö ṙā-ang elvāng cha, kētö mak cha më-eṅ inrē pò cha nö haṙehe nômö.

²¹Fën anāi samyeūheu më-eṅ ha-aṅlen cha el tönyalnyi, öt hanātuṙen cha-a inrē; öt takāchiyö nuk inyut cha öt yöl nuk kalröön cha inrē.

²²Ngaich më-eṅ inrē kē-ĕkūö cha tö pūlngö tarik inrē, ngaich keuheūt sinkeukngö tī më-eṅ katölö cha; lökten cha nö kē amin re tö panam Sīhòn ök rācha aṅ Hespòn tök panam Ôk inrē ök rācha aṅ Pasān.

²³Ngaich më-eṅ ṙūölö ṙôngö yik kūön cha nö sā taneūsömat ngam halīöngö, ngaich kēten cha më-eṅ ip panam öp ṙô meh i yip yöng cha chūök cha nö kuhēthötre nö kē-ĕ e nö amin re.

²⁴Ngaich lökten yik kūön nö kiröönngöre nö kē ngam panam, ngaich më-eṅ inrē tumṙeūtö yik aṅkūö ngam panam nö i kūö cha, yik aṅ Kanā-an, ngaich kēten cha nö eltī cha, holtö yik rācha tö yik tarik aṅ ngam panam inrē, pòn hōtu cha-a nö kahngö tīre tö cha.

²⁵Ngaich cha-a nö kē nup chūök kumyung elpanam panam inrē tökôlòkūö, kē amin re inrē tö patī tööḵlö tö tölöök chehen, töhulhötvö chūök mak, panô-òṅ vāin, panô-òṅ ôliv töṙôngu chōn inrē nö pōyen; lökten cha nö nyā-aṅvkūö tööḵngen ngaich ngaich kiröng alaha, ngaich kumchikngenre nö im tökiröng lanöökö meh.

²⁶Sönngenre pöri cha-a nö minôṙô nö ahôngen meh inrē ngaich kavalngö ngam chöngö nö lā uk re ngaich fëlngö yik pròfĕt meh, yik vamë-ekūö cha nö hōten cha nö havantöre nö in meh nö hēk, ngaich cha-a inrē nö kēken tökiröng nö inchōichngö minë-eny.

²⁷Lökten meh kēten cha eltī yip tökunyaha-elmat tö cha, yip vamīten cha nö kihngen; ngaich hē cha nö kihngen peuinyhökūö meh cha-a ngaich, ngaich më-eṅ hang ṙô cha el halīöngö; ngaich sā ngam tökiröng miṙēlōn meh öm kētö yik mahayööken cha yik mahayööken nö ṙā-ang eltī yip tökunyaha elmat tö cha.

²⁸Hē cha pöri nö haneūheuvö la-evṙen cha-a hēk tö tötlöök nö i kūö meh, ngaich më-eṅ hökngen cha nö eltī yip tökunyaha elmat tö cha, lökten cha nö chönguvö nö lātulöng tö cha, ngaich yē cha nö havan nö peuinyhökūö meh ngaich më-eṅ hang el halīöngö, ngaich ṙōl heuh më-eṅ ṙānyen cha sā ṙôken nup neūkölōn meh.

²⁹Ngaich më-eṅ fēḵlen cha pòn hōtu cha-a nö havantöre nö im chöngö meh. Sönen cha-a nöng hakeūngenre ngaich öt hang ṙô minë chöngö meh köölö fālen pöri nö i minë hachöngten meh i inköpö inlahen tarik, ngaich havāngtö ngam töngëḵ kūö kël re hangëḵ likeun re inrē nö sōḵ nö hang chöngö meh.

³⁰Ṙōl samyeūheu më-eṅ ṙāpöre in cha, ngaich vë-eny nang cha lökten im töhet Fanöinylö nö lökten in yik pròfĕt meh; sönngenre cha-a nö öt kētö elnangre. Lökten meh kēten cha nö eltī yip tarik aṅ në panam.

³¹Sön pöri i ṙôkö miṙēlōn meh öm öt ahatngen cha, hēk öt ṙāngen cha; pò meh tö-aṙē-ĕlōn Tēv inrē tötööḵlö tö neūkölōn.

³²Lökten yĕh, Tēv ih, tökiröng tökalēḵ Tēv inrē pinhë-eṅkūö, mahaköp kinlēḵngô tököpö hanāngenlōn inrē, uh nup kanihngen tölōn nö tökūöṅnen nö in meh nup yamih nö in ih, in vē rācha ih, vē kūön rācha ih, vē kūönṙô ih, vē pròfĕt ih vē yöng ih vē taṙòkhöre tarik meh inrē, hēten tö yik rācha aṅ Asiriā söl ing töngamuh.

³³Sönen më-eṅ höng töchip in u nup yamih nö in ih, pò meh i kanô-enre ngaich īhö öt löökö inlahen;

³⁴Vē rācha ih, vē kūön rācha ih, vē kūönṙô ih, vē yöng ih inrē nö öt haköp ngam chöngö meh hēk öt kūöten re tö minë chöngö meh tö minë mu-urĕhnyi ṙô meh kahëtö meh in cha.

³⁵Hö-ö yin nö lök la-en meh nö im pūlngö cha, ngam kahëtö meh in cha i ṙôkö lanöökö meh, im tökiröng panam inrē tökôlò ngam ṙahātö meh i kūö cha; ngaich cha-a inrē nö öt havööngö kūöre tö nup tötlöök la-en re.

³⁶Yĕh meuk, töhakövö in īhö töngamuh, ing panam kahëtö meh in yik yöng ih öi hōtu kumchikngenre i në ṙòng e tölöök inlōnti inrē, yĕh meuk, töhakövö in.

³⁷Ngaich nup tökôlò ṙòng e nö chuh in yip rācha yip ha-ūichlö meh nö i kui ih tökūö nup tökööl ih; minhôiṅyuvö yip inrē nö i në alaha ih i në nuā ih inrē ip töng kanahanglōn cha, ngaich īhö el ngih yöng kanihngenre.

³⁸Kūö u nö ṙòkhöre öi vī tököp kinlēḵngô ngaich kūichngö e inrē, ngaich yin vē kūön rācha ih, Lēvī ih, kūönṙô ih nö katāntö tīre nö in e.