Read Car_Nicobarese ESTÖR 1 Bible Online

ESTÖR 1 - Car_Nicobarese bible

ESTÖR 1

¹I nuk sakāmö Ahāsurös (Sörses), ök mahyöng nö löktö kūö Intīā söl Sudan i kui nuk töhēngòng nët anāi sat panam.

²I nuk sakāmö anū-ö hē ök rācha Ahāsurös nö ūichhaka nö el kantēra rācha nö i Sūsa ök tökiröng elpanam,

³Im linūöyö samyeūheu ò nö hayöng ngaich anga-aṅ nö ha-aṅhal yik kūön rācha ò nö ṙòkhöre tö yik tarik inrē, tö yik yöngkūö kumyung i Pörsiā, Mītiā inrē yik mā inrē tö yik mahayöng nup panam nö i kūö ò,

⁴Hē ò nö hameuktö kanôlòre tö chehen i minā-aṅ ò nö ṙōl sumkam, hēngòng hëvhöre anāi sakāmö.

⁵Hē nuk sakāmö nö keuheūten, ök rācha nö ha-aṅhal yik taṙòkhöre tarik umuh i Susā ök tökiröng elpanam, hĕnghöre tökiröng tökūöṅnö inrē nö sat sumkam rô-òten, ellōn ök panô-òṅ i patī ök rācha.

⁶Tö-isoh nuk umuh ranangkūö hilā, tölingūṅ nup tökilölhaka nö i nuk tökuvaha tövai linen, tö-amëla töhuṙing inrē nö yanòhtö töchuvī ël rupīö marpöl nup inrē machööḵlö, anūichö nuk umuh humlum rupīö inrē, el ök tömirūnö ël tösumītö tö töngëḵ ihong, tumṙëtu töpōi ṙāi ihong inrē.

⁷Asëlöng nuk tö ôkö el humlūm kōp nup tökeuheūtöre tumkangen vīnī-i, kiröngen nuk vāin ngam rācha sā rôkö lōn ò.

⁸Ngaich ök inôkö nö asā ök chöngö, öt hĕng tak tölīplöng kūö; pò ök rācha nö kētö chöngö nö in yik mā ök patī ò nö hōten cha nö la-evṙen sā lōn yip tarik.

⁹Ha-aṅhal inrē ök Rānī Vastī nö in yik kikānö aṅ patī rācha ök patī ök rācha Ahāsurös.

¹⁰Im sinātö sakāmö hē ök rācha nö ṙāmölōn tökūö vāin, tölṙô Mehuman anga-aṅ, Pista, Harpōna, Pikta, Apakta, Sītar Karkas inrē, yik tösat tak kumkantöre yik kūön alaha ök rācha Ahāsurös nö yōm urôhò,

¹¹Nö kēten ök Rānī Vāstī nö i kūö ök rācha nö sapīövu tök sapīöv re nö Rānī, pòn hōtu nö hameuktö vanāyöre nö in yik tarik yik kūön rācha inrē; pò ò nö tövāyö mineūkö.

¹²Sōḵ pöri ök Rānī Vastī nö yihtöre nö i chöngö ök rācha nö i ṙô yik kumkantöre. Tainy ngaich ök rācha tökūö e, ngaich ök tanānyö ò nö hū nö ellōn ò.

¹³Ngaich ngö ṙô ök rācha tö yik tö-akaha tarik yik ma-akah ṙētaka pòn angū-ö inlahen ök rācha nö in cha yip töhuveū-en nö i chöngö inkaha fālen inrē:

¹⁴Karsinā ök tarik ṙanët ò. Sētar, Atmata, Tārsis, Mērĕs, Marsēna, Memukan inrē, yik tösat tak kūön rācha aṅ Pörsiā Mītiā inrē, yik mameuk kūö ök rācha, amūichhak inrē nö raneh nö im pūlngö:

¹⁵Sā ngam chöngö, sitih inlahen tī öi töp Rānī Vastī, nö pò ò nö öt kē chöngö öp Rācha Ahāsurös tö ṙô yip Mameūkan nö i kūö ök rācha i kūö yik kūön rācha inrē, Öt höng im rācha ap Rāni Vastī nö vaich tön in vē kūön rācha inrē nö ṙòkhöre in Vē tarik inrē nö ṙòkhöre aṅkūö në panam Ahāsurös.

¹⁶Ngaich ngö ṙô Memūkan nö i kūö ök rācha i kūö yik kūön rācha inrē, Öt höng im rācha ap Rāni Vastī nö vaich tön in vē kūön rācha inrē nö ṙòkhöre in vē tarik inrē nö ṙòkhöre aṅkūö në panam Ahāsurös.

¹⁷Pò ngih la-en ap Rāni min nö tītö minṙēngö vē töpīhöv kikōnyö tö vē pīhöre vē kikānö min nö mikahtulōn tö e, pò cha min nö ngö ṙô, Hōtu ap Rāni Vasti töp rācha Ahāsurös nö kētu nö i kūö ò, ngaich öt yihtöre anga-aṅ.

¹⁸Ngaich ing töngamuh sakāmö min yip mā kikānö i Pörsia, i Mītiā inrē yip tö ngaich nö hang inlahen ap rāni nö vë-eny e nö in yip kūön rācha nö ṙòkhöre, ngaich pōyen min öp minṙēngö lanīnö inrē.

¹⁹Yē e nö lōn ngam rācha, yĕh hökngen öp chöngö rācha nö kiröönngöre nö ṙā-ang in ò, hökngen e nö kūichiyö i chöngö aṅ Pörsiā aṅ Mīt inrē hòṅ e nö öt haṙīka, tö Vasti nö öt yihtöre nö hēk nö i kūö ngam rācha Ahāsurös hökngen ngam rācha inrē nö kētö ngam chūök minā-aṅ ò nö i tahëng öp tö ĕhten tö ò.

²⁰Lökten hē ngam chöngö vahī ök rācha nö keuheūtngöre chūök nö ahangka ing pūlngö ò, ngam tökiröngen, ṙòkhöre min vē kikānö nö milēḵṙen tö pīhöre lātulöng lātaṙeū inrē.

²¹Ṙāmölōn ngaich ök rācha tö ngih inlēnöre tö yik kūön rācha, ngaich ök rācha nö kēkö kaha ṙô Memūkan;

²²Söömngö tökūichö ngaich anga-aṅ līpöre nö i nuk panam ök rācha nö ṙòkhöre, kö i ṙô tī yiö tarik nö ṙô-òv inrē, tö vē kikōnyö nö mā nö el patī re ngatī ṙô nö kö i ëlô yik tarik ò.