Read Car_Nicobarese ESTÖR 2 Bible Online

ESTÖR 2 - Car_Nicobarese bible

ESTÖR 2

¹Unôichrit në, hē ṙanātöre tanānyö ök rācha Ahāsurös, fē-ĕlre ngaich anga-aṅ tö inlahen Vasti tö ök chöngö inrē nö lā-al ò.

²Ngaich yik tarik ök rācha nö ngö ṙô yik mameukṙen ò, Yĕh hökngen yip tövai tö-ayal rēlö nö chöhö nö pīhö ngam rācha.

³Hökngen ngam rācha nö vīlö mākūö i në panam ngam pūlngö nö ṙòkhöre nö hamūl yip tövai ṙālö ṙēlö nö el patī pīhö rācha i Susā ngam tökiröng elpanam, nö elkatòh Hēkai öp ip rācha kumkantöre mahayōm yip kikānö; hökngen tavī-i incham nö kētu nö in cha.

⁴Ngaich hökngen öp kikānö lōn ngam rācha nö rāni ṙënngen Vastī. Ṙāmölōn ngaich ök rācha tö e, ngaich ngatī anga-aṅ.

⁵Ngaich hĕng tak ök umuh Yahūti i Susā ök tökiröng elpanam ök tö minënyu tö Môrtikai, ök kikōnyö kūön Yā-ir, kikōnyö kūön Kis, aṅ Penyamin,

⁶Ök töhalāyi nö ṙā-ang Yērusalem nö in yik töhakövö töhalāyi nö hol Yēkōniya ök rācha aṅ Yūtā, ök tökē-ĕyö tö Nekōpatnēsör ök rācha aṅ Pēpilön.

⁷Haruklen Hatasā anga-aṅ, anga-aṅ ngòh Estör kikānö kūön ök kōiny yöng ò, pò ò nö öt yöngu tö kikōnyö ötrēhĕn tö kikānö; vāi ök nö kikānö löök inrē, ngaich hē ök yöng ò kikōnyö tök yöng ò kikānö inrē nö kapah, harūkan ngaich Môrtikai nö sā kūön ò kikānö.

⁸Ngaich hē ök chöngö ök rācha nö ahangnyu, hē yik tömaṙôngö kikānö nö hamūlö nö i Sūsa ök tökiröng elpanam nö elkatòh Hēkai kētu inrē Estör nö el patī ök rācha ngaich ṙātu nö elkatòh Hēkai ök yōm yik kikānö.

⁹Ngaich ök kikānö nö hāngenlōn tī tö ò ngaich teūngen tök hanāngenlōn ò; ka-eūyen ngaich anga-aṅ nö meukṙen ò tö tavī-i incham tö nyā-aṅkūö inrē minchööḵö ò, sat tak inrē yik tökatöllöng kikānö mameukṙen ò nö hol ò nö ṙā-ang i patī ök rācha, ngaich anga-aṅ tö yik kikānö mameukṙen ò nö hachōtu nö el ök tölöök chūök el patī pīhö rācha.

¹⁰Öt mikahtölōn tarik ang Estör tö tarikre hēk mak alahare, pò Môrtikai nö sōten ò nö mikahtulōn tö e.

¹¹Ngaich öt hĕng hang sumkam Môrtikai nö lök i kūö ök el milūkö ök patī pīhö rācha, nö mikahtölōnre tö inlahen Estör töp kumchikṙen ò inrē.

¹²Ngaich hē ök ṙētak nö yih hē ngòh töhĕng tak kikānö nö kuhēthötre nö ik rācha Ahāsurös, yĕn ngaich nö nët chumngëṅtö nö el katòh inlēnö yik kikānö, pòn angū-ö hē rô-òten cha nö havāyöre, tafūöl chumngëṅtö nö tavī-i tö mūr tafūöl chumngëṅtö inrē nö holtö tötahūsa incham kikānö

¹³Hē öp kikānö nö kuhēthötre nö ip rācha nö ngatī ngaich kē-ĕvkūö anga-aṅ töp lōn re nö kum ò nö ṙā-ang el ap patī pīhö rācha nö chuh el patī öp rācha.

¹⁴Im harap anga-aṅ nö kiröönngöre, ngaich havan im peuheū nö löö ël katòh Sā-eskās ök kumkantöre ik rācha ök yōm yik pīhö töl; öt hēk anga-aṅ nö kuhēthötre nö in ök rācha, höng yē ök rācha nö kuchīkölōn nö in ò ngaich havëka minënyī anga-aṅ.

¹⁵Ngaich hē e nö yih ök hē Estör ök kikānö kūön Apihēl ök kōiny yöng Môrtikai, ök maharuklen ò nö sā kikānö kūön ò, nö kuhēthötre nö ik rācha, öt havëkuvö anga-aṅ höng ök inlēnngen ò tö Hēkai ök kumkantöre ik rācha, ök yōm yik kikānö. Ngaich ang Estör nö hanghuṙen i mat yik mameūkan.

¹⁶Ngaich hē Estör nö kētu nö ik Rācha Ahāsurös nö el ök patī ò nö rācha im sinömö chingëṅt, ngam Tēpĕt chingëṅt, im sinātö samyeūheu ò nö hayöng.

¹⁷Hāngenlōn ngaich ök rācha tö Estör nö mötlö tö yik kikānö nö ṙòkhöre, i kūö ò anga-aṅ nö pōyen hananghuṙen tö yip rēlö nö ṙòkhöre, lökten anga-aṅ nö sumpīövlö ök sapīöv rāni nö i kui ò ngaich vīlen ò nö rāni nö ṙënngen Vāstī.

¹⁸Ngaich ök rācha nö kētö tökiröng nyinā-aṅ in yik kūön rācha nö ṙòkhöre tö yik tarik ò inrē tī Estör an ngam nyinā-aṅ. Ngaich anga-aṅ inrē nö ṙālö masūl nö i nuk panam, kētö raneushö inrē nö chuhēṙen tī.

¹⁹Hē yik rēlö nö hamūlöre ik innët heuh, ūichhak Môrtikai nö ikūö inkūp ök rācha.

²⁰Hö-ö ök Estör nö mikahtuvökūö tö mak alahare hēk tarikre sā chöngö Môrtikai tö ò, pò Estör nö hang chöngö Môrtikai sā re ik inruklöre tö ò.

²¹Ngaich i nuk sakāmö anū-ö, hē Môrtikai nö ūichhaka nö i kūö inkūp ök rācha, nët tak nak kumkantöre ik rācha nā Piktan nā Tērĕs, nak amahtö ök el milūkö, nö līn ngaich lukken re nö hòṅ kētö tīre nö ik rācha Ahāsurös.

²²Ngaich akahalōn ang Môrtikai tö e, vë-eny e ngaich anga-aṅ nö ik rānī Estör ngaich Estör nö vë-eny e nö ik rācha i minë-eny Môrtikai.

²³Ngaich hē ngam fālen nö hatönka ngaich kôti angū-ö nö ngatī, nëtre tak ngaich nak tarik nö kiseūti. Ngaich kūichiyö angū-ö nö i mat öp Kinṙötö Līpöre nö i kūö ök rācha.