Read Car_Nicobarese ESTÖR 3 Bible Online

ESTÖR 3 - Car_Nicobarese bible

ESTÖR 3

¹Unôichrit në ök rācha Ahāsurös nö ṙūölö chūök Haman ök aṅ Akak, ök kikōnyö kūön Hamētāta ngaich ṙūölen ò ha-ūichlen ò inrē nö lātulöng tö yik kūön rācha yik hol ò.

²Ngaich ṙòkhöre yik tarik ök rācha yik mi-i kūö inkūp nö sōnngöre nö salāmö Haman; pòn ngatī chöngö ök rācha nö in ò, Hö-ö pöri Môrtikai nö sōnngöre nö salāman.

³Ngaich yik tarik ök rācha yik mi-i kūö inkūp ök rācha nö ngö ṙô tö Môrtikai, Kūöyòh ömeh öt hang chöngö öp rācha?

⁴Ngaich hē cha nö vë-ekūö ò i tum sumkam ò nö öt hòṅ hang ṙô cha vë-eny nang Haman cha-a ngaich, pòn hòṅ meuk yĕn kô nup ṙô Môrtikai min: pò ò nö vë-eny nang cha tö ò nö Yahūti.

⁵Ngaich hē Haman nö meūkö Môrtikai nö öt sōnngöre hēk öt salāman, tööḵlö ellōn ngaich Haman tö tanānyöre.

⁶Ngaich pöri anga-aṅ nö öt kētö tī re nöng hĕng tak nö in Môrtikai pò e nö miṙē-ĕv. Lökten, hē cha nö mikahtölōn ò tö yik tarik Môrtikai, lukkenre ngaich Haman nö halëlngö yik Yahūti, yik tarik Môrtikai, nö keuheūtngöre chūök im pūlngö Ahāsurös.

⁷Ik raneh chingëṅt, ngam Nīsan chingëṅt, im innët sīön samyeūheu ök rācha Ahāsurös ngaich cha-a chaphöt Pur, öp kinlah taneūngen, nö i kūö Haman kaheuk sakāmö; chaphöt e cha-a inrē nö kaheuk chingëṅt hanöng saha ngam innët sīönö chingëṅt Atör.

⁸Ngaich ngö ṙô Haman tök rācha Ahāsurös, Rīkre yip tarik tö pōiti pinrātngö ngaich parātiyö nö in vē tarik i në panam ngam pūlngö harīkngöre öp kui panam cha tö vē tahëng tarik, ngaich cha-a inrē nö öt haköp chöngö ngam rācha, lökten an ngam hinökngen cha nö öt kanôluṙô tī tö ngam rācha.

⁹Yē e nö kumchiklōn ngam rācha, hökngen öp chöngö nö kētu hòṅ cha nö halëli, ngaich chu-ö min söm köṅny tī tö tālen (3,40,000 Kg) rupīö eltī cha yip tökētu chöngö nö im la-en ngam rācha, hòṅ cha min nö chaphöt e nö el chūök rupīö ngam rācha.

¹⁰Lökten ök rācha nö sīlötnyö ök kinlong kintānti nö ṙā-ang i kuntī re ngaich kēten ò nö in Haman ök aṅ Akah, ök kikōnyö kūön Hamëtāta, ök tökunyaha elmat tö yik Yahūti.

¹¹Ngö ṙô ngaich ök rācha tö Haman, Kētu nun minë rupīö nö in meh, in yip tarik inrē, hòṅ meh sā öp tölöök lōn re tī tö u.

¹²Ngaich yik yōm tötngāṅlnyi ik rācha nö havëtu ik linūöi sīön ök sakāmö ök raneh chingëṅt, ök chöngö inrē sā nuk hachöngten Haman nö ṙòkhöre, nö kūichiyö nö in yip setrāp (Secretaries) ök rācha in yik mahayöng inrē nö ṙòkhöre i nup panam ò in yip kūön rācha yip tarik nö ṙòkhöre, kö i kinūichö tö hĕng panam kö i ëlô töhĕng tak tarik inrē; kūichyö angū-ö nö minë-eny ök rācha Ahāsurös ngaich katāntu mat tök kinlong ök rācha.

¹³Söömi ngaich nuk tökūichi līpöre tö yik samööma nö i nuk panam ök rācha nö ṙòkhöre, nö halëlhanga fëlhanga, keuheūtngövah yik Yahūti nö ṙòkhöre, tö-ayal, tököiny, kikānö, nyīö, nöng hĕng sumkam, im linūöi sīön sakāmö ngam innët sīönö chingëṅt ngam chingëṅt Atör, höng kētöre tö nup chehen cha inrē.

¹⁴Hĕng ök insā ök tö kūichiyö nö kētu nö chöngö nö keuheūt panam inhangkö yik tarik nö ṙòkhöre nö höngöre ip sakāmö angū-ö.

¹⁵Kurāten ngaich yik samööma nö kiröönngöre i chöngö ök rācha, i Sūsa ök tökiröng elpanam ngam chöngö nö kēnyu. Uichngöre ngaich ök rācha, Haman inrē nö òk, ngaich pöri ök elpanam Sūsa nö katuilöng el kui.