Read Car_Nicobarese ESTÖR 4 Bible Online

ESTÖR 4 - Car_Nicobarese bible

ESTÖR 4

¹Hē Môrtikai nö akahalōn tö nuk tökeuheūten, tikaichngö inyutre ngaich Môrtika; hayutlöre inrē tö sāk ngaich tūyöre tö tisum, kiröönngöre ngaich nö ellōn ök elpanam, harāmöre ngaich nö pōitô nö pānyô inrē nö peūny;

²Kiröönngöre anga-aṅ nö chuh ip lökhöt ip inkūp öp rācha, Pòn öt hĕng tak tökô nö kuhēthötre nö ik inkūp ök rācha nö hayūtö tö sāk.

³Keuheūtngöre chūök nö i nup panam, nuk tö yīhivö tök chöngö ök rācha, ök yöng miṙivlōn nö in yik Yahūti, hol tö inhīkö, pineūnyö, inrāmöre inrē, maṙôngö yik in cha töhulalhaka nö inyuttö sāk tisum inrē.

⁴Ngaich hē yik kikānö mi-i alaha Estör tö yik kumkan töre nö vë-eny nang ò, pōyen kanihngen ellōn ngaich ök ranī; söömngö inyut ngaich anga-aṅ inyut Môrtikai, pòn hōten ò nö luhngö ök sāk inyut ò, hö-ö pöri anga-aṅ nö hō-en u.

⁵Ngaich ang Estör nö havëten Hatak, ök töhĕng tak aṅ i yik kumkantöre in ök rācha, ök töhalēnlöng nö mameukṙen ò, ngaich tölṙô ò nö chuh in Môrtikai nö mikahtölōnre tö e töp chööḵnyö e inrē.

⁶Kunyī-inyre ngaich Hatak nö in Môrtikai nö el kahôyö ip elpanam i kūö inkūp ök rācha,

⁷Ngaich keuheūtnyöre ṙô Môrtikai nö vë-eny nang ò tö lāinyngen ò, tö ṙôken nup rupīö inrē ṙô Haman nö kilēḵngôre nö chaphöt nö el chūök rupīö ök rācha nö ṙāi inlëlngö yip Yahūti.

⁸Kē-ĕkūö ò inrē Môrtikai tö insā mat ök chöngö tökūichiyö ngaich nö michööḵöyö nö i Sūsa tökūö inlëlngö cha, ngaich hōten ò anga-aṅ nö hameuktö e nö in Estör ngaich vë-eny manah e nö in ò, tölṙô ò inrē nö chuh in ök rācha nö vë-elkui ò tö yip tarik Estör inrē.

⁹Kiröönngöre ngaich Hatak nö vë-eny nang Estör tö ṙô Môrtikai.

¹⁰Ngaich Estör nö vë-ekūö Hatak ngaich kilēḵngen ò nö ngö ṙô tö Môrtikai,

¹¹Ṙòkhöre yip tarik öp rācha nö akahalōn yip tarik aṅ në panam inrē tö tarik hēk kikānö öp chamuh ip rācha nö lātuhēt el milūkö öp töt havëka höng humĕng öp chöngö; hĕngren nyöre cha-a nö kumpaha, höng öp tö silôhukūö töp rācha töp humlum kinchīṙö ngaich anga-aṅ tö-aṅ. Ngaich chū-ö öich havëtu öich yih in öp rācha i el në tölūöi anāi sakāmö.

¹²Ngaich cha-a nö vë-eny nang Môrtikai tö ṙô Estör.

¹³Ngaich ngö ṙô Môrtikai tö cha nö sapṙô Estör, Uh man më-eṅ öt kô-òng vah tö lōn re öm sā yip tahëng Yahūti nö pò meh el patī rācha.

¹⁴Pò meh yē meh öt ṙô-òv öm hē ngih töngamuh, ṙinānyu yip min Yahūti tahëng kang chūök, më-eṅ pöri min tölëlngö töp patī ap yöng meh. Chiap tö-akahalōn töp lökten meh yih ing pūlngö tökūö ngih lohten töngamuh?

¹⁵Ngaich tölṙô cha Estör nö sapṙô Môrtikai,

¹⁶Kuṙòh, hamūl yip Yahūti nö ṙòkhöre tökôti nö i Susā, nö ahik töpòkūö chu, lūöi sumkam nö ötrēhĕn nö nyā òk inrē, hatööm hēk sakāmö. Ngaich chū-ö min inrē tö vē mameukṙen chu kikānö öi ahik sā yīö. Ngaich chū-ö min chuh ip rācha, pòrô angū-ö nö öt sā öp chöngö; ngaich yē chu kapah, ngaich kapah chū-ö.

¹⁷Kiröönngöre ang Môrtikai ngaich asā ṙô Estör nö tölṙô ò.