Read Car_Nicobarese ESTÖR 5 Bible Online

ESTÖR 5 - Car_Nicobarese bible

ESTÖR 5

¹Im linūöyö sakāmö ang Estör nö hayutlöre tö inyutre nö rāni sökhakṙen ngaich nö el ök latuhēt elmilūkö el patī ök rācha kamlö nö ik tupōiti urôhò ök rācha. Ūichhak ök rācha nö el ök kantēra re nö rācha lā tuhēt nö el ök patī rācha kamlö nö ip lökhöt ip patī rācha;

²Hē ök rācha nö meūk ök rāni Estör nö sökhak nö el milūkö, aheukhuvö ngaich anga-aṅ nö i kūö ò ngaich anga-aṅ nö silôtö ök humlum kinchīṙö nö in Estör ök më-el tī ò. Ṙuhtöre ngaich Estör ngaich lūölkö kui ök kinchīṙö.

³Ngaich ṙô ngaich ök rācha tö ò, Asuāpa, rāni Estör? Suāp havëkö meh? Kētu ap min nö in meh, pòrô nö ròngtī ngam pūlngö chu.

⁴Ngö ṙô ngaich Estör, Yē e nö kumchiklōn ngam rācha, hökngen ngam rācha tö Haman inrē nö yih tö taheui nö i nyinā-aṅ tö hatööm öp halēnken chu tö pòkūö ngam rācha.

⁵Ngö ṙô ngaich ngam rācha, Ka-eūyen kē-ĕren Haman hòṅ ai asā lōn Estör. Lökten ök rācha, Haman inrē nö yih ip nyinā-aṅ tö hatööm ök halēnlö Estör.

⁶Ngaich hē cha nö òk vāin, ngö ṙô ngaich ök rācha tö Estör, Suāp havëkö meh? Kētu ap min nö in meh. Suāp inrē havëkö meh? Hateūngi ap min pòrô nö ròngti ngih pūlngö chu.

⁷Ngö ṙô pöri Estör, Ngih ön havëkö chu;

⁸Yē chu aheukhuvö i kūö ngam rācha, yē e inrē nö kumchiklōn ngam rācha nö kētö öp havëkö chu nö hateungngö öp ṙô chu inrē, hökngen ngam rācha yēḵ tö Haman inrē nö yih huṙöich nyinā-aṅ tö hatööm öp halēnken chu tö pòkūö cha, ngaich huṙöich chū-ö min asā ṙô ngam rācha.

⁹Kiröönngöre ngaich Haman ik sakāmö angū-ö nö ṙāmölōn. Hē Haman pöri nö meūkö Môrtikai tök kunnyī-iny nö i kūö inkūp ök rācha, nö öt rēhĕn nö chōholre, öt rēhĕn nö kichëyöre nö i kūö ò, tööḵlö ellōn ngaich anga-aṅ tö lanīnöre nö in Môrtikai.

¹⁰Ṙāpöre pöri ang Haman, ngaich nöng chuh patīre; tīnngö mahavë-ere yik holre ngaich anga-aṅ, tök pīhö ò inrē Sērĕs.

¹¹Ngaich Haman nö vë-eny nang cha tö nuk kanôlò re, tö tumtak yik kūön ò inrē kikōnyö, nup ṙinūölö chūök ò inrē nö ineū-euṅ ò tö ngam rācha, tö tī ò inrē nö mu-urĕhlen ò nö tulöng tö yik kūön rācha, tö yik tarik ök rācha inrē.

¹²Ṙūönyôre inrē Haman, Urōsen ap rāni Estör nö öt hĕng tak halöngten tö tahëng nö yih nö hol ap rācha nö ip tökiröng nyinā-aṅ halēnlö ò höng chū-ö. Huṙöich chin yih inrē havëtu tö ò hol öp rācha.

¹³Sön angū-ö nö öt kanôlu ṙô tī tö chu, irô-òtö mat chu meūkö Môrtikai öp Yahūti nö ūichhaka nö i kūö inkūp öp rācha.

¹⁴Ngaich ngö ṙô ök pīhö ò Sērĕs tö yik hol ò nö ṙòkhöre tö ò, Hökngen öp chūök kinseutngö yēḵ nö vīlöng nö taneūi anāi sumkôngö rôlòng, ngaich ip peuheū vë-eny nang ap rācha hòn kiseūti Môrtikai, nö in e; ngaich kumchikngen re më-eṅ kiröönngöre hol öp rācha ip nyinā-aṅ tö hatööm. Angū-ö inlēnö ṙanāmölōn Haman, ngaich vīlöngö ök chūök kinseutngö.