Read Car_Nicobarese ESTÖR 6 Bible Online

ESTÖR 6 - Car_Nicobarese bible

ESTÖR 6

¹Ik hatööm angū-ö ök rācha nö öt kô nö haṙòh; ngaich anga-aṅ nö tölṙô kinëlö ök līpöre chūök inköpngö la-en, nuk kinṙötngö, vë-evkūö ngaich anū-ö nö i kūö ök rācha.

²Ngaich kôti nö kūichiyö inlahen Môrtikai nö vënyen nāṅ Piktāna nāṅ Tērĕs, nët tak aṅ in yik kumkantöre ik rācha, nak amahtö ök elmilūkö, nak lamukkenre nö hòṅ kētö tīre nö ik Rācha Ahāsurös.

³Ngö ṙô ngaich ök rācha, Asuh ök ineū-euṅ. Hēk inrōilö tökētu nö in Môrtikai tökūö ngih? Ngaich ngö ṙô yik tarik ök rācha yik mī-in ò tö ò, Höng rö-övö apa nö kinë-eṅvkūö.

⁴Ngö ṙô ngaich ök rācha, Achīö ap el milūkö? Fömhötre ang Haman nö kuhēthötre nö ël ök lā-elkahôyö el milūkö patī rācha nö vë-ekūö ök rācha tö kinseutngö Môrtikai nö i kūö ap chūök kinseutngö halēnlö ò, tö pòkūö ò.

⁵Lökten yik tarik ök rācha nö vë-eny nang ò, Haman ap umū-aṅ, sökhak, nö el milūkö. Ngö ṙô ngaich ök rācha, Hökhöt ò nö kuhēthötre.

⁶Lökten Haman nö kuhēthötre, ngaich ngö ṙô ök rācha tö ò, Suāp min tī hī ip tarik öp lōn ngòh rācha töhòṅ eū-eu? Ngaich ngö ṙô Haman tö re, Achiāp vö min lōn ngòh rācha töhòṅ eū-eu tömötlö tö chu?

⁷Ngö ṙô ngaich Haman tök rācha, Ip tarik öp lōn ngòh rācha tö-eū-eu,

⁸Hökngen nup inyut ap rācha yēḵ nö kētu, nup inyut ngam rācha rung, ap kōra inrē chūök ngam rācha ṙung nö i uk, sumpīövlöng inrē ap sapīöv ap rācha mī-ikui ò ṙung:

⁹Hökngen nup inyut töp kōra nö kētu ip töhĕng tak mā kūön rācha aṅ ip rācha; hökngen ò nö hayut ap tarik ap lōn ngam rācha nö tö-eū-eu, hökngen ò inrē nö hachōkūö ap tarik nö i uk ap kōra ël ap el kahôyö im elpanam, ngaich urēhĕkūö ò nö ahāṅnga; Ngatī inlinken ap min tarik ap lōn ngam rācha nö tö-eū-eu.

¹⁰Ngö ṙô ngaich ök rācha tö Haman, Ka-eūyen, kē nup inyut töp kōra inrē, sā ṙô meh ngaich, in Môrtikai tī ap Yahūti amūichhak nö i inkūp ök rācha. Un hĕng hang töṙā-ai nup ṙô meh.

¹¹Lökten ang Haman nö kē nuk inyut tök kōre inrē, hayūtö Môrtikai anga-aṅ inrē ngaich ha-ūichlen ò nö i uk kōra nö lök el ök töngāṅ elpanam, ahānga, Ngatī inlinken öp min tarik öp lōn ngam rācha nö tö-eū-eu.

¹²Havantöre ngaich Môrtikai nö ik inkūp ök rācha. Ka-eūyen pöri Haman nö chuh patīre, Haṙīvölōn kahulngö kuire inrē.

¹³Vë-eny nang Sērĕs ngaich Haman ök pīhö ò tö yik hol ò inrē nö keuheūtnyöre ṙô tö lāinyngenre. Ngaich yik tö-akaha tarik ò tök pīhö ò inrē Sērĕs nö ngö ṙô tö ò, Yē Môrtikai nö aṅ in yip tarik Yahūti öp töpô-òvkūö tö meh ngaich fukngö hö-ö man min kô lā-al ò, kô-òng vah pöri min öm fukngö i kūö ò.

¹⁴Hē cha nö ṙònghöichṙô nö vë-ekūö ò, chalô ngaich yik kumkantöre aṅ ik rācha ngaich kurāten nö kēten Haman ik tökiröng nyinā-aṅ halēn Estör.