Read Car_Nicobarese ESTÖR 7 Bible Online

ESTÖR 7 - Car_Nicobarese bible

ESTÖR 7

¹Lökten ök rācha tö Haman inrē nö kiröönngöre ik nyinā-aṅ ik Rāni Estör.

²Im innëtö sakāmö, hē cha nö òk vāin, hēk ök rācha nö ngö ṙô tö Estör, Suāp havëkö meh Rānī Estör? Kētu ap min nö in meh. Asuh ap ṙô meh inrē? Hateūngi ap min, pòrô nö ròngti ngih pūlngö chu.

³Sapṙô ngaich Rānī Estör, Yē chu aheukhuvö i kūö meh, Ō rācha yē ngam rācha inrē nö kuchīkölōn nö in e, hökngen ngih nômö chu nö kētu nö in chu i ṙô chu havë-a, vē tarik chu inrē i ṙô chu.

⁴Tön inyīhiyö in, chū-ö tö vē tarik chu inrē, öi halëliyö, fëliyö, ahātiyö inrē. Yē ih öre höng tö inyīhiyö hakövö, kikōnyö kikānö inrē ngaich rö-ö öre chū-ö hōḵ ṙô-òvö; pò ngih kanihngen ih nö öt ṙongta nö i yanëngen ngam rācha.

⁵Ngaich ngö ṙô ök rācha Ahāsurös tö Rāni Estör, Achiāp anga-aṅ, isuh ap inrē anga-aṅ, öp kamā-hanglōnre tö ngih la-en?

⁶Ngö ṙô ngaich ang Estör, Ngam lā-al tökunyaha elmat! Ngòh yih tötlöök Haman! Ngaich Haman nö pa-ekūö nö i kūö ök rācha i kūö ök Rānī inrē.

⁷Choholre ngaich ök rācha nö ṙāngö ik nyinā-aṅ nö tainy chuh el ök panô-òṅ ök patī rācha ngaich anga-aṅ; höngngöh pöri Haman nö havëkö inṙēlö nômöre nö ik Rāni Estör, pò ò nö ngaich nö meuk ap tötlöök nö in ò aṅ ip rācha.

⁸Havantöre ngaich ök rācha nö ṙā-ang el ök panô-òṅ patī rācha i chūök cha nö òk vāin, hē Haman nö fukngö nö el anūichö i chūök Estör, ngaich ngö ṙô ök rācha, Kēkö alaha ngòh rānī ang vöh min nö i kūö chu, nö el ngih patī chu? Ròngmö elvāng ök rācha nuk ṙô ò, kahulngö kūö ò cha-a ngaich.

⁹Ngaich ngö ṙô ang Harpōna, töhĕng tak aṅ in yik kumkantöre mameukṙen ök rācha, Ngaich inrē, ök chūök kinseutngö Môrtikai halēnlö Haman, ap töyöölen ṙô tö ngam rācha, nö sökhaka nö i patī Haman, taneui anāi sumkôngö rôlö.

¹⁰Ngö ṙô ngaich ök rācha, Kiseutngen ò in e. Lökten cha nö kiseutngen Haman nö i kūö nuk kinseutngö halēnkö ò kinseutngö Môrtikai, Ṙātöre ngaich ök tanānyö ök rācha.