Read Car_Nicobarese ESTÖR 8 Bible Online

ESTÖR 8 - Car_Nicobarese bible

ESTÖR 8

¹Ik sakāmö angū-ö ök Rācha Ahāsurös nö kē-ĕkūö ök Ranī Estör tök patī Haman ök tökunyaha elmat tö yik Yahūti, Yih ngaich Môrtikai nö i kūö ök rācha, pò Estör nö vë-eny nang ò tö ò nö kōinyyöng ò;

²Ngaich ök rācha nö silötnyö ök kinlong kintānhöti, ök kahë ò nö ṙā-ang in Haman, ngaich kēten ò nö in Môrtikai. Ngaich ang Estör nö ṙāten Môrtikai nö i kui ök patī Haman.

³Ngaich hēk ang Estör nö vë-ekūö ök rācha; afukngöre anga-aṅ nö i röön ò ngaich holtö mak matre nö hòṅ aṙētu ṙô tö tinahngö ök tötlöök vahīken Haman ök aṅ Akak ök harunlen ò inrē nö i finëlngö yik Yahūti.

⁴Ngaich ök rācha nö kulòktö ök humlum kinchīṙö nö in Estör,

⁵Chōholre ngaich ang Estör ngaich sökhaka nö i kūö ök rācha. Ngaich ngö ṙô anga-aṅ, Yē e nö kumchiklōn ngam rācha, yē chu inrē aheukhuvö i kūö ò, yē e inrē nö tölöök nö i kūö ngam rācha, yē ò inrē nö kuchik elmat tö chu, hökngen öp chöngö yēḵ nö kūichö nö havanrit nuk līpöre tökūichö hachöngten Haman ök aṅ Akak ök kikōnyö kūön Hamëtata, nuk kahūich ò hinôtö yip Yahūti nö fëli i kūö në panam ngam rācha nö ṙòkhöre.

⁶Sitih kanô-òṅ ṙöng öich chū-ö min meuk ngam öt kanôlò yamih nö i kui vē tarik chu? Hēk sitih kanô-òṅ öich min hatīönkö inlëlngö vē mak alahare?

⁷Ngö ṙô ngaich ök rācha Ahāsurös tök Ranī Estör tö Môrtikai inrē ök Yahūti, Yĕh meuk, ngaich chin kē-ĕkūö Estör töp patī Haman, ngaich cha-a inrē nö kiseutngen ò nö i kūö öp kinseutngö, pò ò nö hòṅ kētö tīre nö in yip Yahūtī.

⁸Kô-òren man më-eṅ inrē kūich i lōn meh i inlahen yip Yahūti, i minë-eny ngam rācha, ngaich katāntö mat e aṅtītö ngam kinlong ngam rācha; nö kūichö nö chöngö nö i minë-eny ngam rācha katāntu mat inrē tö ngam kinlong ngam rācha tötkô nö havānörit.

⁹Havëtu ngaich yik yōm tötngāṅlnyi hē e, ik linūöyö chingëṅt, ngòh Sivān chingëṅt, im tönët anāi lūöi sakāmö; kūichö ngaich ök chöngö asā ök chöngö Môrtikai i inlahen yik Yahūti nö löö in yip setrāp, in yik mahayöng, tö yip kūön rācha inrē i minë panam, löktökūö Intiā söl i Iti-ōpīa, hēngòng nët anāi sat pumnāmö, kö löö i töhĕng panam i kinūichö e kö i ëlô u inrē, löö in yik Yahūti inrē i kinūichö cha i ëlô cha inrē.

¹⁰I minë-eny ök Rācha Ahāsurös ök tökūichö katānö mat inrē tök kinlong ök rācha, söömi nuk tökūichö līpöre tö yip samööma nö i uk töveut kōra nö nuk tölā-evṙen nö i la-en ngam Rācha, töharuklöng aṅ i nuk kōra ök rācha.

¹¹Lökten in e ök rācha nö halöngten yik Yahūti i nuk el panam nö hamūlöre nö laklö nômöre, nö halëlhanga, nö fëlhanga, ane inrē keuheūtngövah yip tö sitih tarik tö aṅhavtī hēk panam töhòṅ kilöönö cha, tö yik kūön cha tö yip kikānö inrē, ngaich höng kiltöre inrē tö nup chehen cha,

¹²I töhĕng sakāmö keuheūtngöre chūök i në panam ök Rācha Ahāsurös, im linūöi sīön sakāmö ngam innët sīönö chingëṅt, ngam chingëṅt Atör.

¹³Hōtu ök insā mat ngam tökūichö nö kēnyu nö chöngö nö i minë panam, ngaich ahangnyu nö i yip tarik, ngaich hōtu yik Yahūti nö lēn ik sakāmö angū-ö nö havāhalre nö in yip lā-alre.

¹⁴Lökten yik samööma, nö yôklö nö i uk töveut kōra re nuk mī-i la-en ök rācha, kurāten nö i uk u, i kumlēḵ chöngö ök rācha; ngaich ök chöngö nö kēnyu nö i Sūsa ök tökiröng elpanam.

¹⁵Kiröönngöre ngaich Môrtikai nö ṙā-ang i kūö ök rācha nö inyuttö inyut rācha tölingūṅṙö mat tö-isoh inrē, hĕng ök tökiröng sapīöv humlum tövāi inrē ök kinṙum linen tö-amëla hunṙīngö inrē, sā ngam elpanam Sūsa nö ayôṙa nö ṙāmölōn.

¹⁶Eāṅvu ngaich yik Yahūti, ṙāmölōn, ineū-euṅvö inrē.

¹⁷Kö i nup panam kö i nup elpanam inrē, i nup töng chūök lööṙö ök chöngö ök rācha nö yih, ṙanāmulōn ngaich nö in yik Yahūti, tökiröng nyinā-aṅ ngaich haneūheu inrē. Maṙôngö ngaich yik tarik aṅ ngam panam vamë-enyre nö Yahūti, pò cha nö ngaich nö fukkui tö pinhëṅeṅkūöre tö yik Yahūti.