Read Car_Nicobarese ESTÖR 9 Bible Online

ESTÖR 9 - Car_Nicobarese bible

ESTÖR 9

¹Ngaich im innët sīönö in linūöi sīönö sakāmö ò, hē ök chöngö ngam rācha nö ngaich nö kēkaṙen, im angū-ö sakāmö takô hē yik lā-al yik Yahūti nö meūkken re nö kē minhôiṅyöre tö cha, ök töhĕng hang sakāmö inṙīngö pöri hē yik Yahūti nö kē minhôiṅyö re nö in yik lā-alre.

²Hamūlöre yik Yahūti nö i nuk elpanam cha keuheūtngöre chūök nö i nuk elpanam cha keuheūtngöre chūök nö i nuk panam ök Rācha Ahāsurös nö kētö tīre nö in yik lamukken re nö hòṅ chökhutī tö cha. Ngaich öt hĕng taka tökô nö sökhaka nö lā-al cha, pò ök pinhë-eṅkūö tö cha nö ngaich nö fukkui yik tarik.

³Ṙòkhöre yik kūön rācha i nuk panam tö yip setrap tö yik mahayöng inrē tö yik mākūö ik rācha cha-a inrē holṙen yip Yahūti, pò ngam pinhë-eṅkūö tö Môrtikai nö fukkui cha.

⁴Pò Môrtikai nö kiröng nö el patī ök rācha, keuheūtngöre chūök ngaich ök ineūkö ò nö parātī nö i minë panam; pò ök tarik Môrtikai nö sīöp sīöplöre chöngö.

⁵Lökten yik Yahūtī nö aṅtī tö sanët nö fëlngö yik lā-alre, fëlhanga, halëlhanga tö cha inrē, ngaich inrē nöng kahangtīre tö yik tö sumrīk tö cha.

⁶I Sūsa ök tökiröng elpanam yik Yahūti nö taneūyòng tarik fahëlngö halëlngö inrē.

⁷Fëli inrē Parsāntata Talfön, Aspata.

⁸Porata, Atalīa Aritata, Vaisata

⁹Parmasta, Arīsat, Aritai, inrē.

¹⁰Yik tösöm tak kikōnyö kūön Haman ök kikōnyö Hamëtata, ök tökunyāha elmat tö yik Yahūti; hö-ö pöri cha-a nö kētö tīre nö i kinīlö chehen.

¹¹Ik sakāmö angū-ö nö vënyu ṙôken yik töfëli nö i Sūsa ök tökiröng elpanam nö in ök rācha.

¹²Ngö ṙô ngaich ök rācha tök Rani Estör, Taneūyòng yik tarik ane inrē söm tak yik kikōnyö kūön Haman töfëli tö yip Yahūti nö i Sūsa ngam tökiröng elpanam. Sitih ti yip vö nö i nup tö-ōtngöre panam ngam rācha? Asuāp pökeh havëkö meh? Kētu ap min nö in meh. Suh ap tö-öltöre havëkö meh? Hateūngi ap min.

¹³Ngö ṙô ngaich ang Estör, Yē ngam rācha nö kuchīkölōn tö e, hökngen yip Yahūti yēḵ i Sūsa huṙöich nö halöngtuṙen inrē nö la-evṙen asā ngam chöngö ngih sakāmö, hökngen yip tö sömtak kikōnyö inrē kūön Haman nö kiseūti nö i kūö nup kinseutngö.

¹⁴Ngaich ök rācha nö chöngu tö e nö kēkaṙen; kēnyu ngaich ök chöngö nö i Sūsa, ngaich yik tösöm tak kikōnyö kūön Haman nö kiseūti.

¹⁵Hamūlöre inrē yik Yahūti nö i Sūsa im finën sīön sakāmö ngam chingëṅt Atör lūöyòng fahëlngö cha-a tö tarik nö i Sūsa; hö-ö pöri cha-a nö kētö tīre nö i kinīlö chehen.

¹⁶Ngaich yik tahëng Yahūti yik mī-iyöng i nuk panam ngam rācha inrē nö hamūlöre nö laklö nômöre, ngaich inrē nö höhlö tö yik lā-alre, sat anāi taneui köṅny yik töfëli aṅ in yik tösumrīk tö cha: hö-ö pöri cha-a nö kētö tīre nö i kinīlö chehen.

¹⁷Hē ök linūöi sīön sakāmö ök chingëṅt Atör an angū-ö, im finën sīönö sakāmö cha-a nö heūheure ngaich angū-ö sakāmö nö vī-i nö sakāmö hē tökiröng nyinā-aṅ ṙanamölōn inrē.

¹⁸Yik Yahūti pöri i Sūsa nö hamūlöre im linūöi sīön sakāmö im finën sīön inrē ngaich heūheure im tinneui sīön sakāmö, vīten e angū-ö sakāmö nö tökiröng nyinā-aṅ ṙanāmölōn inrē.

¹⁹Lökten yik Yahūti i tuhēt, yik mī-iyöng el tö luvë-akakūö elpanam, nö haköpkö ngam finën sīön sakāmö ngam chingëṅt Atör nö sakāmö ṙanāmölōn tökiröng nyinā-aṅ haneūheu inrē, sakāmö hē cha nö söömngö tö-atöllöng minchööḵö nö in höö.

²⁰Mikahngen u ngaich ang Môrtikai, söömngö līpöre ngaich tökūichö nö in yik Yahūti nö ṙòkhöre yik aṅkūö panam ök Rācha Ahāsurös, hĕnghöre töröhta tömarôvat inrē,

²¹Tölṙô cha nö haköpkö ngam töfën sīön sakāmö ngam chingëṅt Atör ane inrē ngam tinneūi sīön sakāmö ngam chingëṅt anga-aṅ, kaheuk samyeūheu,

²²Nö sakāmö hē yik Yahūti nö höhlö nö ṙā-ang in yik lā-al cha, nö chingëṅt inrē töhavantu nö in cha ṙā-ang im miṙīvlōn nö im ṙanāmölōn ṙā-ang im sanòk inrē nö im haneūheu; pòn hōtu cha-a nö vīten u nö sakāmö tökiröng nyinā-aṅ ranāmölōn inrē, sakāmö hē cha nö söömngö tö-atöllöngö minchööḵö nö in höö raneushö yāich inrē.

²³Kē-ĕ e ngaich yik Yahūti nö la-en nö sā ranehten cha, sā tī Môrtikai inrē nö kūichhöti nö in cha.

²⁴Pò Haman ök aṅ Akak, ök kikōnyö kūön Hamëtata, tökunyaha elmat tö yik Yahūti, nö hòṅ lā-al yik Yahūti nö halëlngen cha, ngaich chaplö Pur ngam kinlah taneūngen nö kirāchngen cha fëlngen cha inrē;

²⁵Hē Estör pöri nö yihtöre nö ikūö ök rācha, ngaich anga-aṅ nö kētö tökūichö chöngö pòn hōtu ngam tötlöök hachöng ò vahīṙen ò nö lā-al yip Yahūtī nö teunghö kūi ò, ngaich anga-aṅ tö yik kūön ò kikōnyö inrē nö kiseūti nö i nuk kiseutngö.

²⁶Lökten cha nö kaheuk në sakāmö nö Purim, nö ṙameū-eungrit ngam Pur Ngaich lökten inrē kūö nuk tö ngaich nö kūichö nö i mat ngih līpöre, tö ök kanööḵlö cha inrē nö i kūö cha tökūö ngih, tö ök lāinyngen cha inrē.

²⁷Ngaich yik Yahūti nö kētö chöngö kē-ĕ inrē nö i kui yik kūön cha inrē yip mahanôltöre min inrē nö in cha, tö e nö sōtu nö öt teung nö in cha nö haköpkö në tönët sakāmö nö sā ngam tökūichö öp hē inlēnlö e nö kaheuk samyeūheu,

²⁸Hòṅ minë sakāmö nö öt vāchiyö haköpka inrē i tumköl chap, i tum mupīhö, panam, elpanam inrē, tö në sakāmö ngam Purim nö sōtu nö öt kēkaṙen nö in vē Yahūti, un rēhĕn ngam inköpkölōn tö në sakāmö nö ṙākenre nö in yip kūön cha.

²⁹Ngaich ök Rānī Estör, ök kikānö kūön Apihēl, tö Môrtikai inrē ök Yahūti nö kētö tökūichö chöngö, nö inköpngö ngam innëtö tökūichö līpöre inlahen ngam Purim.

³⁰Söömi nuk tökūichö līpöre nö in yip Yahūti nö ṙòkhöre, i nuk tö hēngòng nët anāi sat panam im pūlngö Ahāsurös, i ṙô lanāmö kanô-en inrē,

³¹Tö në sakāmö Purim nö hōtu nö haköpka ip inlēnlö ṙētak u, sā chöngö Môrtikai ök Yahūti tök Ranī inrē Estör nö in yip Yahūti, sā tī cha inrē nö ṙā-ati nö in cha in yip kūön cha inrē i inlahen cha nö ahik nö harāmöre inrē.

³²Ök chöngö Ranī Estör mahaköpngö kinëken ngih Purim, mikahayö angū-ö inrē nö kūichiyö.