Read Car_Nicobarese MANEUTNYI 10 Bible Online

MANEUTNYI 10 - Car_Nicobarese bible

MANEUTNYI 10

¹Ngaich ngam Mā Tēv nö ngö ṙô tö Môsös, Kuṙòh chuh in Fërō man: tön hangëngö ellōn ò chin, ellōn yip tarik alaha ò inrē, hòṅ chu hameuktö në minkahngöre elṙôngö cha:

²Hòṅ meh vënyö nang ap kūönre, ap kūön meh inrē, tö nuk tī Chu i kui Aikup, nuk minkahngö Chu inrē tī Chu in cha; hòṅ yīö akahalōn tö Chu Öich Chū-ö Mā Tēv.

³Ngaich nā Môsös nā Āròn, nö chuh in Fërō, ngaich ngö ṙô tö ò, Ngö ṙô an ngam Mā Tēv, ngam Tēv yip Hīprū. Irô-òten öm min sōḵ hayāichngöre i kūö chu? Hökngen më tarik chu nö kiröönngöre, hòṅ cha nö lök la-en chu.

⁴Hēk, yē meh sōḵ hökngen më tarik nö kiröönngöre, yĕh meuk, kētö nup mufākö chin huṙöich, nö i kūöngö panam meh:

⁵Ngaich anū-ö min nö löpngöre nö i kūö ngam tumlat, öthĕng tak tökô min nö meuk kūö ngam tumlat: ngaich anū-ö min nö nyā nup chööḵkūö tökënngöre kumṙah, nup töt kô-òng vah, nup tö ōtren nö in yīö, keuheūt nyahāṅre min anū-ö tö chōn nup tösīöp tö pòkūö yīö nö el ngam kahôyö:

⁶Tööḵlö nup min patī meh, nup patī yip tarik alaha meh min inrē, nup patī yip aṅ Aikup inrē nö ṙòkhöre; töt maheuṅk yik yöng meh ötrēhĕn nö maheuṅk yik yöng yik yöng meh, hēten tö ök sakāmö cha nö i kūö ngih tumlat söl i ngih sakāmö. Havöökūöre ngaich angā-aṅ, ngaich kunyī-inyre nö ṙā-ang in Fërō.

⁷Ngaich yik tarik alaha Fërō nö ngö ṙô tö ò, Iṙôktöreṙen ang min ngòh tarik nö tinngöp hī? Hökngen më tarik nö kiröönngöre, hòṅ cha nö lök la-en ngam Mā Tēv ngam Tēv cha: öl ṙöng öm akahalōn tö Aikup nö ngaich nö lëlngö?

⁸Kēhötvö hēk nā Môsös nā Āròn nö in Fërō: ngaich ngö ṙô angā-aṅ tö cha, Kuṙòh, lök la-en ngam Mā Tēv yin ngam Tēv yīö: achīö yip kumröönngöre tö cha?

⁹Ngaich Môsös ngö ṙô, Kiröönngöre in min holtö tö-ayal holtö tököiny inrē holtö kūönre tö kikōnyö hol tö kūönre tö kikānö inrē, holtö nup chehenre tömūl nup tö kö i mihëṅṙöre, öi kiröönngöre: pò ih hòṅ ip tökiröng sakāmö ngam Mā Tēv.

¹⁰Ngaich ngö ṙô angā-aṅ tö cha, In yīö An yēḵ ngam Mā Tēv, yē chu ngaich hökngen yīö kiröönngöre, tö yip kūön yīö tökūöṅnö inrē: ngëchkö e; töchōich ap nö in yīö.

¹¹Öt ngatī: kiröönngöre yin yī-ö höng kikōnyönyöre, ngaich lök la-en ngam Mā Tēv; tön angū-ö ap lōn yīö. Ngaich chā-a nö ahōnyuvö nö ṙā-ang i kūö Fërō.

¹²Ngaich ngam Mā Tēv nö ngö ṙô tö Môsös, Hateutnyö këlre man i kui ngam panam Aikup hòṅ nup mufākö nö yih, nö i kui ngam panam Aikup, nö keuheūt nö nyāngö nup kun chōn im panam, ṙòkhöre nup chööḵtī ök kumṙah tökënngöre.

¹³Ngaich ang Môsös nö silônyö ök tinkungre nö i kui ngam panam Aikup, ngaich ngam Mā Tēv nö kētö ök kuföt chuhöt nö i kui ngam panam hĕng sumkam ik sakāmö angū-ö, hĕng mitööm inrē; ngaich hē e nö peuheū, ngam kuföt chuhöt nö kumtö nuk mufākö.

¹⁴Ngaich minë mufākö nö keuheūtngöre chuhu nö i kui ngam panam Aikup? Ngaich keuheūtngöre chūök nö teungtöre nö i kūöngö Aikup; pōyen takô anū-ö; öt töngatī-iv mufākö nö sā u nö lā urĕh, ötrēhĕn nö ngatī nö lā unôich tö u.

¹⁵Pò u nö keuheūtngöre tī nö hanyatngö kūö ngam tumlat, lökten ngam panam nö sangūla; ngaich anū-ö nö keuheūt, nö nyāngö nup kun chōn im panam, keuheūt inrē tö ṙông nup chōn nup chööḵtī ök kumrah tökënngöre: Ngaich öt ōtre nup tö-uhāv, ötrēhĕn chōn ötrēhĕn kun kun chōn el kahôiṙen, keuheūtngöre im panam Aikup.

¹⁶Havëten nā Môsös ngaich ang Fërō, nö kurāten nā Āròn; ngaich ngö ṙô angā-aṅ, Köölöfālen chin lā im Mā Tēv, ngam Tēv nā, lā in nā inrē.

¹⁷Vë-ekūö meh chin lökten öm aṙē-ĕl tökööl chu höng hĕngtöre heuh tö ngih, vë-ekūö ngam Mā Tēv ngam Tēv meh, hòṅ ò nö kēngö ngih kinpaha nö ṙā-ang in chu.

¹⁸Kiröönngöre ngaich angā-aṅ nö ṙā-ang in Fërō, ngaich vë-ekūö ngam Mā Tēv.

¹⁹Ngaich ngam Mā Tēv nö havöökūö ök tökalēḵ kuföt sūng, ök ma-aheuingö nuk mufākö, ngaich ahōtö u nö el ap mai Ētöm ngaich öt hĕng mufākö tö-ōtre nö i nuk kūöngö Aikup.

²⁰Hangëngö ellōn Fërō pöri ngam Mā Tēv, ngaich angā-aṅ nö öthalöngten yik kūön Israĕl nö kiröönngöre.

²¹Ngaich ngö ṙô ngam Mā Tēv tö Môsös, Kū-ö tö el halīöngö tī man hateutnyö këlre, hòn singūlö nö i kui ngam Aikup, hòṅ tarik min nöng ṙēpa nö el singūlö.

²²Hateutnyö këlre ngaich Môsös nö kū-ö tö el halīöngö, umuh ngaich ök tökufëi singūlö i kui ngam panam Aikup nö ṙòkhöre, lūöi sumkam:

²³Ngaich achā-a nöng kö öt meūkö höö, ötrēhĕn nö chōholre nö ṙā-ang chūökre nö lūöi sumkam: ṙòkhöre pöri yik kūön Israĕl nö hanātu nö i elyöngöre.

²⁴Ngaich havëten Môsös ang Fërō, Kuṙòh ngaich yin lök la-en ngam Mā Tēv; höng nup töṙeūla pöri chehen yīö tö höngngöh tö nup tömūlhaka chehen yīö i mihëṅṙö u: Hökngen më kun kūön yīö inrē nö kiröönngöre nö in yīö.

²⁵Ngaich ngö ṙô ang Môsös, Hòṅ kētö eltī ih man inrē tö tökētuvö nup töföngö inrē tökētuvö, hòṅ ih kētö tökētuvö i ngam Mā Tēv, ngam Tēv ih.

²⁶Hòṅ hōluröön in inrē min tö në nuā re; öt hĕngtit kinsòh kunröön min töṙā-ayö; pòn anū-ö tökē-ĕ tö ih öi lök la-en ngam Mā Tēv, ngam Tēv ih; öt akahalōn in min tö aṅtīre lök la-en ngam Mā Tēv, yē ih sölta in e.

²⁷Hangëngö ellōn Fërō pöri ngam Mā Tēv, ngaich angā-aṅ nö öt halöngngen cha nö kiröönngöre.

²⁸Ngaich ngö ṙô Fërō tö ò, Kē-ĕngre man tö chu, hīnöre man um meukkūö chu hēk; tön ip sakāmö meh meukkūö chu kapah min më-eṅ.

²⁹Ngaich ngö ṙô ang Môsös, Huveū-eu ṙô man, öt hòṅ meukkūö meh chin min hēk.