Read Car_Nicobarese MANEUTNYI 14 Bible Online

MANEUTNYI 14 - Car_Nicobarese bible

MANEUTNYI 14

¹Ngaich ngam Mā Tēv nö vë-ekūö Môsös, ngö ṙô,

²Vë-ekūö yip kūön Israĕl, hòṅ cha nö havöökūöre nö i-yöng lākūö Pihahiròt, i hôi Miktöl tö ngam mai, lā kūö Pē-alsefòn: lā in e yī-ö min iyöng lā ip mai.

³Ngaich ngö ṙô min Fërō tö yip kūön Israĕl, Sānngökūö yin nö im panam, öpngökūö cha an ngam tönyaṅlnyi.

⁴Ngaich Chū-ö min hangëḵngö ellōn Fërō ngaich angā-aṅ min nö tömkörit cha; ngaich Chū-ö min kēḵ ineū-euṅre in Fërō, in yip in ò inrē kumyung nö ṙòkhöre; ngaich akahalōn min yip aṅ Aikup tö Chu Öich Chū-ö Mā Tēv, Ngaich ngatī chā-a.

⁵Ngaich vënyu nang ök rācha aṅ Aikup tö yik tarik nö falngöre: haṙīngöre ellōn ngaich Fërō tö yik tarik ò inrē, nö in yik tarik, ngaich ngö ṙô cha-a, Suh öng ngih inlahen hī, öi hökngen yik aṅ Israĕl nö kiröönngöre nö ṙāngenre nö vī vahīṙen hī?

⁶Ngaich angā-aṅ nö halēn nuk inröl, ngaich ngôḵ yik tarikre nö in ò:

⁷Ngaich angā-aṅ nö kēḵ nuk tö-atöllöng inröl, tafūölòng, ṙòkhöre inrē nuk inröl i Aikup, yöngṙen kumyung inrē in u nö ṙòkhöre.

⁸Ngaich ngam Mā Tēv nö hangëḵngö ellōn Fërō ök rācha aṅ Aikup, ngaich angā-aṅ nö lūḵ yik kūön Israĕl: pò yik kūön Israĕl nö öt pa-ekūö nö kiröönngöre.

⁹Ngaich yik aṅ Aikup nö lūḵu cha, ṙôkhöre nuk kōra inröl Fërō inrē, tö yik aṅ uk kōra ò, yik kumyung in ò inrē, ngaich kôtikūö tö cha nö iyöng ip mai, ap tö röhta nö i Pihahiròt, lā kūö Pē-alsefòn.

¹⁰Ngaich hē Fërō nö haröhtöre, chônga ngaich yik kūön Israĕl, ngaich meuk yik aṅ Aikup nö unôichrit cha nö kiröönngöre; pōi pinhë-eṅkūö chā-a ngaich. Ngaich hūḵkö ngam Mā Tēv yik kūön Israĕl.

¹¹Ngö ṙô chā-a tö Môsös, Kūö tö rö-ö anūlö hòng i Aikup, öm kēngen ih kapah el tönyaṅlnyi? Kūöyòh öm ngati tī tö ih, öm kēnyen ih ṙā-ang Aikup?

¹²Röh öng nö angū-ö ṙô ih vë-ekūö meh i Aikup, öi ngö ṙô, Hökngen ih, vī vahīṙen vē aṅ Aikup? Pò ih ĕhten vī vahīṙen aṅ Aikup, tö ih kapah el tönyaṅlnyi

¹³Ngö ṙô ngaich ang Môsös tö yik tarik, Uh yin pa-ekūö, sökhaka ui halöinyköre, meuk ngam inyööken tī ngam Mā Tēv, ngam tī Ò min tö taheui nö chööḵnyen tö yīö; pò më aṅ Aikup më maheuṅk yīö töngamuh, hö-ö yin min meūkö cha hēk.

¹⁴Ngam Mā Tēv an min kumyunglen yīö, uh yī-ö min ṙô-òvö inrē.

¹⁵Ngaich ngam Mā Tēv nö ngö ṙô tö Môsös, Kūöyòh öm hūḵken Chu? Vë-ekūö më kūön Israĕl, hòṅ cha nö kiröönö kūöre.

¹⁶Hachônglö ngam tinkungre më-eṅ hateutnyö këlre inrē i kui ngam mai, harēvö e: hòṅ më kūön Israĕl min nö lök ellōn ngam mai nö el tanyô.

¹⁷Yĕh meuk öm, hangëḵngö ellōn yip aṅ Aikup Chin min Chū-ö, ngaich chā-a min nö tömrit cha: ngaich Chū-ö min kēḵ ineū-euṅre in Fërō, in yip kumyung in ò inrē nö ṙòkhöre, i nup inröl ò yip aṅ uk kōra ò inrē.

¹⁸Hòṅ yip aṅ Aikup min nö akahalōn tö chu Öich Mā Tēv, yē chu min teūngen tö ineū-eure in Fërō, i nup inröl ò, in yip aṅ uk kōra ò inrē.

¹⁹Ngaich ök ma-aṅhānga ngam Mā Tēv, ök mu-urēhĕkūö ngam elyöngö Israĕl, nö kē-ĕngre ngaich chuh lā unôich cha; ngaich changāchlöngö ök taṙul nö ṙā-ang i kūö cha ngaich söktöhëich nö lā unôich tö cha:

²⁰Ngaich angū-ö nö yihtöre nö i hôi elyöngö yik Aikup tö elyöngö Israĕl; ngaich taṙul ök umuh singūlö inrē, hanātö tī angū-ö tö el hatööm: ngaich ngam tahëng nö öt yihtöre nö röhta nö im tahëng tö el hatööm.

²¹Hateutnyö këlre ngaich ang Môsös nö i kui ngam mai; ngaich ngam Mā Tēv nö hōten ngam mai nö havanritre nö aṅtī tö ök töhĕng mitööm tökalēḵ kuföt chuhöt, ngaich vīten ngam mai nö nyôlö ngaich harēvöre minë mai.

²²Lök ellōn ngam mai yik kūön Israĕl nö kiröön nö el tanyô: ngaich minë mai nö rananglö cha lā hāmö cha, lā tavē cha inrē.

²³Lūḵ ngaich yik aṅ Aikup, ngaich tömrit cha nö el ngam mai, ṙòkhöre nuk kōra Fërō, inröl ò, aṅ uk kōra ò inrē.

²⁴Ngaich ngö inlahen tö peuheū i hôi tönët köiny ṙô tö tötafūöl köiny ṙô, ngam Mā Tēv nö ngëichtö kui yik aṅ Aikup nö löktö el kūö ök tameūyö taṙul inrē, ngaich öt kô-òtī tö yik kumyung aṅ Aikup.

²⁵Tilaknyö nuk kalröön inröl cha angā-aṅ, pòn hōtu chā-a nö sīkö kinröönngö: lökten yik aṅ Aikup nö ngö ṙô, Tā-a töi falngöre ṙā-ang i kūö Israĕl; tön ngam Mā Tēv an kumyunglen cha nö lā-al aṅ Aikup.

²⁶Ngaich ngö ṙô ngam Mā Tēv tö Môsös, Hateutnyö këlre man i kui ngam mai, hòṅ minë mai nö yih nö hēk nö i kui më aṅ Aikup, i kui minë inröl cha, i kui yik aṅ uk kōra cha inrē.

²⁷Hateutnyö këlre ngaich Môsös nö i kui ngam mai, havantöre ngaich ngam mai im peuheū nö holtö kumlēḵre; falngöre ngaich yik aṅ Aikup tö e; ngaich ngam Mā Tēv nö fuk ellōn ngam mai tī tö yik aṅ Aikup.

²⁸Havantöre ngaich ngam mai, tumṙeūḵtö nuk inröl ngaich, yik aṅ uk kōra inrē, ṙòkhöre yik kumyung aṅ in Fërō nö el mai yik lamūḵu cha; ötrēhĕn nöng hĕngtit tak tö-ōtre tö cha.

²⁹Ngaich pöri yik kūön Israĕl nö lök el tanyô nö ellōn ngam mai; ngaich ngam mai nö rananglö cha, lā hāmö cha, lā tavē inrē.

³⁰Ngatī tī ngam Tēv nö hayööken Israĕl ik sakāmö angū-ö, nö ṙā-ang eltī yik aṅ Aikup, ngaich yik aṅ Israĕl nö meuk yik aṅ Aikup nö kapah nö i kūö mai.

³¹Ngaich yik aṅ Israĕl nö meuk ṙôkö ngam Mā Tēv i tī Ò tö yik aṅ Aikup: pa-ekūö ngaich yik tarik tö ngam Mā Tēv, ngaich chā-a nö ṙātö ellōnre nö i ngam Mā Tēv im tarik ò inrē Môsös.