Read Car_Nicobarese MANEUTNYI 15 Bible Online

MANEUTNYI 15 - Car_Nicobarese bible

MANEUTNYI 15

¹Tīkökṙôre ngaich Môsös tö yik kūön Israĕl inrē nö i ngam Mā Tēv, tö ngih tinkökö, ṙô-òv inrē nö ngö ṙô. Tikökṙôre chin i ngam Mā Tēv, pòn ineū-euṅv angā-aṅ i minhôiṅyöre: Fuk el mai tī Angā-aṅ tök kōra tök aṅ uk ò inrē.

²Ngam Mā Tēv an kumlēḵ chu tinkökö inrē, vītöre An nö inyööken chu: Angā-aṅ An ngòh Tēv chu, ha-öinyö Ò chin min; Tēv ök muvöhngö chu, hapōilen Ò chin min.

³Kumyung An ngam Mā Tēv: Mā Tēv an ngam minë-eny Ò.

⁴Fuk el mai tö tī Ò nuk inröl Fërō yik kumyung ò inrē; Yik tökatöllöng yöngṙen kumyung ò lōngti nö el mai Ētöm.

⁵Kahultö kui cha minë mai: Lōngti chā-a nö lā taṙeūḵ sā ihong

⁶Ō Mā Tēv, tö-ineū-euvö an ngam lā hāmö kël Meh im minhôiṅyö Meh: Ō Mā Tēv, pinyāṅchngö ngam lā-al An ngam lā hāmö kël Meh, nö panyeny.

⁷Ane inrē i ṙôkö lanöökö Meh Öm kuringngen cha yip chamôhòlre nö lā-al Meh: kēnyö ngam lanīnöre Më-eṅ, ngaich ṙāpngö chā-a sā kaṙālö afō.

⁸Kūö ngam kuföt elmeh Meh minë mai nö mūlngö, söklöre minë tötöh nö chiphaka sā töfônghaka, kënngöre minë mai nö ellōn ngam mai.

⁹Ngö ṙô ngam lā-al, Lūḵ chin min, kô-òl chin min, michööḵöre chin min tö pôre; Tööḵngen ap min töyal lōn chu nö in cha; hōknyö sanëtre chin min, halëlngen cha min ngih kël chu.

¹⁰Fööhang më-eṅ ngaich aṅtī tö ngam kufötre, kahultö kui cha ngaich ngam mai: Lōngti cha-a ngaich sā pirum nö el ngam tökalēḵ mai.

¹¹Ō Mā Tēv, achīö ap tösā Meh, i vē tēv? Achīö ap tösā Meh, ineū-euv im hanëtö, tö ha-öinyö pinhë-eṅ, tö tī tö pinngangkūö?

¹²Hateutnyö ngam lā hāmö këlre më-eṅ, Ngeūkten cha ngaich ngam tumlat.

¹³I miṙēlōnre Më-eṅ hachōḵ më tarik më ṙahānyö Meh: i kumlēḵre Më-eṅ hachōḵkūö cha i ngam töhet elyöngö Meh.

¹⁴Hang yip tarik, kichëyöre chā-a ngaich: fanëlu ngaich yik aṅ Filistia.

¹⁵Uṙeh ngaich yip mā aṅ Ĕtöm; yip tökalēḵ tarik aṅ Mō-ap, löökö alaha chā-a tö kinchëyöre; ṙòkhöre yik aṅ Kanā-an nö kē-ĕngre.

¹⁶Fuk kui cha ngaich nganāngö pinhë-eṅkūö inrē; Iṙôkö ngam kël Meh chā-a nöng öt halöinyköre sā ihong; Ō Mā Tēv, hanöngsaha më tarik Meh nö vāngngö, më havah Meh.

¹⁷Kēhötvö yin tö Meh, teūichtu inrē tö Meh i kui ngam rôngö, më amin Meh, Ō Mā Tēv, ngam chūökö vahī Meh nö chūök Meh iyöng in e, Ō Mā, ngam töhet chūök, köp nö ngaich, vahī-il minë kuntī Meh.

¹⁸Örheūheu An ngam Mā Tēv nö hayöng.

¹⁹Pò nuk kōra Fërō nö pökngö holtö nuk inröl ò ane inrē yik aṅ uk kōra ò nö el ngam mai, havantö minë mai inrē nö hēk ngam Mā Tēv nö i kui cha; kiröön pöri yik kūön Israĕl nö lök el tanyô nö ellōn ngam mai.

²⁰Ngaich Miriöm ök kikānö pròfĕt, kanānö Āròn, nö kēḵ timpröl nö eltīre; ṙòkhöre inrē yik kikānö kunyī-inyre nö tömrit ò nö kumtö timpröl nö kirīöm inrē.

²¹Sap ṙô cha ngaich Miriöm, Tikökṙôre yin im Mā Tēv, pòn ineū-euv Angā-aṅ im minhôiṅyöre; fuk el mai tī Angā-aṅ tök aṅ uk ò inrē.

²²Ngaich Môsös nö iṙūöhöröön nö hachōḵ yik aṅ Israĕl nö ṙāngö ap mai Ētöm, kiröönngöre chā-a ngaich nö lök el ap tönyaṅlnyi i Sūr; lūöi sumkam röön chā-a nö lök el ap tönyaṅlnyi, ngaich öt kôtökūö tö mak.

²³Hē cha ngaich nö sölta nö i Māra, ngaich ötkô chā-a nö òk nuk mak i Māra, pòn angū-uvö anū-ö: lökten ök minë-eny e nö kaheūkö nö Māra.

²⁴Ngaich yik tarik nö ngö ṙô nö siṙös ṙôre nö lā-alkūö Môsös, Suh òk öi vö min?

²⁵Ngaich vë-ekūö ngam Mā Tēv angā-aṅ; ngaich ngam MāTēv nö hameuktö ök chōn nö in ò, hĕng māṅ, ngaich kavalten ò angā-aṅ nö el nuk mak, vīngöre ngaich nuk mak nö kuchik: in e angā-aṅ ngaich nö vītö Chöngö nö in cha inchöngten inrē, in e inrē angā-aṅ nö kalaha cha.

²⁶Ngö ṙô angā-aṅ, Yē meh min hakūötenre hang ṙô ngam Tēv ngam Mā Tēv meh öm la-evṙen töp töchip el mat Ò, ngaich kētö elnangre i në Chöngö Ò nö ṙòkhöre, ngaich chū-ö min öt hēngö hakeunti in meh, tö në invah, në hakeuntö chu in yip aṅ Aikup: pò chu öich Mā Tēv tö lööken tī tö meh.

²⁷Chalôḵ chā-a ngaich nö i Ēlim, i chūök nuk tönët sīön mak töpöklö, sat anāi tum māṅ inrē nuk kachūr: ngaich iyöngtöre chā-a nö ranghö nuk mak.