Read Car_Nicobarese MANEUTNYI 16 Bible Online

MANEUTNYI 16 - Car_Nicobarese bible

MANEUTNYI 16

¹Pòkngöröönre chā-a ngaich nö ṙā-ang Ēlim, ṙòkhöre inrē yik ṙôngö kūön Israĕl nö yih ik tönyaṅlnyi i Sin, ök ihôi Ēlim tö Sinai, im tinneui sīön sakāmö ngam innëtö chingëṅt unôichrit cha nö ṙāngö ap panam Aikup.

²Ngaich ṙòkhöre yik ṙôngö kūön Israĕl nö siṙös ṙôre nö lā-alkūö Môsös, lā-alkūö Āròn inrē nö el tönyaṅlnyi:

³Ngö ṙô yik kūön Israĕl tö cha, Ĕhten in öre kapahtö tī ngam Mā Tēv ip panam Aikup, isaha ih ūichhakṙen i nup tanīönyö tö aṅtö alaha, isaha ih tööḵngen nyā rôtī; pò nā ngaich kēnyen ih löö el ngih tönyaṅlnyi, vē tömaṙôngö nö kumpahaivah tö neūköre.

⁴Ngaich ngö ṙô ngam Mā Tēv tö Môsös, Yĕh meuk, löktö el halīöngö tī Chin min hōngtö nyā-aṅkūö yīö; ngaich min më tarik nö hamūl nyā-aṅkūö i töhĕng sakāmö nö kaheuk sakāmö, hòṅ Chu Öich kalaha cha, yē cha min nö lök im Chöngö Chu, hēk yĕn rö-ö.

⁵Ngaich ngö inlahen im tinfūölö sakāmö, vī nuk kumṙenre min cha-a, nët sumkam ṙôken min anū-ö nö sā ṙôken hamūl cha i töhĕng sakāmö.

⁶Ngaich ngö ṙô nā Môsös nā Āròn tö yik kūön Israĕl nö ṙôkhöre, Ip harap, möl yī-ö min akahalōn tö ngam Mā Tēv nö kēnyen yīö ṙāngö öp panam Aikup:

⁷Ip peuheū möl yī-ö min meuk minā-aṅ ngam Mā Tēv; pò Ò nö hang ṙô yīö siṙös ṙôre lā-alkūö ngam Mā Tēv: asuh ai āyö, töp lökten yīö siṙös ṙôre lā-alkūö ai?

⁸Ngaich ngö ṙô Môsös, Ngaich ön min nö ngatī, ip hē ngam Mā Tēv min nö kētö kāḵ yīö tö alaha, tö harap, ngaich peuheū rôtī nö pōyen; pò ngam Mā Tēv nö hang sinṙöösö ṙô yīö öi lā-alkūö Ò siṙös ṙôre: asuh ai āyö? Öt linā-alkūö ai nup sinṙöösö ṙô yiö, tön linā-alkūö ngam Mā Tēv.

⁹Ngaich ngö ṙô Môsös tö Āròn, Ngö ṙô man tö yip ṙôngö kūön Israĕl nö ṙòkhöre, Tā-a haröhtöre i kūö ngam Mā Tēv: tön hang sinṙöösö ṙô yīö An.

¹⁰Ngaich ngö inlaha angū-ö, hē Āròn nö vë-ekūö yik ṙôngö, nö hōten cha nö kū-ö tö ök tönyaṅlnyi mat nö ngëicha, ngaich ngëicha, meūkö ngaich ök minā-aṅ ngam Mā Tēv nö el taṙul.

¹¹Ngaich vë-ekūö Môsös ngam Mā Tēv, ngö ṙô,

¹²Hang sinṙöösö ṙô yip kūön Israĕl chin: vë-ekūö cha, ngö ṙô, Kāḵ alaha yin min tö harap, tö peuheū inrē öi tööḵngen min tö rôtī; ngaich akahalōn yī-ö min tö Chu öich Mā Tēv, Tēv yīö.

¹³Ngaich ngö inlahen im harap, yih nuk kuīl, ngaich löpngöre tī töm elyöngö: ngaich tö peuheū hulalhaka tacham havīlö ök elyöngö.

¹⁴Hē nuk tacham töhulalhaka nö rö-ö, yĕh meuk, i kui tumlat ngam tönyaṅlnyi nuk kun töchuvī töhëich nö el tumlat, sā tö-isoh tökënngöre tacham.

¹⁵Ngaich hē yik kūön Isarĕl nö meūkö e, ngö ṙô cha-a tö höö, Asuh önguh? Pò cha nö öt akahakūö tö e. Ngaich Môsös nö ngö ṙô tö cha, Rôtī an kahëtö ngam Mā Tēv nö nyā-aṅkūö yīö.

¹⁶Ngih ön Chöngö ngam Mā Tēv, NGòh töhĕng tak tarik hamūl nyā-aṅkūöre asā ṙôkvatre, hĕng nyanum i töhĕng tak, nö kē-ĕ min tö yīö sā tumtak yīö; kö kēḵ nyā-aṅkūö yip tarik el inrūkui Ò.

¹⁷Ngaich ngatī yik kūön Israĕl, rīkre töpōyen hamūl, rīkre tökūönen hamūl.

¹⁸Ngaich hē cha nö kalah tum nyanum e tö nyanūmö, angā-aṅ ngòh töpōyen hamūl öt sinṙaklu kūö tī, angā-aṅ öp tökūönen hamūl öt hanātu kūö; kö sā ṙôkvat töhĕng tak tarik hamūl achā-a.

¹⁹Ngaich ngö ṙô Môsös tö cha, Un tarīku ṙāmākö e nö söllö peuheū.

²⁰Hö-ö pöri chā-a nö hangṙô Môsös; rīkre pöri tö cha ṙamākö e nö söllö peuheū, kamlöku ngaich angū-ö, ngaich hangeūṅtu: ngaich tainy Môsös tö cha.

²¹Kaheuk peuheū chā-a nö hamūlö e, kö sā ṙôkvat töhĕng tak: ngaich hē ngam tavūöi nö kalē-ĕ mat, ayëri ngaich angū-ö.

²²Ngaich ngö inlahen, im tinfūölö sakāmö chā-a nö hamūl nyā-aṅkūö tö nët sumkam, kö nët nyanum i tö hĕng taka: ngaich ṙòkhöre yik mākūö yik tö maṙôngö nö yihtöre nö vë-enynang Môsös.

²³Ngaich ngö ṙô angā-aṅ tö cha, Angū-ö ön ngih ṙô ngam Mā Tēv, Tökiröng öp nö haneūheu huṙöich töhet nö anôilö nö i ngam Mā Tēv: kahulngö nup kahulre yī-ö, sum nup sahumre inrē; ngaich ṙòkhöre nup tö ōtre ṙāḵtö u ṙanākö kūö yīö söl ip peuheū.

²⁴Ngaich ṙāḵkö e chā-a nö söllö peuheū, sā tinöölôre tö Môsös: ngaich öt hangeūṅtu angū-ö, ötrēhĕn nö kamlöku.

²⁵Ngaich ngö ṙô Môsös, Nyā-aṅ e töngamuh; tön anôilö ön töngamuh nö i ngam Mā Tēv: hö-ö yin min kôtökūö tö e el kahôyö töngamuh.

²⁶Tafūöl sumkam yin hamūlö e; anôilö pöri ngam sinat sumkam, hē e angū-ö nö rö-öv.

²⁷Ngaich ngö inlahen im sinātö sakāmö, yip tarik rīkre kumröönngöre nö hamūl, ngaich öt kanôtu kūö chā-a.

²⁸Ngaich ngam Mā Tēv nö ngö ṙô tö Môsös, Irô-òten öi sōḵ haköp në inchöngten tö Chu në Chöngö Chu inrē?

²⁹Meuk yin, tön kē-ĕkūö yīö an ngam Mā Tēv tö anôilö, lökten An nö kē-ĕ kūö yīö im tinfūöl sumkam tö rôtī tönët sumkam; kö ngöhö yin el chūökre, un tarīku ṙamā-ang chūökre ip sinātö sakāmö.

³⁰Lökten yik tarik nö heūheure ik sinātö sakāmö.

³¹Ngaich yik aṅ patī Israĕl nö kaheuk minë-eny e nö manna: sākulöl Tania, isoh; sā nyinā-aṅ vēför angū-ö tö hol tö hönī.

³²Ngaich ngö ṙô Môsös, Angū-ö ön ngih hachöngten ngam Mā Tēv Hĕng nyanum öp pöchö nö ṙātu inmeuktö e i yip kūön yīö min; hòṅ cha nö meuk ngam rôtī nahlö yīö tö Chu el tönyaṅlnyi, hē Chu kēnyen yīö ṙāngö ap panam Aikup.

³³Ngaich Môsös nö ngö ṙô tö Āròn, Kēḵ tanīöyö man hĕng hōnglö aṅ e tö manna, ngaich ṙātö e i kūö ngam Mā Tēv, nö ṙātu inmeuktö e in yip kūön yīö min.

³⁴Sā ṙô ngam Mā Tēv, nö tölṙô Môsös, lökten Āròn nö ṙātö e i kūö ngam Chöngö, nö haköpkö e.

³⁵Nyā manna yik kūön Israĕl nö fën anāi samyeūheu, hanöng saha yanīhi cha nö ik panam tö-aṅhaṅvkūö; nyā manna cha-a, hanöng saha cha nö sölta nö i kūöngö öp panam Kanā-an.

³⁶Töhĕng an ngam Ōmör i tö söm Efah (20 Lītör).