Read Car_Nicobarese MANEUTNYI 23 Bible Online

MANEUTNYI 23 - Car_Nicobarese bible

MANEUTNYI 23

¹Uh man kēḵ öp tösūöchka tö-eūka: um ṙātö eltīre hol tī ngam tötlöök öm töminyôinyaṅ ameū-a.

²Um tömrit yip tömaṙôngö tölā-evṙen tö tötlöök; umrēhĕn ṙô-òvö öm havööngökūö yip tömaṙôngö öm harīkngö inkaha fālen:

³Um rēhĕn tölngen öp yāich tarik ip fālen ò.

⁴Yē meh kööḵlö tö kōiny nuā öp kumnyah elmatre hēk köttö ò nö lō-ongkūö, hakôtenre më-eṅ kēten ò hēk in ò.

⁵Yē meh meuk köttö ò öp tökunyaha elmat tö meh nö hulalhakaṙen i ūku tö nup kumre, ngaich sōḵ më-eṅ lang hayööken ò, hayööken ò më-eṅ.

⁶Uh man harīkngö inlaha fālen öp yāich meh i nup fālen ò.

⁷Ṙūöhöngre më-eṅ marôvat tö minyôinyaṅ; um fëlngö töt akahaṙa tölöök inrē: tön rö-ö chin min haritlörit tötlöök.

⁸Um kēḵ raneushöre: pò ngih raneushö nö tilupngömat cha yip tömaneūkūvö, ngaich hachōichngö nup ṙô tölöök.

⁹Uh man hakihten öp tarik aṅ tahëng: tön akahalōn man tö ellōn tarik aṅ tahëng, pò meh misī aṅ tahëng öm ip panam Aikup.

¹⁰Tafūöl samyeūheu man teūch ngam taṙeūre, ngaich hamūl nup ṙòng:

¹¹Hökngen e pöri nö heūheure im sinat samyeūheu; nö un vī-i; hòṅ yip yāich tarik meh nö nyā-avkūö: ngaich nup ṙāhātö cha min nö nyā-aṅkūö nup töṙeūla el kahôyö. Ngati tī më-eṅ inrē tö nup panô-òṅ vāin meh, panô-òṅ ôliv meh inrē.

¹²Tafūöl sumkam alaha më-eṅ la-evṙen, heūheure ngaich im sinātö sakāmö: hòṅ ap kōiny nuā meh köttö meh inrē nö heūheure, öp kikōnyö inrē kūön öp tarik meh kikānö töp tarik inrē aṅ tahëng, nö uhāvlöre alaha.

¹³Kūötenre yin i nup ṙô Chu tö yīö nö ṙòkhöre: ane inrē un kakka minë-eny nup tahëng tēv, un rēhĕn nö hāngö nö löknyö elvāng yīö.

¹⁴Lūöi heuh yin min haköpkö tökiröng sakāmö in Chu i töhĕng samyeūheu.

¹⁵Tökiröng sakāmö tötaföhlöng ròtī Haköpö tö meh: sat sumkam kūö më-eṅ nyā tötaföhlöng ròtī sā chu hachöngten meh, ip hē töhalēnlöng ip Apip chingëṅt; (pò meh hē e kunyī-inyre ṙā-ang Aikup;) un hĕng tak min tömeūkö nö i kūö Chu nöng chanlööpṙen:

¹⁶Tökiröng sakāmö immūl ṙòng taneūich inrē, nup lanòhlòng vahīṙen meh, nup taneūich meh el panô-òṅ; ane inrē tökiröng sakāmö inmūlhöt, i manā-angrit ngam samyeūheu, hē meh hamūlhöt nup halinten meh aṅ panô-òṅ.

¹⁷Lūöi heuh i töhĕng samyeūheu, ṙòkhöre yip kikōnyhökūö meh i kūö ngam Mā Tēv nö hameuktöre min.

¹⁸Un kētö mahām öp tökētu nö in Chu nö holtö tötaföhlöng ròtī; un rēhĕn nup tösangöö ip tökiröng sakāmö Chu nö hĕng mitööm nö ōtren nö söllö peuheū.

¹⁹Kēhĕt nup lanòhlòng chōn man aṅ ngam taṙeūḵ meh nö el patī ngam Tēv meh, ngam Mā Tēv. Uh man sum alaha kūön pököre öm el öp aṅteh öp yöng ò.

²⁰Yĕh meuk, Tīntö ma-aṅhānga Chin hĕng tak urēhĕkūö meh, nö mameukken meh el talöökö meh, kamëten meh inrē ip chūökö öp töhalēnka tö Chu.

²¹Hakūötenre yin in Ò, hang öp ṙô Ò; un harunnyu lanīnö: tön öt aṙēlö tanôichngen meh An min, pò ap minë-eny chu nö in ò.

²²Yē meh pöri min kô-en hang ṙô ò, la-evṙen inrē tö nup ṙô Chu nö ṙòkhöre; ngaich Chū-ö min kumnyah elmat yip tökunyaha elmat tö meh, lā-al yip lā-al meh inrē.

²³Pò ngam ma-aṅhānga chu min nö urēhĕkūö meh, kēten meh min inrē nö in yip aṅ Amôr, in yip aṅ Hitāit, in yip aṅ Yapusāit inrē: rökngen cha Chū-ö min inrē.

²⁴Uh man sōntöre i nup tēv cha, um rēhĕn lök la-en u, um rēhĕn tömken nup la-en u; keuheūtngö u pöri më-eṅ tiṙōlngö u, likölngö nup machööḵlö nö pinyënyö.

²⁵Lök la-en ngam Tēv re yī-ö min ngam Mā Tēv, ngaich hakôlò nyā-aṅkūö yīö min Anga-aṅ, mak yīö min inrē; kēngö invah chin min nö ṙā-ang ellōn yīö.

²⁶Öt hĕng tak min tö chumnööḵlö, ötrēhĕn nö töt mikūönluvö im panam meh: hateūngi nup min tūmö nup sakāmö meh.

²⁷Urēhĕkūö meh Chin min tīntö ngam pinhë-eṅre, pāngö tī min inrē tö yip tarik nö ṙòkhöre yip lööṙö meh, vīten yip lā-al Chin min nö havöötö ukre nö in meh.

²⁸Tīntö kilamta-ō Chin min urēhĕkūö meh, öp ma-ahōngö yip aṅ Hivāit, aṅ Kanā-an, aṅ Hitāit inrē, nö ṙā-ang i kūö meh.

²⁹Öt i ël töhĕng samyeūheu Chin min ahōngen cha nö ṙā-ang i kūö meh; pòn öt aṅhaṅvkūö min ngam panam, ngaich ṙūöhölre ṙôken min nup töṙeūla el kahôyö nö lā-al meh.

³⁰Raheich, raheich hang tī Chin min ahōngen cha nö ṙā-ang i kūö meh, hanöng saha meh ṙūölöre ṙôngö, ane inrē amīnu tö ngam panam.

³¹Ngaich chū-ö min hakamngökūö panam meh löktökūö mai Ētöm söl ip mai Filistia, löktökūö im tönyaṅlnyi söl im Tahël: pò Chu min kēḵ yip aṅ ngam panam eltī meh; ngaich ahōngen cha më-eṅ min nö ṙā-ang i kūö meh.

³²Uh pömchö vī kinlēḵngô in cha, un rēhĕn i nup tēv cha.

³³Un iyöng i panam meh chā-a min, hòṅ cha nö öt vīten meh öm köölö fālen in Chu; pò meh yē meh lök la-en nup tēv cha, ngaich angū-ö min nö öthō nö öt tinngööpö meh.