Read Car_Nicobarese MANEUTNYI 24 Bible Online

MANEUTNYI 24 - Car_Nicobarese bible

MANEUTNYI 24

¹Ngaich ngö ṙô Anga-aṅ tö Môsös, Tā-a yônlö man im Mā Tēv, më-eṅ, Āròn inrē, Nātap, Apihū inrē, sat anāi inrē yip minṙöinylen i Israĕl; salām yī-ö inrē marôvat.

²Höng hĕng tak Môsös min nö yih nö haröhtöre nö i ngam Mā Tēv; hö-ö pöri chā-a nö yih nö röhta; ötrēhĕn min yip tarik nö yônlö nö in ò.

³Ngaich Môsös nö yihtöre ngaich keuheūtnyöre ṙô nö i yip tarik tö nuk ṙô ngam Mā Tēv, ṙòkhöre nuk inkaha fālen inrē: ngaich ṙòkhöre yik tarik nö hēngòng ṙô nö sapṙô, nö ngö ṙô, Kēken nup ṙô ngam Mā Tēv in min nö ṙòkhöre.

⁴Ngaich ang Môsös nö kūich nuk ṙô ngam Mā Tēv, ngaich ka-euilökūö nö chōholre tö peuheū, ngaich vīlö tahāklö hĕng el katòh ngam rôngö, nët sīönö machööḵlö, sā tum miyöngö yik kūön Israĕl.

⁵Ngaich angā-aṅ nö tīnngö ṙāl tarik aṅ i yik kūön Israĕl, yik kamëtö töföngö tökētu, ane inrē kamëtö tökētu nö i lanāmö nö i ngam Mā Tēv, tö kōiny nuā.

⁶Ngaich Môsös nö ròngti kahë tö mahām, ngaich chaplö e nö el pēsön; ròngti inrē ök mahām kicheny tö ò nö el öp tahāklö.

⁷Ngaich kēḵ ngam līpöre kinlēḵngô anga-aṅ, ngaich vë-ekūö e nö el ṙôngö yik tarik; ngaich ngö ṙô chā-a, Kēken nup ṙô ngam Mā Tēv in min nö ṙòkhöre, hang Chöngö inrē.

⁸Ngaich Môsös nö kēḵ ök mahām ngaich kichenytö e nö i kui yik tarik, nö ngö ṙô, Yĕh meuk ngam mahām ngam kinlēḵngô, ngam kinlēḵngô ngam Mā Tēv nö in yīö tö inlahen në ṙô nö ṙòkhöre.

⁹Ngaich yônlö Môsös, Āròn inrē, Nātap, Apihū inrē, sat anāi inrē yik minṙöinylen Israĕl:

¹⁰Ngaich chā-a nö meuk ngam Tēv Israĕl; ngaich el katòh röön Ò ök tösā safir ihong tö sumītiyö, tösā ngam tökô-en halīöngö tö sanehngöre.

¹¹Öt ṙātö eltīre anga-aṅ nö i kui yik mā i yik kūön Israĕl: meuk ngam Tēv achā-a, ngaich nyā, òk inrē.

¹²Ngaich ngö ṙô ngam Mā Tēv tö Môsös, Yônlö man in Chu i kui ngam rôngö, ngaich ngöh umuh; ngaich kē-ĕkūö meh min Chu-ö tö nup tömitāk ihong, tö ngam Chöngö inchöngten inrē, nup tökūichiyö tö Chu, hòṅ meh haköpten cha.

¹³Chōholre ngaich Môsös, Yôsuā inrē ök mameukṙen ò: ngaich Môsös nö yônlö nö im rôngö ngam Tēv.

¹⁴Ngaich ngö ṙô anga-aṅ tö yik minṙöinylen, Ihih yin höng ngöh hökken ai, hanööngen ai yih hēk in yīö: yĕh meuk, in yīö an Āròn Hör inrē: öp töng chööḵnyu, hökngen ò nö yihtöre nö in cha.

¹⁵Ngaich yônlö Môsös nö im rôngö ngaich ök taṙul nö kahultö kui ök rôngö.

¹⁶Ngaich ngam lanöökö ngam Mā Tēv nö i kui ngam rôngö Sināi, tafūöl sumkam angū-ö nö kahultö kui e: ngaich im sinātö sakāmö Anga-aṅ nö havëken Môsös nö löknyö ellōn ök taṙul.

¹⁷Ngaich ngam mineūkö lanöökö ngam Mā Tēv nö sā öp tameūyö tökalēḵĕkūö tö mat yik kūön Israĕl nö i kui ngam rôngö.

¹⁸Ngaich meuthötre Môsös nö ellōn ök taṙul, ngaich yônlö nö im rôngö: fën anāi sakāmö fën anāi hatööm inrē ang Môsös nö i kui ngam rôngö.