Read Car_Nicobarese MANEUTNYI 25 Bible Online

MANEUTNYI 25 - Car_Nicobarese bible

MANEUTNYI 25

¹Ngaich ngö ṙô ngam Mā Tēv nö vë-ekūö Môsös.

²Vë-ekūö yip kūön Israĕl, hòṅ cha nö kētö tökētuvö nö lamöö in Chu: i tumtak yip tarik töhō-o ellōn yī-ö kēḵ nup tökētu in Chu.

³Ngih ön tökētuvö kahë yīö in cha; humlum, rupīö, mās inrē;

⁴Tövai hilā tölingūṅ, tököinyö nganāvö mat,lāturë, sanôi pököre inrē,

⁵Uk kūön kōiny sīṅp vī-i mat nö ngāṅv, uk kapëòng, chōn sittim inrē;

⁶Tavī-i mak ëāṅvö, tötahūsa tavī-i incham, tinhuslö lōpān inrē,

⁷Ihong onik, ihong inrē tövīhötvö nö i eföt, ip lanak elngòh inrē.

⁸Hökngen cha nö vīlö töhet patī Chu; hòṅ Chu iyöng in cha.

⁹Sā nup hameuktö Chu in meh nö ṙòkhöre, öp insā öp inrūkui, ane inrē insā nup taṙòkhöre chehen e, ngatī tī yī-ö min vī-i e.

¹⁰Vī kasòng Chöngö min cha-a tö chōn sitim: nët sumkôngö (110 Sentimitör) ròngti öp rôta min, hĕng sumkôngö (66 Sentimitör) ròngti ṙòktāk e, hĕng sumkôngö ròngti ṙôktāk e, hĕng sumkôngö ròngti inrē rô-òl kaha e.

¹¹Lūöp uk e min më-eṅ tö töng humlum nyöre, lā-ël e uk e inrē tī meh lūöpö e, ngaich vī öp sapīöv rācha humlum i kui e nö havīṙiyö.

¹²Fënö vahī min me-eṅ tö humlum töchuvī ël chanit e, ngaich vīten u nö ip chūök u nö fën fīt; hĕng lā in nup tönët töchuvī ël chanit, ngaich nët nup töchuvī ël chanit ip tahëng lā kaha e.

¹³Vī kaneun pömchö tö sittim chōn, lūöp uk u tö humlum.

¹⁴Kuṙōlhöt nup kaneun pömchö el nup töchuvī chanit i kaha ngam kasòng Chöngö; nö kaneun ngam kasòng Chöngö.

¹⁵El nup töchuvī chanit ngam kasòng Chöngö min minë kaneun: öt hōkka anū-ö min nö ṙā-ang in e.

¹⁶Ngaich me-eṅ min chaphöt aṅ ngam kasòng Chöngö tö ngam minkahngö kanô-en, ap kahë tö Chu min in meh.

¹⁷Ngaich me-eṅ min inrē vī öp töng humlum nyöre anūichö miṙēlōn: nët sumkôngö ròngti rôta e min, ane inrē hĕng sumkôngö ròngti ṙôktāk e.

¹⁸Nëtö vahī pömchö tö humlum kërup; vī-i u pömchö nö törömö kö i nang öp anūichö miṙēlōn tī me-eṅ vīten u.

¹⁹Hĕng öp kërup ip tö hĕng nang e, ngaich hĕng kërup ip tahëng nang e: taptöre tī im anūichö miṙēlōn tö nup kërup i minë tö nët nang e.

²⁰Ngaich nup kërup min nö nyāṅkhaka kël nö lā tulöng, ruptökui ngam anūichö miṙēlōn tö minë këlre, nö kö havööhenhöö kūö; kū-ö tö ngam anūichö miṙēlōn min nup kërup.

²¹Ngaich më-eṅ min vītö ngam anūichö miṙēlōn i kui ngam kasòng Chöngö; ël ngam kasòng Chöngö tī me-eṅ chaphöt ngam minkahngö kanô-en ngam kahëtö Chu min in meh.

²²In e Chin min meukkūö meh, ngaich löknyö kui ngam anūichö miṙēlōn ṙô Chū-ö min vë-ekūö meh, löknyö hôi minë tö nët kërup i kui ngam kasòng Chöngö ngam minkahngö kanô-en, tö nup taṙòkhöre kahëtö Chu min in meh inchöngten yip kūön Israĕl.

²³Vī mīs pömchö hĕng tö sittim chōn: nët sumkôngö rôta, hĕng sumkôngö ṙôktāk ane inrē hĕng sumkôngö ròngti rô-òlkui.

²⁴Lūöp kui e pömchö tö töng humlum nyöre, ngaich vītö humlum sapīöv nö havīṙiyö.

²⁵Vītö taseū e pömchö min sā ṙôktāk tö kinyāṅknyu kuntī nö havīṙiyö, vī humlum pömchö sapīöv im taseū e nö havīṙiyö.

²⁶Ngaich me-eṅ min vīlö chanit e fën töchuvī ël humlum, ngaich vītö nup chanit i nup töfën nang e nup töfën fit in e.

²⁷Röhnyi nö i taseū e nup töchuvī ël chanit min nö chūök nup kaneun ngam mīs.

²⁸Vī nup kaneun min me-eṅ nö sittim chōn, lūöp kaha u tö humlum, hòṅ ngam mīs nö keūnö tö u.

²⁹Vī pingāṅl pömchö sanël inrē, pilön mak inrē tö nup töchilū pingāṅl insëṙö: humlum nyöre nö vī-i tö meh min.

³⁰El ngam mīs tī pömchö ṙātö nup töhet rôtī i kūö Chu nö örheūheu.

³¹Vī chūök rööntö manyak pömchö nöng humlum nyöre: vī-i e nö törömö i rööntö e, ip haṙah e inrē; vīlö nup kōp, tö nup manôlnyö ṙòng chōn, pūl e, höng alaha töhĕng angū-ö;

³²Tafūöl min nup pak löknyö kaha e; lūöi nup pak ngam chūök rööntö manyak löknyö im töhĕng lā kaha e, lūöi nup pak im chūök rööntö manyak, löknyö ngam tahëng kaha e:

³³Lūöi nup kōp tö vī-i nö sā panöpnyö ṙòng almön ip töhĕng pak, hĕng manôlnyö ṙòng hĕng pūl inrē; lūöi inrē nup kōp tö vī-i nö sā panöpnyö ṙòng tö hĕng pūl inrē; lūöi inrē nup kōp tö vī-i nö sā panöpnyö ṙòng almön im tahëng pak, hĕng manôlnyö ṙòng, hĕng inrē pūl: ngatī i minë tö tafūöl pak lamöknyö kaha ngam chūök rööntö manyak:

³⁴I kaha ngam chūök rööntö manyak fën nup kōp vī-i nö sā panöpnyö ṙòng almön, tö nup manôlnyö ṙòng, tö nup pūl inrē.

³⁵Hĕng öp manôlnyö ṙòng el katòh nup tönët pak löknyö im töng hĕng, hĕng inrē öp manôlnyö ṙòng el katòh nup tö nët pak, löknyö im töng hĕng, pò minë tö tafūöl pak nö löknyö kaha ngam chūök rööntö manyak.

³⁶Nup manôlnyö ṙòng u tö nup pak u inrē löknyö in ngam töng hĕng; ṙòkhöre angū-ö nö törömö nöng humlum nyöre.

³⁷Vī nup ëāṅvö min më-eṅ nö sat: ngaich cha-a min nö tōttökūö nup ëāṅvö, hòṅ u nö yangtakūö nö in e.

³⁸Nup tönët nòng tanôp, nup chūök ta-ökkūö ëāṅvö inrē, humlum nyöre min.

³⁹Hĕng tālen (lūöi anāi taneui ṙòken lumngan) min angū-ö nö vī-i nöng humlum nyöre, minë chūökṙen nö ṙòkhöre.

⁴⁰Meūkö u me-eṅ inrē nö vī-i nö sā inchōḵngenre, ngam töhameuktu nö in meh nö ngaich nö i kui rôngö.