Read Car_Nicobarese MANEUTNYI 27 Bible Online

MANEUTNYI 27 - Car_Nicobarese bible

MANEUTNYI 27

¹Vī öp tahāklö min me-eṅ chōn tö sittim chōn, taneui sumkôngö (22 Mitör) rôta, taneui sumkôngö ṙôktāk; ngaich min öp tahāklö nö fën mirëṙö: lūöi sumkôngö (1.3 Mitör) min öp rô-òl e.

²Vī nup sinrōl e pömchö i minë tö fën sinkeukngö e: höng mūlta min nup sinrōl nöng hĕng nö in e; ngaich me-eṅ min haṙungngö e tö mās.

³Vī nup tanīöyö u pömchö nö chūök kinëngö nup tisum kūö e, sanël inrē, pēsön inrē, kinvòk alaha, töp chūök tameūyö e inrē; ṙòkhöre nup chehen e min nö vī-i tö meh nö mās.

⁴Vī tö sā mat inhāṅl pömchö in e nö mās; ngaich i kui öp inhāṅl vī nup töchuvī-ël me-eṅ min mās fën i minë tö fën nang e.

⁵Ṙātö e min me-eṅ elkatòh öp inrāngö elkatòh ngam tahāklö nö havīṙi, hòṅ ngam inhāṅl nö söllö nö i ṙat ngam tahāklö.

⁶Ngaich me-eṅ min vī nup kaneun ngam tahāklö, tö sittim chōn haṙūngö u tö mās.

⁷Ngaich nup kaneun min nö kuṙōlhötvö nö el nup chanit, I kaha ngam tahāklö min nö nët lā minë kaneun, nö kaneun e.

⁸Vī-i e min me-eṅ nö holtö nup tömëngö ël savaich: sā inmeukhömat meh ngaich i kui rôngö, ngaich ngati tī cha-a nö vī-i e.

⁹Vī elmilukö ngam inrūkui pömchö, im lā lòhngö nö kū-ö tö lòhngö min nup ranangkūö hilā, ranangngökūö ngam elmilūkö tö tövai hilā hēngòng sumkôngö (44 Mitör) rôta nö hĕng lā;

¹⁰Nët anāi min nup machööḵlö e nët anāi inrē nup löp u nö mās; nup kinvòk i nup machööḵlö tö nup nyanëk kaha u inrē nö rupīö min.

¹¹Ngatī inrē lā kapā kaha e i rôta e nup ranangkūö hilā min, hēngòng sumkôngö rôta, nët anāi inrē nup machööḵlö, nët anāi nup löp inrē nö mās; nup kinvòk kaha machööḵlö tö nup inmöpṙat u, rupīö anū-ö.

¹²Sā ṙôktāk öp elmilūkö lā sūng nup ranangkūö taneui anāi sumkôngö; söm nup machööḵlö u, söm nup löp rööntö u.

¹³Taneui anāi sumkôngö ṙôkti ngam elmilūkö lā chuhöt nö kū-ö tö chuhöt.

¹⁴Nup ranangkūö im tö hĕng lā ngam inkūp min taneui sīön sumkôngö: lūöi nup machööḵlö u, lūöi nup löp rit u inrē.

¹⁵Ngaich im tahëng lā min nup ranangkūö taneui sīön sumkôngö: lūöi nup machööḵlö, lūöi inrē nup löp rööntö u.

¹⁶Ip inkūp ngam elmilūkö min hĕng ap innyatngö nët anāi sumkôngö, tö tövai hilā, tölingūṅ, tököinyö nganāvö mat, laturë inrē nö vahīṙen yip chamôktö mirum tö ta-īö: fën nup machööḵlö fën nup löp rit u inrē.

¹⁷Ṙòkhöre nup machööḵlö ngam elmilūkö nö vinngö nö hamöpö ṙat tö rupīö; rupīö nup kinvòk kāha u, mās nup löp rööntö u inrē.

¹⁸Hēngòng sumkôngö min rôta ngam elmilūkö, taneui sumkôngö rô-òl inrē, nö tövai hilā mās inrē löp rööntö u.

¹⁹Ṙòkhöre nup chehetī im inrūkui i nup la-en e nö ṙòkhöre, ṙòkhöre inrē nup tumnôkö ngam elmilūkö, nö mās min.

²⁰Ngaich tölṙô yip kūön Israĕl me-eṅ min, hòṅ cha nö kētö töhet tavī-i Òliv tö sōngö nö mak ëāṅvö, hòṅ ngam ëāṅvö nö ötheumköre hanūkūö.

²¹El ngam rūkui manūlö, lā uk ngam ranangkūö lā kūö ngam tökô-en inmeuktö, Āròn min tö yip kūön ò inrē tö chöngu tö e nö löktökūö harap söllö peuheū nö i kūö ngam Mā Tēv: Chöngö min angū-ö nö tö-örheūheu i tumkölchap cha yip kūön Israĕl.