Read Car_Nicobarese MANEUTNYI 28 Bible Online

MANEUTNYI 28 - Car_Nicobarese bible

MANEUTNYI 28

¹Kēten Āròn me-eṅ öp kahëm meh, tö yip kūön kikōnyö in ò, nö röhta nö in meh nö ṙā-ang in yip kūön Israĕl, hòṅ ò nö meukṙen Chu nö el chūök Kūönṙô, ang Āròn Nātap, Apihū inrē, Elīēsör, Itamār inrē, yip kūön Āròn.

²Vī töhet pömchö inyut Āròn öp kahëm meh, nö ineū-eu tövai inrē.

³Ngaich ṙòkhöre yip tö akahaṙa nö vë-evkūö tö meh min, yip tö hatööḵlöng ellōn tö chu min tö mikah, hòṅ cha nö vī in yut Āròn nö ahetlen ò, hòṅ ò nö meukṙen Chu nö i chūök Kūönṙô.

⁴Në nun inyut tö vī-i min tö cha, hĕng lanak elngòh, hĕng efòt, hĕng tökiröng inyut, hĕng inyut alaha inrē, hĕng sapīöv, hĕng sörplis; vī töhet cha-a min inrē inyut Āròn öp kahëm meh, tö yip kikōnyö kūön ò inrē, hòṅ ò nö meukṙen Chu nö el chūök Kūönṙô.

⁵Ngaich cha-a min nö kēḵ humlum, tölingūṅ, tököinyö nganāvö mat, tövai hilā inrē,

⁶Vī efòt min cha-a nö humlum, tölingūṅ, tököinyö nganāvö mat, laturë, tövai hilā inrē, vahīṙen yip tö milichngen vahī.

⁷Nëtö elranôṙö min angū-ö nö taptu i nup taseū e; hòṅ e nö taphen höö.

⁸Ane inrē tö milichngen kinpātö sörplis nö in e, inmöplö e angū-ö nö tö ngatī vinī-i nöng tö sā e inrē; nö humlum, tölingūṅ, tököinyö nganāvö mat, laturë, tövai inrē hilā.

⁹Ngaich kēḵ ihong me-eṅ min nët ònik, ngaich i mat u kūich minë-eny yip kūön Israĕl:

¹⁰Tafūöl nup minë-eny cha i mat öp tö hĕng ihong, ngaich nup tö ōtre tö tafūöl minë-eny i mat öp tahëng ihong, sā kinyôḵnyö cha.

¹¹Ka-ip nup tö nët ihong min me-eṅ nö la-en öp kamip ihong, tö sā kinīpö öp minkahngö, asā minë-eny yip kūön Israĕl: vī-i u pömchö nö halaphötvö nö i humlum.

¹²Vītö nup tö nët ihong min me-eṅ inköpkölōn tö yik kūön Israĕl: ngaich min Āròn nö keun nup minë-eny cha nö i kūö ngam Mā Tēv nö nët lā-a elranôṙö nö inköpkölōn.

¹³Vī nup humlum pömchö inlap;

¹⁴Nët nup sayōk töt katĕhka humlum; vī-i u pömchö nö sā tökuvaha nö chuvīṙö ël; ngaich halaphöt minë töchuvī-ël sayōk nö i nup inlaphöt.

¹⁵Ngaich me-eṅ min vī lanak elngòh hĕng inkaha fālen, nö tö milichngen vinī-i; sā vinī-i efòt tī pömchö tö e; nö humlum, tölingūṅ, tököinyö nganāvö mat, lāturë, tövai hilā inrē, tī meh min tö e.

¹⁶Fën mirëṙö öp min nö hachāpö; sā ṙôktāk eltī min ap rôta e, sā ṙôktāk eltī inrē ap ṙôktāk e.

¹⁷Vīhöt ihong pömchö inrē i mat e, fën mitöökö nup ihong: hĕng mitöökö rupīö, tòpas, karpöngköl inrē min nö raneh mitöökö;

¹⁸Emëröl im innët mitöökö hĕng, safir hĕng, hĕng inrē taimön;

¹⁹Ngam linūöi mitöökö inrē ampör hĕng, hĕng akēt; hĕng inrē emetis;

²⁰Ngam finën mitöökö hĕng kilsitoni, hĕng ònik, hĕng inrē yaspis: chūök tö humlum min anū-ö nö ip chūök vinīhötre.

²¹Sā minë-eny yip kūön Israĕl min nup ihong, nët sīön, asā nup minë-eny cha; sā kiniphöt i minkahngö, kö asā nup minë-eny cha, mi-in yip tö nët sīön miyöngö min anū-ö.

²²Ngaich min me-eṅ vī sayōk tö sā tökuvaha im lanak elngòh nö töchuvīṙö-ël vinī-i nö humlum tötkatĕhka.

²³Nët nup min vahī tö meh im lanak elngòh töchuvīrö-ël humlum, vītö nup tö nët töchuvī-ël nö i nup tö nët nang ngam lanak elngòh.

²⁴Ngaich me-eṅ min yohhöt minë tö nët töchuvī-ël sayōk humlum nö ël minë tö nët töchuvī-ël i nang ngam lanak elngòh.

²⁵Ngaich inrē minë tö nët kūö nup tö nët töchuvī-ël sayōk nö halaphötvö nö i nup tö nët inlap, ngaich vītö u ip efòt elranôṙö e, nö lā kūö.

²⁶Nëtö vahī min me-eṅ tö humlum töchuvī-ël, vītö u pömchö i nup tö nët nang ngam lanak elngòh, i taseū e, öp tö kū-ö tö taseū ngam efòt nö lā ël.

²⁷Nëtö vahī min me-eṅ tö humlum töchuvī-ël, ngaich vīhöt u min i nup tö nët elranôṙö ngam efòt elkatòh, nö lā kūö, röhta nö ip chūök inmöptökūö e, lātulöng tö nup tö milichngen kinpātö sörplis ngam efòt.

²⁸Ngaich anū-ö min nö kapòktu nö im lanak elngòh nö löktökūö i minë töchuvī-ël nö i minë töchuvī-ël im efòt nö yanòhtö öp tölingūṅ, öp mi-ip tömilichngen kinpātö sörplis ngam efòt, hòṅ ngam lanak elngòh nö öt tahēṙi nö im efòt.

²⁹Ngaich Āròn min nö keun minënyö yip kūön Israĕl i mat ngam lanak elngòh inkaha fālen kamtöp fanöinylö ò, yē ò nö kuhēthötre nö el ngam töhet chūök, nö i kūö ngam Mā Tēv nö im inköpkölōn töt chanūhuvṙen.

³⁰Ngaich me-eṅ min chaphöt nup Urim, Tumim inrē el ngam lanak elngòh inkaha fālen, in Āròn min anū-ö kamtö öp fanöinylö ò, ip hē ò nö kuhēthötre nö i kūö ngam Mā Tēv: ngaich Āròn min nö keun ngam inkaha fālen yip kūön Israĕl kamtö öp fanöinylö ò nö i kūö ngam Mā Tēv nöng örheūheu.

³¹Ngaich me-eṅ min vī öp tö arūḵ inyut ngam efòt nö tölingūṅ nö ṙòkhöre.

³²Ngaich angū-ö min nö hamëngnyu nö harònglöng nö lökhöt kui: rehënu min angū-ö töp tökupātö nö vinngö i taseū öp tömëngö in e, tö sā öp tömëngö ip vët inyut, hòn öt takaich.

³³I nup taseū e vītö ṙòng anār me-eṅ nö lingūṅ, köinyö nganāvö, laturë inrē nö vinngö nö i taseū e; i hôi u nö havīṙi nup humlum kungkrū:

³⁴Hĕng humlum kungkrū hĕng inrē ṙòng anār, hĕng humlum kungkrū hĕng inrē ṙòng anār, i taseū ngam tö aṙūḵ inyut nö vinngö.

³⁵Fuk in Āròn öp min mineukṙen: hāngö nup min ṙô u ip kunhëthöt ò nö el ngam töhet chūök nö i kūö ngam Mā Tēv, ane inrē ip kunnyī-iny ò hòṅ ò nö öt kapah.

³⁶Ane min me-eṅ vī humlum tötkatĕhka nö tömitāk, kā-īpö e, sā nup tö ka-iphötvö i minkahngö, Töhet im Mā Tēv.

³⁷Ngaich yoho e me-eṅ tö yanòh tölingūṅ, i kaha öp sapīöv; lā māl öp sapīöv min angū-ö.

³⁸Ngaich angū-ö min nö i māl Āròn, ngaich Āròn min nö keun nup tökööl nup töhet chehen, nup tö ahetlöngö tö yip kūön Israĕl i nup töhet tī cha inlōnti nö ṙòkhöre, örheūheu min angū-ö nöng i māl ò, hòṅ cha nö hōḵovö nö i kūö ngam Mā Tēv.

³⁹Kupāt inyut alaha me-eṅ tö tömirūnömat tövai hilā,vī tövai hilā inrē me-eṅ min nö sapīöv, vī sörplis me-eṅ min hĕng, vahīṙen chamôktö mirun tö ta-īö.

⁴⁰Vī inyut alaha yip kikōnyö kūön Āròn me-eṅ min, vī sörplis cha me-eṅ min, vī töngën sapīöv kui cha inrē, nö tö eū-eu nö tövai.

⁴¹Hayutlö u min me-eṅ in Āròn öp kahëm meh, in yip kikōnyö kūön ò inrē in ò; hachāmö cha inrē, hatööḵöl eltī cha, ahetlen cha inrē, hòṅ cha nö meukṙen chu nö i chūök Kūönṙô.

⁴²Ngaich me-eṅ min inrē vī nup tövai pachūma cha töngëṅ nö lā taṙeū tö kui kinmônö nö inyunngö nup tölichôi alaha cha, löktökūö ṙat tölngökūö kinmônö minë takeun:

⁴³In Āròn min anū-ö, i yip kikōnyö kūön ò inrē, ip hē cha nö kuhēthötre nö el rūkui inmūlö, hēk ip hē cha nö haröhtöre nö ip tahāklö nö meukṙen el ngam töhet chūök; hòṅ cha nö öt keunkö tökööl, ngaich kapah: Chöngö min angū-ö nö tö örheūheu söl ip kūön ò unôichrit ò.