Read Car_Nicobarese MANEUTNYI 31 Bible Online

MANEUTNYI 31 - Car_Nicobarese bible

MANEUTNYI 31

¹Ngaich ngam Mā Tēv nö vë-ekūö Môsös, nö ngö ṙô,

²Yĕh meuk, i minë-eny ṙô Chin havëken Pisalël öp kikōnyö kūön Uri, öp kikōnyö kūön Hör, aṅ i miyöngö Yūta:

³Ngaich chin hatööḵlen ò tö ma-alaha aṅ im Tēv, i mikah, i mikah el mat, i inkaha, ane inrē i nup tökeuheūttöre vinī-i,

⁴Nö halēn vinī-i nup tömilichngen la-en, la-en i humlum, i rupīö, i mās,

⁵I ṙinātö nup ihong, tö vīhötvö, i kinīpö mirun chōn, tö huveū-en i nup tökeuheūttöre mihëṅṙö vinī-i.

⁶Yĕh meuk, vīlen Oholiāp Chin nö hol ò, öp kikōnyö kūön Ahīsamak, aṅ i miyöngö Tën; ane inrē ellōn öich kēhöt mikah, hòṅ cha nö ṙòkhöre vahī tö nup tinöölô meh tö Chu;

⁷Rūkui inmūlö kasòng, öp tökô-en inmeuktö, anūichö miṙēlōn inrē öp i kui e, ṙòkhöre inrē nup chehen öp rūkui inmūlö.

⁸Tö ngam mīs tö nup chehen e inrē, töp töhet chūök rööntö manyaṅk tö nup chehen e inrē, tö ngam tahāklö lōpān;

⁹Tö ngam tahāklö töföngö tökētu ṙòkhöre nup chehen e inrē, tö ngam chūök sanöich töp lā kūö e inrē;

¹⁰Tö nup tö vāyö vinī-iṅ inyut, nup töhet inyut Āròn öp Kūönṙô tö nup inyut yip kikōnyö kūön ò inrē, nö meukṙen nö i chūök Kūöṙô;

¹¹Öp tavī-i incham, lōpān inrē tötahūsa nö im töhet chūök: asā nup ṙô chu cha-a min nö la-evṙen tö nup tinöölô meh tö chu.

¹²Ngaich ngam Mā Tēv inrē nö vë-ekūö Môsös, nö ngö ṙô,

¹³Vë-ekūö yip kūön Israĕl man inrē, ngö ṙô, Kô-en yin min öi hòṅ haköpkö në anôilö chu: pò e nö minkahngö nö i hôi chu tö yīö inrē i tumkölchap yīö; hòṅ yīö akahalōn tö chu öich Mā Tēv ma-ahetlen yīö.

¹⁴Lökten yin min haköpkö ngam anôilö; tön in yīö an nö töhet: öp töng mahachōichngö e öthōḵ min nö öt kumpahaivah: pò öp tö la-evṙen tö töng la-en hē e, anga-aṅ min tarik tö rökiṙen nö i yip tarik ò.

¹⁵Keuheūten nup min la-en i ël tö tafūöl sumkam; im sinātö pöri sakāmö angū-ö nö anôilö tö hayīchö nö haneūheu, töhet nö i ngam Mā Tēv: öp tö la-evṙen tö töng la-en hē sakāmö anôilö, öthōk min nö öt kumpahaivah.

¹⁶Lökten yin vē kūön Israĕl min nö haköp ngam anôilö, haköpkö ngam anôilö i tumkölchap cha, nö tö iṙūöhen nö kinlēḵngô.

¹⁷Minkahngö an i hôi chu tö yip kūön Isarĕl inrē nö tö örheūheu: pòn vī ngam halīöngö tumlat inrē ngam Mā Tēv nö tafūöl sumkam; ngaich heūheure anga-aṅ im sinātö, ngaich uhāvlöre.

¹⁸Ngaich kē-ĕkūö Môsös anga-aṅ, tö nuk tö nët tömitāk tö aṅ mat tö ngam tökô-en inmeuktö, hē kinheūtö ṙô Ò nö vë-ekūö ò nö i kui öp rôngö Sinai, nuk tömitāk ihong, tö kūichö mat tö kuntī ngam Tēv.