Read Car_Nicobarese MANEUTNYI 34 Bible Online

MANEUTNYI 34 - Car_Nicobarese bible

MANEUTNYI 34

¹Ngaich ngö ṙô ngam Mā Tēv tö Môsös, Fas nup ihong man nët tömitāk sā nuk mu-urĕh: ngaich kūich nup ṙô Chū-ö min i mat u nup mi-i mat nuk mu-urĕh, nuk likukngö meh.

²Lēn pömchö ip peuheū, ngaich yônlö im rôngö Sināi ip peuheū, ngaich umuh hameuktöre in chu i kui ap rôngö.

³Un tarīku pöchö min hol meh nö yônlö, unrēhĕn nö tariku tö meūkö nö keuheūtngöre chūök nö im rôngö; unrēhĕn manūlö nup töṙeūla ötrēhĕn manūlö nup tö hĕng mihëṅṙö töṙeūla nö nyā nö lataṙeū ngam rôngö.

⁴Ngaich anga-aṅ nö fas tömitāk ihong nët sā nuk mu-urĕh; ka-euilökūö ngaich Môsös nö choholre tö peuheū, ngaich yônlö im rôngö Sināi sā hinôtö ò tö ngam Mā Tēv, ngaich kēḵ nuk tömitāk ihong nët nö eltīre.

⁵Ngaich el taṙul ngam Mā Tēv nö yônti, ngaich sökhak nö in ò nö umuh, ngaich havëkö minë-eny ngam Mā Tēv anga-aṅ.

⁶Ngaich ngam Mā Tēv nö chööḵöng kūö ò ngaich ṙô-òv, Ngam Mā Tēv, Ngam Mā Tēv, Tēv an tööḵlö tö miṙēlōn neūkölōn inrē, töt veūtö lanīnö, tö pōyen miṙēlōn i tö köṅnyu aṙēlö;

⁷Ṙātö miṙēlōn i tö köṅnyu aṙēlö ötlanöökö tanôichngen tökööl inrē: rö-ö pöri angū-ö nö ṙināngö tö fāluṙen nö öt sācha; chöhka öt lanöökö yip yöng nö i yip kūön, i yip kūön yip kūön inrē, im linūöyö, finën kölchap cha inrē.

⁸Ngaich ka-eūyen Môsös, ngaich sōntö kuire nö el tumlat, ngaich salām.

⁹Ngaich ngö rô anga-aṅ, Yē chu töngamuh tö inkôluṙô i kūö meh, ō Mā vë-ekūö meh chin hökngen ngam Mā, nö kiröönngöre nö in ih; tön tökëhe likeun yin vē tarik; aṙēlö kanöölö tökööl ih inrē, ngaich kēḵĕ ih öi amin meh.

¹⁰Ngaich ngö ṙô anga-aṅ, Yĕh meuk, vītö kinlēḵngô chin hĕng: vītö pinngangkūö chin kūö më tarik meh nö ṙòkhöre, nup tö öl nö kēkaṙen nö i në panam nö ṙòkhöre, ötrēhĕn nö i në pumnāmö tarik: ngaich ṙòkhöre min yip tarik in meh nö meuk la-en ngam Mā Tēv min, pòn pinhë-eṅkūö öp tī Chu in meh.

¹¹Haköpkö e man ngam tinöölô meh tö chu töngamuh: yĕh meuk, ahōngö vē aṅ Amôr chin nö i kūö meh, aṅ Kanā-an, aṅ Hitāit, aṅ Perisāit, aṅ Hivāit, aṅ Yepusāit inrē.

¹²Haṙēmngenre man töre, hòṅ meh öt vī kinlēḵngôre in yip aṅ ngam panam ngam kū-ö meh, hòṅ e nö öt tinngöp meh nö öt rònglö nö in meh.

¹³Tiṙölngö nup tahāklö cha pöri min yī-ö, kiṙöpngö nup machööḵlö u, kūölngö öp insā Asērim:

¹⁴Tön rö-ö man min salām tahëng tēv: pò ngam Mā Tēv, ngam tö kunyahaṅlōn minënyi, nö tö kunyahaṅlōn nö Tēv:

¹⁵Hòṅ meh öt vī kinlēḵngôre in yip aṅ ngam panam, ngaich cha-a inrē nö asĕhkö nup tēv cha, ngaich kētö tökētu inrē nö i nup tēv cha, ngaich hĕng tak mahavëka më-eṅ, ngaich nyā-aṅvkūö töp tökētu tö ò;

¹⁶Ane inrē kēḵ kūön cha më-eṅ tö kikānö nö pīhö yip kikōnyö kūön meh, ngaich yip kūön cha kikānö nö tömrit nup tēvre, ngaich vīten yip kūön meh kikōnyö nö tömrit nup tēv cha.

¹⁷Uh man vī tēvre tö tömiyëṙi mās.

¹⁸Haköpkö ngam tökiröng sakāmö man ngam tötaföhlöng ròtī. Sat sumkam kūö öm nyā tötaföhlöng ròtī, sā tinöölô meh tö Chu; ip hē töhalēnlöng ip chingëṅt Apip: pò meh kunyī-iyre ṙā-ang Aikup im chingëṅt Apip.

¹⁹Ṙòkhöre nup lanòh nö chū-ö; ṙòkhöre nup nuā meh inrē, nup lanòh kōiny sīṅp inrē.

²⁰Nup lanòh kōiny kūön köttö haṙëni tö meh tö kōiny kūön sīṅp: ngaich yē meh öt haṙënngen ò, lireukngö likeun ò më-eṅ. Ṙòkhöre yip lanòh yip kūön meh kikōnyö nö haṙëniṙen tö meh. Öt hĕng tak min tömeūkö nö i kūö Chu nöng chanlööpṙen.

²¹Tafūöl samkam më-eṅ la-evṙen, heūheure pöri min më-eṅ im sinat sumkam: ip hē kunköhö tumlat ane inrē inmūlö ṙòng heūheure më-eṅ min.

²²Haköpkö ngam tökiröng sakāmö minë afta min më-eṅ, öp inmūlö ranehlòng vīt, ane inrē tökiröng sakāmö inmūlhöt i kinheūṅtö öp samyēuheu.

²³Lūöi heuh min i tö hĕng samyeūheu yip kikōnyö in meh nö hameuktöre nö i kūö ngam Mā Tēv, ngam Tēv Israĕl.

²⁴Tön kavalngö yip pumnāmö tarik Chin min nö i kūö meh, ṙūönyö ngam kūö panam inrē: ötrēhĕn nö tarīku min tö hòṅ lōnu tö ngam panam meh, yē meh hameuktöre lūöi heuh i tö hĕng samyeūheu i kūö ngam Tēv ngam Mā Tēv meh.

²⁵Uh man kētö öp mahām öp tökētu nö in Chu nö holtö tö-aföhlöng ròtī; unrēhĕn min öp tökētu ip tökiröng sakāmö ngam Chinööḵöng nö ṙātu nö söllö peuheū.

²⁶Nup ranehlö ṙòng chōn aṅ ap taṙeūḵ meh kētu tö meh nö i patī ngam Mā Tēv ngam Tēv meh. Uh më-eṅ min sum kūön pököre i aṅteh öp yöng ò.

²⁷Ngaich ngö ṙô ngam Mā Tēv tö Môsös, Kūich në man ṙô: tön asā talöökö ṙô u Chin ngaich vī tö kinlēḵngô in meh in Israĕl inrē.

²⁸Ngaich umuh anga-aṅ im Mā Tēv nö fën anāi sumkam fën anāi mitööm inrē; ötrēhĕn anga-aṅ nö nyā ròtī, ötrēhĕn nö òk mak. Ngaich kūich në ṙô kinlēḵngô anga-aṅ nö i mat nup tömitāk ihong, ngam tö söm Chöngö.

²⁹Ngaich ngö inlahen angū-ö hē Môsös nö yônti nö ṙā-ang kui ngam rôngö Sināi nö kumtö nuk tö nët tömitāk ihong ök tökô-en inmeuktö nö eltī Môsös, hē Môsös nö yônti nö ṙā-ang kui öp rôngö öt akahngen uk alaha kūöre anga-aṅ nö angāṅya, isaha ò nö vë-ekūö Ò.

³⁰Ngaich hē Āròn ṙòkhöre inrē yik kūön Israĕl nö meūkö Môsös, angāṅya uk alaha ök kūö ò nö meūkö; ngaich pa-ekūö cha-a nö haröhtöre nö in ò.

³¹Havëken cha ngaich Môsös; ngaich ṙòkhöre hēḵ Āròn tö yik mahayöng yik ṙôngö tarik nö havantöre nö in ò; ngaich vë-ekūö cha ang Môsös.

³²Unôich ngaich ṙòkhöre yik kūön Israĕl nö yih nö haröhtöre: ngaich holtö Chöngöre anga-aṅ nö kē-ĕkūö cha tö nuk ṙô ngam Mā Tēv nö in ò nö i kui rôngö Sināi.

³³Hē Môsös nö keuheūtô nö in cha, rupngö kūöre ngaich anga-aṅ.

³⁴Hē Môsös pöri nö kuhēthötre nö i kūö ngam Mā Tēv nö vë-ekūö Ò, kēngö ök ranup kūöre anga-aṅ hanöng saha ò nö kunyī-inyre. Kunyī-inyre anga-aṅ ngaich, ngaich vë-ekūö yik kūön Israĕl tö ök tinöölò ò.

³⁵Ngaich yik kūön Israĕl nö meuk ök kūö Môsös, nö angāṅya ök uk alaha kūö ò: ngaich hēk Môsös nö rupngö kūöre, hanöng saha ò nö kuhēthötre nö vë-ekūö Ò.